3
OYokaana oMubatizi ayebulya enzira
(Mat 3:1-12; Mak 1:1-8; Yok 1:19-28)
1 Omu mwanka ogweikumi na mitaanu okumulembe gwa Kaisaali oTibberiyo oweyafugiire obwakabaka bwʼe Looma, ngʼoPontiyo Piraato niiye afuga eitwale lyʼe Buyudaaya, ngʼoKerode niiye afuga eryʼe Galiraaya, era ngʼomugandawe oFiripo niiye afuga eitwale lyʼe Yituleya nʼe Turakonaiti; ngʼoLisaniya iye afuga eryʼAbbireene, 2 ngʼAnasi nʼoKayaafa niibo abakabona abakulu omu Yerusaalemi, oYokaana omutaane wa Zakaliya ngʼali omu kitera, nʼasuna obukwenda okuzwa egiri oKibbumba. 3 Kale nʼatambula okumalaku ebitundu byonabyona ebiriraine omwiga oYoludaani, ngʼakoba abantu okwenenya bababatize, kaisi oKibbumba abasoniye ebikole byabwe ebibbibibbi. 4 Ebyo byabbairewo ngʼowebakiwandiikire omu kitabo kyʼebibono bya Isaaya onaabbi bati:
“Waliwo atumulira omu kitera nʼeigono eryaminkirira ati:
‘Mutegeke oluguudo lwa Musengwa aiza,
mutereerye amanzirage.
5 Buli kiinamo bakiizulye;
buli lusozi nabuli kasozi babiice.
Amanzira amagedesye bagagolole,
nʼagalimu ebikonko bagakwanie.
6 Olwo abantu bonabona baaba okubona ngʼoKibbumba owabalokola.’ 3:4-6 Isa 40:3-5”
7 Abantu bangi ino ni baabanga egiri oYokaana ababatize, neye nʼabakoba ati, “Inywe abakabbikabbi ooti mpiri enfulugundu! Naani abalabwire ati eenu niiyo engeri eyʼokwiruka obusungu bwa Kibbumba obwaba okwiza? 3:7 Mat 12:34; 23:33 8 Aale atyanu mukole ebikole ebiraga biti dala mwenenyere ebibbibibbi byanywe. Era timwatandiika kuseega muti, ‘Kasita iswe tuli baizukulu ba Ibbulaimu,’ olwakubba mbakobera nti omu mabbaale ganu, oKibbumba ayezya okusuuciryamu oIbbulaimu abaizukulu abandi. 3:8 Yok 8:33 9 Mumanye muti muli ooti misaale, nga nʼamambaizi agagitema bamalire okugabiikirya oku kikolo kya buli musaale. Ogwo ogutaneneka ebineneka ebisa baaba kugutema, era bagudyake omu musyo.” 3:9 Mat 7:19
10 Awo abantu ni bamubuulya bati, “Aale atyanu tukole niki?” 11 Nʼabairamu ati, “Oyo aali nʼebizwalo ebibiri aweeku ogondi adamba, era aali nʼebyokulya yena akole atyo.”
12 Awo abasolooji ba musolo bona ni baiza ababatize, era ni bamubuulya bati, “Musomesya, iswe tukole tutya?” 3:12 Luk 7:29 13 Nʼabairamu ati, “Timwasoloojanga ekinene okukiraku ekyo ekibabalagira.”
14 Abaisulukale bona ni bamubuulya bati, “Kaisi iswe tukole tutya?” Nʼabakoba ati, “Abantu timwabanyagangaku ebyabwe, era timwabasibiriryangaku emisango eginandi babbenga. Mwererenge ku kusuna mpeera yaanywe yonkani.”
15 Awo abantu bonabona ni batandiika okuseega omu myoyo gyabwe bati, “Amo ni tubbangaawo ngʼoYokaana niiye oKurisito oKibbumba oguyalondere okununula abantu ogutusuubira.” 16 Neye oYokaana nʼabakobera bonabona ati, “Nze mbabatiza na maizi, neye waliwo ankiraku obwezye aali kwiza, oguntasaanira naire okusibindula obusibiro bwʼengaitogye ni ngitoola omu bigerebye. Iye, yalibabatiza na Mwoyo oMweru era na musyo. 17 Iye ayaba okwabulamu abantu ooti muntu owaakwata olugali nʼasenyenta, empeke nʼebisusungu. Empeke igyo yaligikumbaanirya omu kideerokye, kaisi ibyo ebisusungu nʼabyoca nʼomusyo ogutalikira.”
