1 याहवेहजी मोशाने बिइ, 2 “इस्राएलीमैं न्होंर्बै म्हिमैंए च्ह थेब्मैं नेरो खेदोए ओंसों फिबै त्होब ङल् ग। छतसि ङलाइ पिंन्।”✡ 13:2 गन्ती ३:१३; लूक २:२३

3 झाइले मोशाइ म्हिमैंने बिइ, “क्हेमैं केब्छैं तसि टिबै मिश्र ह्‍युलउँइँले त्होंइ खबै चु त्हिंइ क्हेमैंइ मैंथेंन्, तलेबिस्याँ याहवेहजी ह्रोंसए योए शक्‍तिजी क्हेमैं च क्ल्ह्‍योउँइँले तेइ पखइ। च त्हिंइर प्लेढा झोंबै क्हें आचद्। 4 आबीब* 13:4 आबीब चैत्र म्हैंन म्हैंनर्बै तिंयाँबै त्हिंइर क्हेमैं मिश्र ह्‍युलउँइँले त्होंइ ह्‍यासिन् मुँ। 5 याहवेहजी क्हेमैंने कनानी, हित्ती, एमोरी, हिव्वी नेरो यबूसीमैंए ह्‍युल अथवा ङ्‍हे नेरो क्वे खुदु बगेबै ह्‍यु‍लर पखब्मुँ, च ह्‍युल खीजी क्हेमैंए खेमैंने पिंम् बिसि ओंसों बाछा फैल, छतसि चु म्हैंनर चु चाड म्हाँदिद्। 6 क्हेमैंइ ङिगैं समा प्लेढा आझोंबै क्हें चद्, धै ङिगैंर याहवेहए ल्हागिर चाड म्हाँदिद्। 7 ङिगैं समा प्लेढा आझोंबै क्हें चद्। क्हेमैंए साँद न्होंरै या प्लेढा झोंबै चब सैमैं नेरो सोडामैं म्रोंल् आता; क्हेमैंए ह्‍युलर या आयोंरिगे। 8 च चाड म्हादिबै त्हिंर ‘मिश्रउँइँले त्होंइ खमा याहवेहजी ङए ल्हागिर लमिंबै केमैं मैंबै ल्हागिर चु चाड म्हाँदिब् ग,’ बिसि क्हेमैंइ ह्रोंसए च्हमैंने बिद्। 9 याहवेहजी ह्रोंसए शक्‍तिए योजी मिश्रउँइँले क्हेमैं तेइ पखब् ग। छतसि याहवेहजी पिंबै ठिमर्बै ताँमैं क्हेमैंए सुँर तरिगे बिसि क्हेमैंए ल्हागिर योर नेरो ङ्‍होए ओंसों क्हेमैंलाइ मैंल् लमिंबै चिनु तब्मुँ। 10 बर्ष ह्रोंसे तोक्दिबै त्हेर चु चाड म्हाँदिब्ब्रें लद्।

