1 “ङए ल्हागिर खेगि (पुजारि) के लरिगे बिसि इस्राएलीमैंए म्हाँजोउँइँले क्हिए आघें हारून नेरो चए च्हमैं नादाब, अबिहू, एलाजार नेरो इताममार क्हि ङाँर हुइद्। 2 क्हिए आघें हारूनए ल्हागिर बेल्‍ले छ्याँब नेरो इजेत तबै खेगिइ खिबै क्वें टुमिंन्। 3 ‘हारूनइ खेगि के लबै ल्हागिर खेगिइ खिबै क्वें टुमिंन्,’ बिसि ङइ क्वें टुबर लोमिंब्मैंने बिद्। च क्वें खिसि चइ ङए सेवा लरिगे। 4 क्हिए आघें हारून नेरो चए च्हमैं खेगि तसि ङए सेवा लबै ल्हागिर च क्वें टुब्मैंइ चमैंए ल्हागिर चु पबित्र क्वें टुमिंरिगे:

6 “च क्वें टुब्मैंइ एपोद टुमा मारा, मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वेंल छेनाले टुरिगे। 7 च क्वेंमैं जोड्दिबै ल्हागिर काँदए छेउ ङ्हिंर फैसों ङ्हिं तल् त्हुम्। 8 फिर खिबै फगि एपोद टुबै क्वेंउँइँलेन् मारा, मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वेंल टुल् त्हुम्।

9 “इस्राएलए च्हमैंए मिं आनिक्स बिबै युँमा ङ्हिंर प्ह्रिद्। 10 च्ह थेबइले सुरु लसि च्ह टुए मिं आनिक्स बिबै युँमा घ्रिर खोप्दिसि प्ह्रिद्, अरू च्ह टुए मिं अर्को आनिक्स बिबै युँमार खोप्दिसि प्ह्रिद्। 11 युँमार खोप्दिल् ह्रब्मैंइ खैले खोप्दिमुँ, छलेन् युँमा ङ्हिंर इस्राएलए च्हमैंए मिं खोप्दिद्। झाइले च युँमा माराए के लबै म्हिने जोड्दिबर ल्हैदिद्। 12 इस्राएलए च्हमैं मैंबै ल्हागिर च युँमा ङ्हिं एपोदए प्हैंदर च्योमिंन्। झाइले याहवेहजी खोंयोंन् बिलै मैंरिगे बिसि चमैंए मिं हारूनइ ह्रोंसए प्हैंदर नोरिगे। 13 झाइले क्हिइ मारा तोबै धिं ङ्हिं बनेद्। 14 छो धोंले ख्रिंबै छ्याँबै माराए सिक्रि ङ्हिं बनेद्, धै च ख्रिंबै सिक्रि मारा तोबै धिंर जोड्दिद्।

15 “निसाफ लबै म्हिए ल्हागिर छेनाले टुल् ह्रबै म्हिए लहागिर तिंर खिबै क्वें बनेद्। एपोद बनेब् धोंलेन् मारा, मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वेंल टुल् त्हुम्। 16 च क्वें चार पाटे नेरो ङ्हिबाताले टुल् त्हुम्। च बित्ता घ्रि ह्रिंब, बित्ता घ्रिन् प्ल्हाब तल् त्हुम्। 17 चर मणिजगोए प्लिउलो ल्हस्यार लसि मणिमैं जोड्दिद्। ओंसोबै ल्हस्यारर मानिक, पुष्‍पराज नेरो बेरुज झोंन् 18 ल्हस्यार ङ्हिंर फिरोजा, निर नेरो पन्‍ना झोंन्, 19 ल्हस्यार सोंर नीलमणि, हाकिक नेरो कटेलाल झोंन्, 20 ल्हस्यार प्लिर पितमणि, आनिक्स नेरो बिल्‍लौर झोंन्। चु ताँन् मारा तोबै धिंजरे बोसि जोड्दिद्। 21 इस्राएलए कुल ङो सेबै ल्हागिर च च्युसे ङ्हिं मणिर याकूबए च्युसे ङ्हिं च्हमैंए मिं घ्रि-घ्रिले खोप्दिद्।