18 Atyo oYokaana, nʼayegesya abantu emirundi mingi ngʼakolesya ebibono ebyo, era ngʼabakobera aMawuliro aMasa. 19 Era nʼanenya omufugi oKerode, olwʼokutwala oKerodiya omuka mugandawe, nʼolwʼebibbibibbi ebindi byonabyona ebiyakolanga. 20 Kaisi kwebyo byonabyona, nʼayongereryaku nʼekyʼokwigalira oYokaana omu mabbuusu. 3:19-20 Mat 14:3-4; Mak 6:17-18
Okubatiza oYesu
(Mat 3:13-17; Mak 1:9-11)
21 Awo olwatuukire, abantu owebabbaire nga bali kwizanga egiri oYokaana okubabatiza, oYesu yena nʼaiza ni bamubatiza. Nga bamalire okumubatiza, yabbaire ngʼasaba oKibbumba, eigulu ni libikuka, 22 era oMwoyo oMweru, ngʼafaananira nakimo ooti njiiwa, nʼaika nʼamugwaku. Era eigono ni lizwa omwigulu nga likoba liti, “Niiwe oMwana wange omutake, era ogunsiima eino.” 3:22 Nta 22:2; Zab 2:7; Isa 42:1; Mat 3:17; Mak 1:11; Luk 9:35
Olulyo lwa Yesu
(Mat 1:1-17)
23 OYesu yatandiikire omulimogwe ogwʼokwegesya, ngʼayerya emyanka ooti 30, abantu nga bamweta mutaane wa Yusufu. OYusufu oyo yabbaire mutaane wʼEeri,
24 Eeri nga mutaane wa Matati,
oMatati mutaane wa Leevi,
kaisi oLeevi mutaane wa Mereki,
oMereki nʼabba mutaane wa Yanai,
oYanai iye yabbaire mutaane wa Yusufu,
25 oYusufu oyo mutaane wa Matatiya,
oMatatiya mutaane wʼAmosi,
Amosi nʼabba mutaane wa Nakumu,
oNakumu mutaane wʼEsiri,
Esiri iye mutaane wa Nangai,
26 kaisi oNangai yabbaire mutaane wa Maati,
oMaati iye yabbaire mutaane wa Matatiya,
oMatatiya nʼabba mutaane wa Semeeni,
oSemeeni iye mutaane wa Yoseki,
kaisi oYoseki nʼabba mutaane wa Yoda,
27 oYoda nʼabba mutaane wa Yowanaani,
oYowanaani iye mutaane wa Leesa,
oLeesa nʼabba mutaane wa Zerubbabbeeri,
kaisi oZerubbabbeeri yabbaire mutaane wa Seyalutiyeeri,
oSeyalutiyeeri iye nʼabba mutaane wa Neeri,
28 oNeeri oyo nʼabba mutaane wa Mereki,
oMereki iye yabbaire mutaane wʼAdi,
Kaisi Adi nʼabba mutaane wa Kosamu,
oKosamu iye yabbaire mutaane wʼErimadamu,
Erimadamu oyo nʼabba mutaane wʼEeri,
29 Eeri iye yabbaire mutaane wa Yoswa,
oYoswa nʼabba mutaane wʼEryeza,
Eryeza iye yabbaire mutaane wa Yolimu,
kaisi oYolimu nʼabba mutaane wa Matati,
oMatati oyo yabbaire mutaane wa Leevi,
30 oLeevi iye nʼabba mutaane wa Simyoni,
kaisi oSimyoni nʼabba mutaane wa Yuda,
oYuda iye yabbaire mutaane wa Yusufu,
oYusufu oyo nʼabba mutaane wa Yonamu,
kaisi oYonamu nʼabba mutaane wʼEryakimu,
31 Eryakimu iye yabbaire mutaane wa Mereya,
oMereya nʼabba mutaane wa Meena,
oMeena iye yabbaire mutaane wa Matata,
kaisi oMatata nʼabba mutaane wa Nasani,
oNasani nʼabba mutaane wa Dawudi,
32 kaisi oDawudi iye yabbaire mutaane wa Yese,
oYese iye nʼabba mutaane wʼObbedi,
Obbedi iye nʼabba mutaane wa Bbowaazi,
oBbowaazi iye yabbaire mutaane wa Seera,
oSeera nʼabba mutaane wa Nasoni,
33 kaisi oNasoni iye yabbaire mutaane wʼAminadaabbu,
Aminadaabbu iye nʼabba mutaane wʼAdimini,
Adimini iye yabbaire mutaane wʼArini,
Arini nʼabba mutaane wa Kazirooni,
oKazirooni oyo nʼabba mutaane wa Pereezi,
kaisi oPereezi iye yabbaire mutaane wa Yuda,
34 oYuda iye yabbaire mutaane wa Yaakobbo,
oYaakobbo nʼabba mutaane wa Isaka,
oIsaka iye yabbaire mutaane wa Ibbulaimu,
oIbbulaimu nʼabba mutaane wa Teera,
kaisi oTeera iye yabbaire mutaane wa Nakoli,
35 oNakoli oyo nʼabba mutaane wa Serugi,
kaisi oSerugi iye yabbaire mutaane wa Lewu,
oLewu oyo nʼabba mutaane wa Peregi,
oPeregi iye yabbaire mutaane wʼEbberi,
Ebberi iye nʼabba mutaane wa Seera,
36 kaisi oSeera yabbaire mutaane wa Kainaani,
oKainaani iye nʼabba mutaane wʼAlupakusaadi,
Alupakusaadi iye yabbaire mutaane wa Seemu,
oSeemu iye nʼabba mutaane wa Nuwa,
oNuwa iye yabbaire mutaane wa Laameeka,
37 OLaameeka iye nʼabba mutaane wa Mesuseera,
oMesuseera iye nʼabba mutaane wʼEnoka,
Enoka oyo yabbaire mutaane wa Yaledi,
oYaledi, iye nʼabba mutaane wa Makaleeri,
oMakaleeri iye yabbaire mutaane wa Kainaani,
38 oKainaani iye yabbaire mutaane wʼEnosi,
Enosi nʼabba mutaane wa Seezi,
oSeezi nʼabba mutaane wʼAdamu,
Adamu eyabbaire omutaane wa Kibbumba.