71
ङए भों नुयामा ङलाइ आपिद्
1 ओ याहवेह, ङ ग्वार योंबर क्हिए प्हलेर खइमुँ;
ङ खोंयोंइ फापिल् आत्हुरिगे!
2 क्हि ठिक निसाफ लबै परमेश्वर ग,
छतसि आछ्याँबै सैमैंउँइँले फ्रेमिंसि ङलाइ जोगेमिंन्,
ह्रोंसए न्ह ङ ङाँइ तोमिंनु धै ङ जोगेमिंन्!
3 ङ क्हि ङाँर खरिमा
ङए शत्तुरमैंइ ङ आस्यारिगे बिसि ङ रक्षा लमिंबै पारा तमिंन्।
ङलाइ जोगेबर ल्हैदिद्,
तलेबिस्याँ क्हि ङए ङ रक्षा लमिंबै पारा नेरो किल्ला ग।
4 ओ ङए परमेश्वर, दुष्टए योमैंउँइँले ङ फ्रेमिंन्,
दयाम्हाँया आरेबै अनिया लबै म्हिउँइँले ङ जोगेमिंन्।
5 तलेबिस्याँ, ओ याहवेह परमेश्वर, ङइ क्हिए फिर आशा लइमुँ,
ङ फ्रेंसि तब् ओंनोंन् ङइ क्हिए फिर भर थेंइमुँ।
6 फिब् ओंनोंन् ङइ क्हिए फिर भर लइमुँ;
ङए आमाए प्होउँइँले तेमिंब क्हिन् ग।
छतसि खोंयोंन् बिलै ङ क्हिए मिं थेब् लरिब्मुँ।
7 ल्हें म्हिए ल्हागिर ङ आछ्याँबै ताँ तल् खाँब्मुँ बिबै चिनु तइमुँ,
दिलेया क्हि ङए भोंबै ग्वार योंबै क्ल्ह्यो तइमुँ।
8 ङए सुँइ क्वे प्रिंसि क्हिए मिं थेब् लरिमुँ,
धै त्हिंइतिमिन् ङइ क्हिए थेबै मिंए बारेर बिप्रम्।
9 खेब् तबै त्हेर ङलाइ आपिदु,
ङए भों नुयामा ङलाइ आवाथेंन्।
10 तलेबिस्याँ ङए शत्तुरमैंइ ङए बिरोधर ताँ लम्,
ङलाइ सैल् म्हैब्मैं खेंमैंए न्होंर छ बिसि मत लम्,
11 “परमेश्वरजी चलाइ पिवाइमुँ;
छतसि चलाइ ल्हाबोसि क्हाद्,
तलेबिस्याँ चलाइ जोगेब खाबै आरे।”
12 ओ परमेश्वर, ङ ङाँइँले ह्रेंगो आतमिंन्;
ओ ङए परमेश्वर, ङ ल्होबर युनन् युमिंन्!
13 ङ छ्याब् ल्हैदिब्मैं फा पिसि मेब्रो तयारिगे;
ङए न्होह्रों लल् म्हैब्मैं
फापिन् तसि लि उँइँल् आखाँरिगे।
14 दिलेया ङ बिस्याँ खोंयोंन् बिलै क्हिए फिर आशा लरिब्मुँ,
धै क्हिलाइन झन् थेब् लब्मुँ।
15 क्हिजी लबै ठिक केमैं
नेरो क्हिजी ङ जोगेमिंबै बारेर
त्हिंइतिमि ङए सुँइ पोंब्मुँ।
दिलेया च केमैं कति मुँ बिब ङइ आसे।
16 ओ याहवेह परमेश्वर, क्हिजी लबै शक्ति मुँबै केमैं ङ बिप्रब्मुँ,
क्हिजी लबै ठिक निसाफमैं मत्त्रे ङ बिप्रब्मुँ।
17 ओ परमेश्वर, ङ फ्रेंसि तब् ओंनोंबै क्हिजी ङलाइ लोमिंइमुँ,
छतसि क्हिजी लबै औदिबै केमैंए बारेर तिंयाँबै त्हिंइ समा ङइ बिप्रइमुँ।
18 ओ परमेश्वर, चु पुस्ता नेरो लिउँइ खबै ताँन् पुस्तामैंने
क्हिजी लबै शक्ति मुँबै केमैं आबिन् समा
ङ खेब् तसि ङए क्र सारयामैं या ङलाइ आपिद्।
19 ओ परमेश्वर, क्हिजी लबै ठिक निसाफ
मु समा फेनेम्,
क्हिजी थेबै केमैं लइमुँ।
ओ परमेश्वर, क्हि धों तब खाब् मुँ?
20 क्हिजी ङए फिर ल्हें दुःखमैं खल् पिंइ,
दिलेया क्हिजी ङ धबै सोगों लमिंब्मुँ,
पृथ्बीए न्होंउँइँले* 71:20 पृथ्बीए न्होंउँइँले मतलब, सिसि ह्याल् त्हुबै क्ल्ह्योउँइँले
क्हिजी ङ धबै कैंडो पखब्मुँ।
21 क्हिजी ङए मान बडिमिंब्मुँ,
धै ङए सैं धबै क्होमिंब्मुँ।
22 ओ ङए परमेश्वर, क्हि भर लल् खाँबै परमेश्वर तबइले
ङ बीणा ह्रादै क्हिन् थेब लब्मुँ।
ओ इस्राएलर्बै पबित्र परमेश्वर,
सारङ्गी ह्रासि ङ क्हिलाइन थेब् लबै क्वे प्रिंब्मुँ।
23 क्हिलाइ थेब् लबै क्वेमैं प्रिंमा
ङए म्हदेमैं सैं तोंसि ओरब्मुँ,
तलेबिस्याँ क्हिजी ङ जोगेमिंइमुँ।
24 ङए न्होह्रों लल् म्हैब्मैं
फापिसि खैला तोला तबर फेइमुँ,
छतसि ङए लेइ त्हिंइतिमिंन् क्हिजी लबै ठिक केमैंए बयन लब्मुँ।