116
ङ याहवेहने म्हाँया लम्
1 ङ याहवेहने म्हाँया लम्,
तलेबिस्याँ ङइ ग्वार ह्रिमा खीजी थेमिंइ।
2 खीजी ह्रोंसए न्ह ङ ङाँइ तोइ,
छतसि ङ सोन् समा खीनेन् ग्वार ह्रिब्मुँ।
3 कालए छोइ ङलाइ फैइ;
क्रोंर्बै दुःख ङ फिर खइ;
दुःख नेरो शोक ङलाइ प्लेइ।
4 “ओ याहवेह, ङए सो जोगेमिंन्!” बिसि
ङइ याहवेहए मिंर प्राथना लइ।
5 याहवेहजी ताँनए फिर दयाम्हाँया लसि ठिक के लम्;
ङ्योए परमेश्वरजी ल्हयो खम्।
6 याहवेहजी आह्र आसेब्मैंलाइ रक्षा लम्;
ङए भों नुयाबै त्हेरैया खीजी ङ जोगेमिंइ।
7 ओ ङए सो, याहवेहजी क्हि छ्याँब लमिंइमुँ,
छतसि धबै तिखे छिं तद्।
8 ओ याहवेह, क्हिजी ङए सो कालाउँइँले फ्रेमिंइमुँ,
ङए मिर मिग्लि युल् आपिंइमुँ,
धै ङए प्हले थुरल् आपिंइमुँ।
9 छतसि ङ सोगोंमैंए ह्युलर मुँन् समा
याहवेहए घ्याँर प्रब् टिब् लल् खाँम्।
10 “ङए फिर ल्हें दुःख तइमुँ,”
बिबै त्हेर खीए फिर ङइ पक्का बिश्वास लइ।✡ 116:10 २ कोर ४:१३
11 धै “ताँन् म्हिमैं स्युर्गु ग!”
बिसि ङ आदेबै त्हेर बिइ।
12 याहवेहजी ङए फिर लबै छ्याँबै केमैंए खि
ङइ खैले फोब् ङ्हे?
13 याहवेहजी ङलाइ जोगेमिंइ, छतसि खीलाइ धन्यबाद पिंबर
ङ अँगुरए प्हा खीए मिंर पिंब्मुँ।
14 याहवेहए ताँन् म्हिमैंए उँइँर
खीने लबै ङए भकलमैं ङ पूरा लब्मुँ।
15 याहवेहए म्हिमैं सिमा
खी बेल्ले न्हुँ लम्।
16 ओ याहवेह, क्ह्रोंसेंन्ले ङ क्हिए केब्छैं ग;
ङ क्हिए केब्छैं ग, क्हिए केब्स्योए च्ह।
क्हिजी ङ सिबउँइँले जोगेमिंइमुँ।
17 ङ क्हिए ल्हागिर धन्यबादए ख्रो पिंब्मुँ
धै याहवेहए मिंर ग्वार ह्रिब्मुँ।
18 याहवेहए ताँन् म्हिमैंए उँइँर,
खीए मन्दिरर्बै ह्युमैंर,
19 ओ यरूशलेम, क्हिए म्हाँजोर,
याहवेहने लबै ङए भकलमैं ङ पूरा लब्मुँ।
याहवेहए मिं थेब् लद्!!