36
क्हिए खोंयोंइ आनुबै म्हाँया कति थेब मुँ
क्वे प्रिंब्मैंए चिबए ल्हागिर याहवेहए सेवा लबै दाऊदए भजन घ्रि
1 दुष्ट म्हिइ लबै आछ्याँबै केमैंए बारेर ङए खोंर ताँ घ्रि मुँ,✡ 36:1 मर्क ७:२०-२३; रोम ३:१८
च ताँ तो जा बिस्याँ च परमेश्वर म्रोंसि आङ्हिं।
2 तलेबिस्याँ चइ ङम् ङन् ग बिसि
ह्रोंसलाइ थेब् लम्,
धै ह्रोंसइ लबै आछ्याँबै केमैं चइ आम्रों; छतसि चइ पाप केमैंन् लरिम्।
3 चए सुँइ स्योलिबै ताँमैं नेरो आछ्याँबै ताँमैं पोंमुँ;
छ्याँबै केमैं लब नेरो केर फेबै ताँमैं पोंब चइ पिवाइमुँ।
4 क्ल्ह्योर रोरिमै या चइ आछ्याँबै चाँजोमैंन् लरिम्;
छतसि च आछ्याँबै घ्याँर्न प्रम्;
छले चइ आछ्याँबै केमैंन् लप्रम्।
5 ओ याहवेह, ङिए फिर क्हिजी लबै खोंयोंइ आनुबै म्हाँया स्वर्ग समा फेनेइमुँ,
क्हिजी बिबै ताँमैं या मु समा भर लल् खाँब मुँ।
6 ओ याहवेह, क्हिजी लबै ठिक के बेल्ले थेबै कोंमैं धों तब् मुँ;
क्हिजी लबै निसाफमैं तो सैज्यै या लाल् आखाँबै मा ङ्युँइए गैरु धों तब मुँ;
क्हिजी म्हिलाइ मत्त्रे आङिं, ताँन् सो प्ह्याबै सैंमैंलाइ वास्ता लम्।
7 ओ याहवेह, क्हिए खोंयोंइ आनुबै म्हाँया बेल्ले थेब मुँ!
ताँन् म्हिमैंइ क्हिए प्ह्यागोमैं न्होंर ग्वार योंम्।
8 क्हिजी पिंसिन् ङिइ म्रेंन्ले चल् योंइमुँ,
स्यों धोंले खोंयोंन् बिलै युरिबै आशिकइ क्हिजी ङिलाइ प्लिंमिंइमुँ।
9 तलेबिस्याँ क्हिउँइँलेन् म्हिमैंइ खोंयोंइ आखाँबै छ्ह योंमुँ,
क्हि चारबै ह्वे ग, छतसि क्हिए छ्याँबै घ्याँर ङि प्रल् योंइमुँ।
10 क्हिलाइ ङो सेब्मैंए फिर क्हिए खोंयोंइ आनुबै म्हाँया खोंयोंन् बिलै तरिगे,
धै छ्याँबै खों मुँब्मैंलाइ खोंयोंन् बिलै ठिक ठर्दिमिंन्।
11 थेब् प्हैब्मैंए प्हलेइ ङलाइ प्लेल् आयोंरिगे,
दुष्ट म्हिमैंए योज्यै या ङलाइ क्हाल् आखाँरिगे।
12 आछ्याँबै के लब्मैं क्हुरयाइमुँ
चमैं रेलै आखाँन्ले प्योयाइमुँ।