22 “तिंर खिबै क्वेंए ल्हागिर छो धोंले ख्रिंबै छ्याँबै माराए सिक्रिमैं बनेद्। 23 माराए रिंङ ङ्हिं बनेसि तिंर खिबै क्वेंए कुना ङ्हिंर च्योमिंन्। 24 च माराए सिक्रि ङ्हिं तिंर खिबै क्वेंए छेउ-छेउर मुँबै रिंङ ङ्हिंर जोड्दिद्। 25 च सिक्रि ङ्हिंए च्हो ङ्हिं बिस्याँ मारा तोबै धिंर जोड्दिसि एपोदए काँदर्बै फैसोंए ओंसों खिद्। 26 धबै माराए न्ह ङ्हिं बनेसि तिंर खिबै क्वेंए न्होंर्बै कुना ङ्हिंर एपोदए ङाँर जोड्दिद्। 27 धबै माराए न्ह ङ्हिं बनेसि एपोदए उँइ हार काँद ङ्हिंर्बै फैसोंए न्होंउँइँले नेरो एपोदए फिर खिबै फगिए फिर्बै सिउनिर जोड्दिद्। 28 तिंर खिबै क्वें एपोदउँइँले आसर्दिरिगे बिसि तिंर खिबै क्वें रिंङउँइँले एपोदए रिंङजगोर मु रङर्बै फित्ताइ फगिर फैद्।

29 “हारून पबित्र क्ल्ह्‍योर होंमा चइ इस्राएलए कुलए मिं खोप्दिबै तिंर खिबै क्वें खिब्मुँ धै ङ याहवेहजी ङए म्हिमैं मैंरिब्मुँ। 30 तिंर खिबै क्वेंर ऊरीम नेरो तुम्मिम थेंन्। हारून ङए ओंसों खब्रें लमा चए तिंर खिबै क्वें तल् त्हुम्। छले हारूनइ इस्राएलीमैंए ल्हागिर ङए इच्छा तो मुँ च छेनाले था सेल् खाँब्मुँ।✡ 28:30 गन्ती २७:२१; व्य ३३:८; एज्रा २:६३; नहे ७:६५

31 “एपोद फिर खिबै क्वें ताँन् मु रङल बनेद्। 32 चर क्र क्ह्‍युबै क्ल्ह्‍यो बनेद्, धै क्र क्ह्‍युबै क्ल्ह्‍यो आट्होरिगे बिसि कारग्युर्ले रोसि घेराए ङाँ सैद्। 33 चए प्ह्रिर्बै ङाँर मु रङ, कलेजी रङ, नेरो ओल्ग्या रुइ अनार बनेसि म्हाँ-म्हाँजोर माराए स्यों च्योमिन्। 34 चए प्ह्रिर्बै ङाँर माराए स्यों नेरो अनार कारग्युले च्योद्। 35 हारूनइ खेगि के लमा च क्वें खिरिगे। च पबित्र क्ल्ह्‍योर ङए ओंसों खमा बैरु त्होंमा स्योंए कै थेब्मुँ धै च सिरिब् आरे।

36 “क्हिइ पबित्र माराए प्लना बनेसि च्यार छाप झोंब् धोंले ‘याहवेहए ल्हागिर पबित्र’ बिसि चर खोप्दिद्। 37 धै चलाइ मु रङए छोइ उँइ तल्‍ले फैसि 38 हारूनए ङ्‍होर खिद्, धै याहवेहए मिंर इस्राएलीमैंइ भेटिमैं पिंमा गल्ति तलेया च दोष हारूनइ नोरयगे बिसि खोंयोंन् बिलै हारूनए ङ्‍होर च ङ्‍होर खिबै सै तल् त्हुम्। छलस्याँ इस्राएलीमैंइ पिंबै भेटिमैं याहवेहजी किंब्मुँ।

39 “प्हले समा फेनेबै ह्रिंग्यो क्वें नेरो क्रेगि छेनाले ख्रिंबै सुति क्वेंल बनेदु। बुट्टा झोंबै रुइन फगि या बनेद्।

40 “क्हिइ हारूनए च्हमैंए ल्हागिर बेल्‍ले मान तबै छ्याँबै लबेदा, फगि, नेरो क्रेगिमैं टुद्। 41 चु क्वेंमैं क्हिए आघें नेरो चए च्हमैं खिमिंसि खेगि के लबर चमैंलाइ त्हाँसि छ्युगु फोद्।

42 “चमैंए ज्यु हुबै ल्हागिर प्हले लिगु समा फेनेल्‍ले सुति क्वेंए न्होंर खिबै क्वें टुद्। 43 चमैंने छ्याब् आतरिगे धै आसिरिगे बिसि हारून नेरो चए च्हमैं पबित्र क्ल्ह्‍योर सेवा लबर ङ ङाँर खमा च क्वें खिरिगे।