16
परमेश्वरए ह्रिसए प्हेल ङि
1 झाइले च स्वर्गदूत ङिलाइ स्वर्गउँइँले थेबै कैले छ बिब ङइ थेइ, “ह्याद्, धै प्हेल ङिर मुँबै परमेश्वरए ह्रिस पृथ्बीए फिर युवाद्।”
2 छबिमा ओंसोंबै स्वर्गदूतइ ह्यासि पृथ्बीए फिर ह्रोंसने मुँबै प्हेलार्बै ह्रिस युवाइ। च लिउँइ खेदोए छाप मुँब्मैं नेरो चए कुलाइ पूजा लब्मैंए ज्युर बेल्ले नल् लबै छेरन ङ्हाँबै घामैं खइ।✡ 16:2 प्रस ९:१०
3 झाइले अर्को स्वर्गदूतइ ह्रोंसने मुँबै प्हेलर्बै ह्रिस मा ङ्युँइर युवाइ। छलमा च मा ङ्युँइर्बै क्यु सियाबै म्हिए को धोंन् तयाइ। धै मा ङ्युँइर्बै ताँन् सो प्ह्याबै सैमैं सियाइ।
4 च लिउँइ अर्को स्वर्गदूतइ ह्रोंसने मुँबै प्हेलर्बै ह्रिस स्योंमैं नेरो क्युए मूलमैंर युवाइ। छलमा चर्बै ताँन् क्यु को तयाइ।✡ 16:4 प्रस ७:१७-२१; भज ७८:४४ 5 झाइले ताँन् क्युए फिर हग मुँबै स्वर्गदूतइ छ बिब ङइ थेइ,
“ओ पबित्र परमेश्वर, क्हि ओंसों ओनोंन् मुँल। तोगो या मुँ,
क्हिइ क्ह्रोंसेंन्बै ठिक निसाफ लइमुँ!
6 तलेबिस्याँ पृथ्बीर्बै म्हिमैंइ क्हिए पबित्र म्हिमैं नेरो क्हिए अगमबक्तामैं सैवासि को-कोन् लवाइ।
छतसि चमैंए खि फोबर तोगो क्हिजी चमैंलाइ को थुँल् पिंइमुँ। चु चमैंइ योंल् त्हुबै सजैं ग।”
7 च लिउँइ ख्रो पिंबै क्ल्ह्योइ छ बिब ङइ थेइ,
“ओ ताँन् भन्दा थेबै शक्ति मुँबै याहवेह परमेश्वर,
क्हिजी क्ह्रोंसेंन्बै ठिक निसाफ लमुँ।”
8 झाइले अर्को स्वर्गदूतइ ह्रोंसने मुँबै प्हेलर्बै ह्रिस त्हिंयाँए फिर युवामा त्हियाँइ म्हिमैंलाइ ख्रोंवाबै शक्ति योंइ। 9 छतसि त्हिंयाँ बेल्ले छसि म्हिमैंलाइ ख्रोंवाइ। धै चमैंइ च्हौ थेबै दुःख पिंल् खाँबै परमेश्वरए मिं स्यारइ। दिलेया चमैंइ खेंमैंइ लबै पापउँइँले अझै सैं आए, धै परमेश्वरए मानै या आल।
10 झाइले अर्को स्वर्गदूतइ खीने मुँबै प्हेलर्बै ह्रिस च खेदोए राजगद्दिर युवाइ। छलमा च खेदोए ग्याल्सर मिछु खैयाइ। धै चर्बै म्हिमैं नब छब तसि बेल्ले दुःख योंइ, छतसि चमैंइ ह्रों-ह्रोंसए ले क्रेइ।✡ 16:10 प्रस १०:२१ 11 झाइले चमैंलाइ बेल्ले नल् लबै घा नेरो रुँइ दुःख पिंमा चमैंइ स्वर्गर्बै परमेश्वरए फिर गाल् केइ। दिलेया चमैं खेंमैंइ लबै पापउँइँले अझै सैं आए।
