1 याहवेहजी धबै मोशाने बिइ, “फारो ङाँर ह्‍यासि चने ‘ङए म्हिमैं ङए सेवा लबर ह्‍याल् पिंन् बिसि हिब्रूमैंए याहवेह परमेश्‍वरजी बिइमुँ,’ बिद्। 2 ‘क्हिइ अझै चमैंलाइ ह्‍याल् आपिंल्‍ले क्वेइ थेंस्याँ 3 क्हिए खेदोमैं, घोडा, गदा, सलु (ऊँट) म्येमैं नेरो र-क्युमैं फिर ङइ ङ्हिंन् ङ्हाँबै नब छब तल् लवाब्मुँ। 4 दिलेया ङइ इस्राएलीमैंए खेदोमैं नेरो मिश्रीमैंए खेदोमैं फेलब्मुँ। धै इस्राएलीमैंल खेदोमैं घ्रि या सिरिब् आरे। 5 ङइ प्हन्हाँगन् चु के लब्मुँ बिसि त्हे तौदिइ,’ बिसि फारोने बिद।”

6 चए प्हँन्हाँग्धों याहवेहजी च के लइ, धै मिश्रर्बै खेदोमैं ताँन् सिइ, इस्राएलीमैंल बिस्याँ खेदो घ्रि या आसि। 7 फारोइ चजरे ङ्‍ह्‍योबर म्हिमैं कुलमा इस्राएलीमैंल खेदोमैं घ्रि या सिब चमैंइ आम्रों। छान् तलेया फारोए सैं सारो तरिसि चइ म्हिमैं ह्‍याल् आपिं।

8 च लिउँइ याहवेहजी मोशा नेरो हारूनने बिइ, “कोदाउँइँले ह्रों-ह्रोंसए मुट्ठि तिगों मेब्रो किंनु, धै मोशाइ फारोए ओंसों च मेब्रो मुउँइ टाँमिंरिगे। 9 च मेब्रो ताँन् मिश्रर त्हुल तसि मिश्रर्बै ताँन् म्हिमैं नेरो खेदोमैंए ज्युर पोर तयाब्मुँ।”

10 छबिमा चमैं कोदार्बै मेब्रो किंसि फारोए ओंसों रासि मोशाइ च मेब्रो मुउँइ टाँमिंइ, धै म्हिमैं नेरो खेदोमैंए ज्युर पोरमैं त्होंखइ।✡ 9:10 दर्शन १६:२ 11 जादु लब्मैं पोरइ लमा मोशाए उँइँर राल् आखाँ। तलेबिस्याँ जादु लब्मैंए ज्युर नेरो मिश्रीमैं ताँनए ज्युर पोर खल। 12 दिलेया याहवेहजी फारोए सैं सारो लमिंइ, धै याहवेहजी मोशाने बिब् धोंले मोशा नेरो हारूनए ताँ चइ आथे।

13 याहवेहजी धबै मोशाने बिइ, “प्हन्हाँग न्हाँकर्न रेसि फारो ङाँर ह्‍यासि चने, ‘ङए सेवा लबर ङए म्हिमैं ह्‍याल् पिंन्!’ बिसि हिब्रूमैंए याहवेह परमेश्‍वरजी बिइमुँ बिद्। 14 ‘ह्‍याल् आपिंस्याँ चु लार ङइ क्हिए फिर, के लब्मैंए फिर नेरो म्हिमैंए फिर बेल्‍ले थेबै दुःखमैं कुलब्मुँ। छले पृथ्‍बीर ङ धोंबै परमेश्‍वर खाबै आरे बिसि क्हिइ सेब्मुँ। 15 ङइ ह्रोंसए यो स्योंसि क्हि नेरो क्हिए म्हिमैं नल् लवास्याँ क्हि चु पृथ्‍बीउँइँले नास तयामल, 16 दिलेया ह्‍युल तिगोंन् ङए मिं बिप्ररिगे धै ङए शक्‍ति क्हिइ म्रोंल् खाँरिगे बिसि ङइ क्हिलाइ सोगों थेंइमुँ।✡ 9:16 रोम ९:१७ 17 अझै या क्हि थेब् प्हैंसि ङए म्हिमैं ह्‍याल् आपिंब्मुँ। 18 छतसि प्हन्हाँग चु त्हेर्न ङइ बेल्‍ले थेबै तिस्यु कुलब्मुँ। च्हौ थेबै तिस्यु मिश्र ह्‍‍युलर तोगो समा आयुइमुँ। 19 छतसि “खेदोमैं नेरो बैरु मुँबै ताँन् सैमैं युना न्होंर झोंन्!” बिबर म्हिमैं कुलद्, तलेबिस्याँ धिं न्होंर आझोंल्‍ले बैरुन् वाथेंबै म्हिमैं नेरो खेदोमैं तिस्युइ ह्रासि सियाब्मुँ।’ ”

