1 OPeetero nʼoYokaana nga bakaali batumula eeri abantu, abakabona nʼakulira abakuumi bʼeYeekaalu, aamo nʼabʼekibbula kyʼaBasedukaayo ababbaire awo, ni baigerera egibali. 2 Babbaire banyiigi ino olwakubba abatume babbaire beegesya abantu oku Yesu ngʼoweyazuukiire, ekyo nga kiragisya era ni kikakasa kiti abafu bʼokuzuukira, ekintu ekyakanisya enjegesya yʼeKisedukaayo. 3 Nʼolwekyo, ni bagwera oPeetero nʼoYokaana, ni babakwata, neye olwakubba ebiseera byabbaire byʼeigolo ngʼobwire bubitire, ni babadyaka mu mabbuusu paka eizo. 4 Neye era, bangi kwabo ababbaire awo abawuliire ebibono oPeetero ebiyalaabbiire abaikiririirye omu Yesu, era kwolwo obungi bwʼabaikirirya ni bweyongera paka ooti 5,000, nga tobaliireku abakali.

5 Oku lunaku olwairireku, abafugi bʼaBayudaaya nʼabantu abakulu omwigwanga, nʼabakugu omu byʼaMateeka ga Musa, ni bakumbaanira omu kibuga e Yerusaalemi. 6 Omu bikonge ebyabbairewo niimwo omwabbaire Anasi okabona akira obukulu eyawuumwire, nʼoKayaafa eyabbaire okabona akira obukulu eyabbaireku ebiseera ebyo, nʼabakabona abandi babiri, oYokaana nʼErigizanda, nʼabasaiza abandi abʼomu lulyo lwa kabona akira obukulu. 7 Ni beetesya oPeetero nʼoYokaana, ni babeemererya omu maiso gʼakakiiko akakulu akʼabanadiini, ni batandiika okubabuulya ebibuulyo bati, “Okwaba okulamya omusaiza oyo, mwamulamiirye mu bwezye bwani? Ooba naani eyabawaire olukusa okukola ekyo?”

8 Awo oPeetero, ngʼaizwire amaani ga Mwoyo oMweru, nʼabairamu ati, “Basebo bafugi baiswe, era abantu abakulu omwigwanga lyaiswe. 9 Abba ngʼolwatyanu lunu mutuwozesya lwʼekikole ekisa ekitukolere eeri omuntu abbaire omunialuuki, na kutubuulya ngeri egyalamiremu, 10 aale inywe nywenanywena nʼabantu bʼomwIsirairi abandi bonabona mukimanye muti bwezye bwa Yesu oKurisito owʼe Naazaleesi, inywe ogumwakomereire oku musalabba neye oKibbumba nʼamuzuukiza, niibwo obulamirye omusaiza onu. Era kagira ayemereire omu maiso gaanywe nga mwomi piri. 11 OYesu oyo niiye eBiwandiike ogubitumulaku biti:

13 AbʼoLukiiko owebaboine oPeetero nʼoYokaana nga bakalu bʼamaiso, era nga bakitegeireku bati bonabona bantu ba buliijo abatali bakugu omu byʼediini, ni kibeewunyisya ino, neye oluzwanyuma ni kibaizira kiti kaisi ababiri abo batambulanga nʼoYesu. 14 Nʼolwakubba babbaire beeboneraku omusaiza, eyabbaire omu kaseera ako ayemereire awo ampi nʼoPeetero nʼoYokaana, ngʼoweyabbaire alamire, ni bakayaku ekyʼokubavunaana. 15 Niiwo okulagira abo abebawozesya bawuluke omu Lukiiko. Owebamalire okubawuluca, abʼoLukiiko ni beegeyamu oku Peetero nʼoYokaana, nga webeebuulya bati, 16 “Twakola tutya okubonereza abantu banu? Ekisooka-obusooki, ekyewunyo ekyʼamaanimaani ekyo ekibakolere kimalire okumanyikana kumpi omu bʼe Yerusaalemi bonabona kale titwezya kukyegaana! 17 Koizi ekitubba tukole, tulabule basaiza banu kutairayo okutumula na muntu yenayena ooba okwegesya omu liina eeryo, amo ni twezya okulobeesererya ebikwata kwekyo ekibakolere okweyongera okusalaana omu bantu.”

