12
क्वेंल् खाँब्मैं ताँन् म्हयाइमुँ
क्वे प्रिंब्मैंए चिबए ल्हागिर शिमिनिथ भाकार प्रिंबै दाऊदइ प्ह्रिबै भजन घ्रि।
1 ओ याहवेह, ल्होमिंन्! तलेबिस्याँ क्हिजी बिब् ङिंबै म्हि तारे घ्रि या आचैइमुँ,
म्हिमैंए म्हाँजोर भर लल् खाँब्मैं खाबै आरे।
2 ताँनइ ह्रोंसए ङ्हेब् ट्हुब्मैंने स्योर तेसि पोंम्,
चमैं फिब्लो पार्दिसि स्योर ताँमैं पोंम्।
3 फिब्लो पार्दिसि पोंब्मैं,
नेरो थेब् प्हैंसि पोंब्मैं याहवेहजी थोवारिगे।
4 “ङिइ पोंसि पोंइ चमैंलाइ ट्होब्मुँ,” बिसि चमैंइ बिमुँ।
“ङिए सुँ ङिलन् ग! ङिए फिर खाब् क्ल्हे तल् खाँमुँ?”
5 “आखाँम्मैं लुडिवाइमुँ,
धै ङ्हाँदुमैंइ दुःखए सो हेंइमुँ।
छतसि तारे ङ रेब्मुँ,
धै चमैंए न्होह्रों लब्मैंउँइँले ङइ चमैं जोगेमिंब्मुँ,” बिसि याहवेहजी बिमुँ
6 याहवेहजी फैबै बाछामैं खोट आरेब मुँ,
सए कोदर मिइ ङिखे समा खारिदिबै चाँदि धोंब खीजी फैबै बाछा मुँ।
7 ओ याहवेह, ङिए रक्षा क्हिजी लमिंब्मुँ,
क्हिजी खोंयोंन् बिलै छाबै म्हिमैंउँइँले जोगेसि थेंमिंब्मुँ,
8 आछ्याँबै के लब्मैंलाइ म्हिमैंइ खोम्।
छतसि दुष्ट म्हिमैं ङम् ङन् ग बिब् प्हैंसि ताँनइ म्रोंल्ले प्रम्।