20 धै फारोए के लब्मैं न्होंरि याहवेहजी बिबै ताँने ङ्हिंब्मैंइ ह्रों-ह्रोंसए केब्छैंमैं नेरो खेदोमैं धिं न्होंर झोंइ। 21 दिलेया याहवेहजी बिबै ताँने आङ्हिंब्मैंइ ह्रों-ह्रोंसए केब्छैंमैं नेरो खेदोमैं बैरुन् टिल् पिंइ।

22 झाइले याहवेहजी मोशाने बिइ, “क्हिए यो मुउँइ स्योंन्, धै मिश्र तिगोंन् तिस्यु युसि मिश्रर्बै म्हि, खेदो, म्रोंर म्‍लोबै ताँन् सैमैं तिस्युइ ह्रारिगे।” 23 झाइले मोशाइ ह्रोंसए प्हरे मुउँइ स्योंमा याहवेहजी मु ङ्‍हेल् लवासि पृथ्‍बीर काम्‍लि-तिम्‍लि रासि मिश्रर ङ्हिंन ङ्हाँबै तिस्यु कुल्मिंइ। 24 तिस्यु युसि काम्‍लि-तिम्‍लि राइ। छाबै तिस्यु मिश्र ह्‍युलर ओंसों खोंयोंइ आयुल!✡ 9:24 दर्शन ८:७; १६:२१ 25 ताँन् मिश्ररर्बै बैरु मुँबै म्हि नेरो खेदो तिस्युइ प्रुइ। तिस्युइ म्रोंर म्‍लोबै सैमैं नेरो सिंधुँमैं तोइ आचैन् लवाइ। 26 दिलेया इस्राएलीमैं मत्‍त्रे टिबै गोशेन ह्‍युलर तिस्यु आयु।

27 छतमा फारोइ मोशा नेरो हारून हुइसि “चु लारै ङइ पाप लइ,” बिइ। “याहवेहजी ठिक लइमुँ, ङ नेरो ङए म्हिमैंज्यै आछ्याँबै केमैं लइमुँ! 28 छतसि याहवेहने प्राथना लमिंन्, तलेबिस्याँ चु मु ङ्‍हेब नेरो तिस्युइ सारुन् लइ। ङइ क्हेमैं ह्‍याल् पिंब्मुँ। तारे क्हेमैं अझै चुर टिल् आत्हु।”

29 मोशाइ म्रुँने बिइ, “ङ सहरउँइँ त्होंह्‍याबै तोंदोंन् ङइ याहवेह ङाँइ ह्रोंसए यो स्योंब्मुँ, झाइले मु ङ्‍हेब नेरो तिस्यु युब टियाब्मुँ। छले पृथ्‍बी याहवेहलन् ग बिसि क्हिइ सेब्मुँ। 30 दिलेया क्हि नेरो क्हिए के लब्मैंइ बिस्याँ तोगो समा याहवेह परमेश्‍वरने आङ्हिंइमुँ बिसि ङइ सेइमुँ।”

31 नाँ त्होंबै जौ नेरो सारबै सनपाटर तिस्युइ प्रुवाल। 32 दिलेया गहुँ बिस्याँ तिस्युइ आप्रु तलेबिस्याँ गहुँल नाँमैं आत्होंल।

33 झाइले मोशा फारो ङाँइले त्होंसि सहर बैरु ह्‍यासि याहवेह ङाँइ ह्रोंसए यो स्योंमा मु ङ्‍हेब नेरो तिस्यु युब टियाइ, धै नाँ या टियाइ। 34 दिलेया फारोइ नाँ तिस्यु नेरो मु ङ्‍हेब टियाब् म्रोंसि फारो नेरो चए के लब्मैंइ सैं सारो लसि धबै पाप लइ। 35 छले फारोए सैं सारो तइ, झाइले याहवेहजी मोशाने बिब् धोंलेन् चइ इस्राएलीमैं ह्‍याल् आपिं।