18 Batyo ni beetesya oPeetero nʼoYokaana, ni babalagira okutairayo okutumula, ooba okwegesya omuntu yenayena omu liina lya Yesu, waire ebimukwataku. 19 Okubairamu, oPeetero, ngʼali aamo nʼomwinaye oYokaana, nʼabairamu ati, “Inywe nywena abanyere kaabbo mwesalirewo ku binu ekisaaniire okukola omu maiso ga Kibbumba; kugondera niiye ooba niinywe? 20 Ekyo kityo olwakubba, mpaawo ngeri iswe egitwezya okutatumula kwebyo ebitweboneireku nʼagaiswe ngʼoYesu akola era nʼebyo ebitwawuliire ngʼayegesya.”

21 Awo oluzwanyuma lwʼokubatiisyatiisya, ni babateera, olwo-so nga bakayire ensonga etegerekeka egibababonerezeraku ni batakayula abantu, olwakubba abantu bonabona ababbaire awo babbaire bali mu kuwuuja Kibbumba olwʼekyo ekyakolere. 22 Omusaiza oyo nago ogubalamirye omu ngeri eyʼekyewunyo yabbaire wʼemyanka egibita omu 40.

23 Owebamalire okubateera, oPeetero nʼoYokaana ni bairayo eeri abanaabwe, ni babakobera byonabyona abakabona abakulu, aamo nʼabantu abakulu omwigwanga abandi ebibabakobere. 24 Owebawuliire ebyo, bonabona omu bumo, ni beegairira oKibbumba nʼebibono binu bati, “Musengwa oKirabyonabyona, iwe eyabbumbire eigulu, nʼekyalo, nʼenyanza, era nabuli kintu ekibirimu. 4:24 Kuz 20:11; Nek 9:6; Zab 146:6 25 Ngʼobitira omu Mwoyo oMweru, watumuliire omu zeiza waiswe era omuweereryawo okabaka Dawudi, nʼokoba oti:

27 “Era omu butuuce kityo wekyabbaire; okabaka oKerode nʼoPontiyo Piraato nʼaBatali Bayudaaya, era nʼaBaisirairi beekumbaaniirye omu kibuga kinu ni basala olukwe okulwanisya omuweereryawo omweru, oYesu, oguwasukireku amafuta. 4:27 Mat 27:1-2; Mak 15:1; Luk 23:1,7-11; Yok 18:28-29 28 Omu kukola ekyo, ni batuukirirya ekyo iwe ekiwabbaire omalire okutegeka omu bwezyebwo, ngʼowewatakire. 29 Aale atyanu Musengwa, olingirire omu kutiisyatiisya okubakolere, oyezyesye abaweereryabo okutumula ekibonokyo nʼobugumu anambula kwezizyazizya. 30 Olage amaanigo olamye abantu, era nʼebyamagero tubikole omu liina lya muweereryawo omweru oYesu.”

31 Owebamalire okwegairira oKibbumba, ni wabbaawo okutengeeta omu kifo omu babbaire bakumbaaniire. Bonabona ni baizula oMwoyo oMweru, era ni batandiika okutumula ekibono kya Kibbumba nʼobugumu.

32 Ebiro ebyo, abaikirirya ba Kurisito bonabona babbaire mu bumo era nga bʼenseega moiza. Mpaawo kadi moiza mwibo eyakobanga ati ekintu kirebe ekyali nakyo kikye-kububwe iye yenkani, wazira ngʼakitwala ngʼekyʼokukolesya nʼokugasa nʼabainaye abandi bonabona. 4:32 Bik 2:44-45 33 Nʼamaani mangi, abatume ni bakakasa okuzuukira kwa Musengwa waiswe oYesu, era bonabona oKibbumba nʼababbeeranga ino. 34 Buli moiza kwibo yasunanga ebiyeetaaganga, olwakubba abaabbanga nʼebigona ooba nyumba bagitundangamu, empiiya egyazwangamu 35 ni bagiwaayo eeri abatume, abatume ni bagigabira buli muntu okusinzirira oku kwetaaga okuyaabbanga nakwo.

36 Omu ngeri eyo, nʼomusaiza oMuleevi ogubeeta bati Yusufu omutyami wʼe Kupulo, abatume ogubabbaire bakaliryeku erya Bbalunaba, amakulu gaalyo, Airyamu abantu amaani, 37 nʼatunda ekigonakye, empiiya egyazwiremu nʼagitwala nʼagikwatisya abatume.