11 “याहवेहजी क्हेमैं नेरो क्हेमैंए खेमैंने कसम चसि क्रें (बाछा) लब् धोंले कनानीमैंए ह्‍युलर क्हेमैंलाइ बोसि च ह्‍युल क्हेमैंलाइ पिंसि। 12 क्हेमैं ताँनइ च्ह थेब याहवेहलाइ पिंन्। क्हेमैंए खेदोमैंइ ओंसों फिबै त्होबामैं या ताँन् याहवेहए ल्हागिर्न तब्मुँ।✡ 13:12 प्रस ३४:१९-२०; लूक २:२३ 13 दिलेया गदाए ओंसों फिबै प्हसेलाइ क्यु प्हसे घ्रि पिंसि खामिंन्। छले आखाबिय्याँ चए खरि चोमिंन्। ह्रोंसए च्हमैं न्होंर च्ह थेबै या खाल् त्हुम्। 14 प्हँना लिउँइ क्हेमैंए च्हमैंइ तले छ लब् जा बिसि क्हेमैंने ङ्योए बिस्याँ, च त्हेर क्हेमैंइ चमैंने छले बिद्, ‘याहवेहजी ङिलाइ केब्छैं तसि टिल् त्हुबै मिश्र ह्‍युलउँइँले ह्रोंसए शक्‍तिए योजी तेइ पखमिंइ। 15 च त्हेर फारोइ सैं सारो लसि ङिलाइ ह्‍याल् आपिं, छतमा याहवेहजी मिश्रर ताँन् म्हि नेरो खेदोए ओंसों फिब्मैं सैवाइ। छतसि ओंसों फिबै त्होबामैं याहवेहए ल्हागिर ख्रो पिंमुँ, धै ङए च्हमैं न्होंर्बै च्ह थेबलाइ या ख्रो पिंसि खाम्। 16 चु याहवेहजी ङिलाइ ह्रोंसए शक्‍तोए योजी मिश्रउँइँले तेइ पखमिंइ बिसि क्हेमैंए ल्हागिर योर मुँबै चिनु, नेरो ङ्‍होर मुँबै चिनु घ्रि तब्मुँ।’ ”

17 फारोइ च म्हिमैं ह्‍याल् पिंमा पलिश्तीमैंए ह्‍युलए घ्याँउँइँले ह्‍यामा रिन्ठि तलेना परमेश्‍वरजी चमैंलाइ च घ्याँउँइँले आपख। तलेबिस्याँ “चु म्हिमैंइ ल्हडें म्रोंसि मिश्रर्न एह्‍यालै,” बिसि परमेश्‍वरजी बिल। 18 छतसि परमेश्‍वरजी चमैंलाइ स्युरसि म्हि आटिबै क्ल्ह्‍योए घ्याँउँइँले ओल्ग्या मा ङ्युँइर† 13:18 ओल्ग्या मा ङ्युँइर हिब्रू क्युइरि, काँसए घारि मुँबै मा ङ्युँइ। चए अर्थ सों मुँल: (१) पृथ्बी म्हाँजुर्बै मा ङ्युँइ नेरो सुएज मा ङ्युँइ म्हाँजोर तालमैं। च क्ल्ह्‍योरि मोशा नेरो इस्राएलीमै ह्‍याल। (२) खोंयों खोंयों छिए समुन्द्रए अर्थ सुएज मा ङ्युँइ मुँल। (३) खोंयों खोंयों छिए समुन्द्रए अर्थ अकबाए समुन्द्रए मुँल। बोमा। इस्राएलीमैं ल्हडें लब् तयार तरिगे बिसि मिश्रउँइँले त्हों ह्‍याइ।

19 ओंसों ओंसों योसेफइ इस्राएलीमैंने “परमेश्‍वरजी क्हेमैंए ल्हागिरि क्‍ह्रोसेन्ले ल्होमिंब् मुँ। च त्हेर क्हेमैंइ ङए ह्रुइबमैं छुउँइँले बोयाद्,” बिसि चु ताँर कसम चबर ल्हैदिल। छतसि मोशाइ योसेफए ह्रुइबमैं बोसि ह्‍याइ।✡ 13:19 उत ५०:२५; यहो २४:३२

20 इस्राएलीमैं सुक्‍कोतउँइँले ह्‍याबै लिउँइ म्हि आटिबै क्ल्ह्‍योए ङाँर एथाम् बिबै नाँसर प्ह्रों बनेसि बास टिइ। 21 झाइले चमैं त्हिंइ म्हुँइँस प्रल् खाँरिगे बिसि चमैंलाइ घ्याँ तेंबर याहवेह त्हिंइर न्हाँम्स्योए त्हो, नेरो म्हुँइँसर मिए राब तसि चमैंए ओंसों-ओंसो ह्‍यामल। 22 छले परमेश्‍वर त्हिंइर न्हाँम्स्योए त्हो तसि, धै म्हुँइँसर मिए राब तसि म्हिमैंए ओंसों-ओंसों ह्‍याब खोंयोंन् बिलै आपि।