1 ओ अलि-अङाँमैं, क्हेमैं ठिमर्बै ताँ क्होब्मैंने ङ बिमुँ: म्हिमैं सोगों मुँन् समा मत्‍त्रे ठिमइ के लम् बिब क्‍हेमैंइ आसेइमुँ वा? 2 नमुना घ्रि बिले, ब्ह्‍या लबै च्हमिरिल ह्रोंसए प्युँ सोन् समा ठिमर बिब् धोंले च प्युँनेन् टिल् त्हुम्। दिलेया प्युँ सियास्‍याँ च च्हमिरिलाइ ठिमइ फैल् आखाँ। 3 दिलेया ह्रोंसए प्युँ मुँना-मुँन् अरू मुँयुँने बालु प्रइबिस्‍याँ च ब्यभिचार लबै च्हमिरि तब्‍मुँ। दिलेया प्युँ सियाइबिस्‍याँ च च्हमिरि ठिमए न्होंर टिल् आत्हु। झाइले अर्को मुँयुँने बालु ब्ह्‍या ललेया चए फिर ब्यभिचारए छ्याब् आल्‍हैदि।

4 छतसि ओ ङए अलि-अङाँमैं, सिबउँइँले धबै सोगों तबै ख्रीष्‍टए ज्युने घ्रिन् तसि परमेश्‍वरए सैंर मैंब् धोंले लल् खाँरिगे बिसि ख्रीष्‍ट सिब् धोंलेन् क्हेमैं या ठिमए लेखि सिइमुँ। 5 ओंसों ङ्यो पाप लदै छ्ह थोरिल, छतसि कालए सुँर फेनेबै आछ्याँबै केमैं लबर ठिमइ भों पिंसि पाप लदा ङ्हाँबै सैं खसि ङ्योइ ज्युर आछ्याँबै के लमल। 6 दिलेया तारे ङ्योलाइ फैथेंबै ठिमए लेखि ङ्यो सियाइमुँ। छतसि ङ्यो ठिमइ बिब् धोंले ओंसोंबै तरिकाले आङिं, परमेश्‍वरए प्ल्हजी लोमिंब् धोंले छारा तरिकाले सेवा लम्।

7 छ बिस्‍याँ ङ्यो तो बिले? ठिमन् पाप वा? कत्ति आङिं! ठिम आरेस्याँ ङइ पाप बिब तो जा बिसि आसेमल, तलेबिस्याँ ठिमइ “लोब आलद्” आबिस्‍याँ ङइ लोब लब तो जा बिसि आसेमल,✡ 7:7 प्रस २०:१७; व्य ५:२१ 8 दिलेया ठिमइ “लोब आलद्” बिबइले ङए आछ्याँबै इच्‍छाइ मौका च्ह्‍यासि ङए सैंइ ल्हें खालर्बै लोब खल् पिंमल, तलेबिस्याँ ठिम आरेबै त्हेर आछ्याँबै केमैं ललेया ङइ आछ्याँबै के लइ बिसि ङइ आसेमल। 9 ठिमइ बिबै ताँ आसेमा ङ सोगों मुँल, दिलेया ङइ ठमर्बै ताँ था सेबइले आछ्याँबै इच्छा भोंब तइ, ङ बिस्याँ सिल् त्हुइ। 10 छले छ्ह पिंबै ठिमइ ङलाइ सैवाइ। 11 तलेबिस्याँ पापइ ठिमर्बै ताँउँइँले मौका च्ह्‍यासि ठिमउँइँले ङलाइ लुसि सैवाइ।✡ 7:11 उत ३:१३

12 परमेश्‍वरजी पिंबै ठिम पबित्र मुँ, धै चुइ ठिक ताँ लोमिंम्, म्‍हिमैंए ल्हागिर चु छ्याँब मुँ। 13 छ बिस्याँ छ्याँबै ठिमइ ङलाइन सैवाइ बिब् तम्‍मा? आत! बरु पाप पापए रुपर्न म्रोंरिगे बिसि पापइ छ्याँबै केउँइँले ङलाइ सैवाब् ग। तलेबिस्याँ ठिमइ पाप बेल्‍ले आछ्याँबै सै ग बिसि छेनाले उँइँम्।

14 ठिम पबित्र प्ल्हउँइँले खबै छ्याँबै सै ग बिसि ङ्योइ सेइमुँ, दिलेया ङ ह्रोंसए सैंर मैंब् धोंले आछ्याँबै केमैं लप्रबै म्हि तबइले ङ केब्छैं तयाइमुँ धै चए न्होंर मुँ। 15 ङइ लबै के तले ङइ लरिइमुँ बिसि ङइ था आसे, तलेबिस्याँ ङइ लदा ङ्हाँबै छ्याँबै के आल, बरु लदा आङ्हाँबै आछ्याँबै केन् ङइ लम्।✡ 7:15 गला ५:१७ 16 ङइ लदा आङ्हाँबै आछ्याँबै केमैंन् लइ बिस्याँ ठिम छ्याँब मुँ बिसि ङइ म्हाँदिम्। 17 छतसि आछ्याँबै केमैं लब ङइ आङिं, ङए न्‍होंर्बै पापइ लब् ग। 18 ङए न्होंरि, अथवा ङए ओंसोंबै बानिरि, छ्याँबै सै तोइ आरे बिसि ङइ सेइमुँ। तलेबिस्याँ छ्याँबै के लदा ङ्हाँलेया ङइ च के लल् आखाँ। 19 ङइ लदा ङ्हाँबै छ्याँबै के ङ आल, बरु ङइ लदा आङ्हाँबै आछ्याँबै केन् ङइ लम्। 20 छतसि ङइ लदा आङ्हाँबै केन् लम् बिस्‍याँ च के लब ङ आङिं, बरु ङए सैंर टिबै पापइ लब् ग।

21 छतसि ङइ छले क्होइमुँ: छ्याँबै के लदा ङ्हाँना-ङ्हाँन् ङइ पाप मत्‍त्रे लम्, 22 तलेबिस्याँ ङए सैं घ्रिइ परमेश्‍वरए ठिम म्हाँदिबर बेल्‍ले सैं तोंम्, 23 दिलेया ङ न्होंर्बै अर्को सैंइ ङए सैंइ खोबै ठिमए बिरोध लम्। च बिरोध लबै सैंइ ङलाइ आछ्याँबै इच्‍छाए न्होंर फैवाम्।

24 ओहो, ङ खैबै ङ्‍हो आसबै म्‍हि! ङलाइ सैवाबै आछ्याँबै इच्‍छाए न्होंरउँइँले खाबइ ङ जोगेमिंब् ङ्‍हे? 25 परमेश्‍वरलाइ धन्‍यबाद तरिगे, तलेबिस्याँ प्रभु येशू ख्रीष्‍टजीन् ङ्योलाइ जोगेमिंइमुँ!

छतमा ङए हालत छाबन् ग। ङइ ह्रोंसए सैंइ मत्‍त्रे परमेश्‍वरए ठिम म्हाँदिम्, दिलेया ङए ओंसोंबै बानिइ पापए सेवा लम्।