12 झाइले अर्को स्वर्गदूतइ ह्रोंसने मुँबै प्हेलर्बै ह्रिस यूफ्रेटिस बिबै थेबै स्योंर युवाइ। छलमा स्यारउँइँले खबै म्रुँमैंए ल्हागिर घ्याँ तरिगे बिसि च स्यों ङ्हारयाइ।✡ 16:12 यशै ११:१५ 13 झाइले अजिङ्गरए सुँउँइँले, आछ्याँबै खेदोए सुँउँइँले नेरो स्योलिबै ताँ पोंबै अगमबक्ताए* 16:13 स्योलिबै ताँ पोंबै अगमबक्ताए च म्हि ङ्हिंखेबै आछ्याँबै खेदो मुँल, अध्याय १३ पद १४। सुँउँइँले प्हत्गु धों तबै स्यागि म्होंगि सों त्होंह्याब ङइ म्रोंइ। 14 च स्यागि म्होंगि सों औदिबै चिनु मुँबै केमैं लसि उँइँबै प्ल्हमैं ग। चमैं पृथ्बीर्बै ताँन् म्रुँमैं ङाँर ह्याम्, धै ताँन् भन्दा थेबै परमेश्वरजी बिबै त्हिंइर ल्हडें लबर चमैंलाइ खागु लम्।
15 प्रभु येशूजी बिइ, “थेद्, क्हेमैंइ था आसेल्ले ङ ह्यो धोंले युब्मुँ। छतसि न्ह क्रों मि क्रोंले टिबै म्हि ङ्हो सब् ग। ह्रोंस क्लुना तसि म्हिमैंए उँइँर फा पिन् आतरिगे बिसि ह्रोंसए क्वें ह्रोंसनेन् साँथेंम्।”✡ 16:15 मत्ती २४:४३-४४; लूक १२:३९-४०; दर्शन ३:३
16 झाइले च स्यागि म्होंगि सोंइ च ताँन् म्रुँमैं हिब्रू क्युइरि आर-मागेड्डोन बिबै क्ल्ह्योर खागु लइ।✡ 16:16 २ म्रुँ २३:२९; जक १२:११
17 अर्को स्वर्गदूतइ ह्रोंसने मुँबै प्हेलर्बै ह्रिस मुर युवाइ। झाइले मन्दिरर्बै राजगद्दिउँइँले “तारे खाँयाइ!” बिबै थेबै कैइ थेइ। 18 छबिमा काम्लि तिम्लि राइ, थेबै कैमैं थेइ, बेल्ले मु ङ्हेइ धै बेल्ले थेबै सयो खइ। म्हिमैं बनेब् ओंनोंन् छाबै ङ्हिंन् ङ्हाँबै सयो खोंयोंइ आखल।✡ 16:18 दर्शन ८:५; ११:१३,१९ 19 च लिउँइ च थेबै सहर† 16:19 च थेबै सहर बेबिलोन बिब। सोंबाँ तयाइ। झाइले ताँन् ह्युलर्बै सहरमैं नास तयाइ। च त्हेर परमेश्वरजी बेबिलोन बिबै थेबै सहरलाइ मैंइ। छतसि खीए बेल्ले थेबै ह्रिसइ प्लिंबै प्हेल बेबिलोनलाइ थुँबर कर ल्हैदिइ।✡ 16:19 यशै ५१:१७ 20 थेबै सयो खमा मा ङ्युँइर मुँबै कोंमैं नेरो अरू कोंमैं या ताँन् म्हयाइ।✡ 16:20 दर्शन ६:१४ 21 प्लिच्यु-प्लिच्यु किलोर्बै थे-थेबै तिस्यु मुउँइँले म्हिमैंए फिर युइ। छतमा बेल्ले थेबै दुःख तसि म्हिमैंइ परमेश्वरए फिर गाल् केइ।✡ 16:21 प्रस ९:२३; दर्शन ११:१९
✡16:2 16:2 प्रस ९:१०
✡16:4 16:4 प्रस ७:१७-२१; भज ७८:४४
✡16:10 16:10 प्रस १०:२१
✡16:12 16:12 यशै ११:१५
*16:13 16:13 स्योलिबै ताँ पोंबै अगमबक्ताए च म्हि ङ्हिंखेबै आछ्याँबै खेदो मुँल, अध्याय १३ पद १४।
✡16:15 16:15 मत्ती २४:४३-४४; लूक १२:३९-४०; दर्शन ३:३
✡16:16 16:16 २ म्रुँ २३:२९; जक १२:११
✡16:18 16:18 दर्शन ८:५; ११:१३,१९
†16:19 16:19 च थेबै सहर बेबिलोन बिब।
✡16:19 16:19 यशै ५१:१७
✡16:20 16:20 दर्शन ६:१४
✡16:21 16:21 प्रस ९:२३; दर्शन ११:१९