1 “गालील ह्‍युलर्बै को-कोइ म्हिमैंइ यरूशलेम सहरर्बै मन्दिरर परमेश्‍वरए मिंर क्‍यु सैसि ख्रो पिंमा पिलातस बिबै रोमी क्रथेइ चमैंलाइन सैवासि च म्‍हिमैंए को ख्रो पिंबै क्‍युए कोर कोंवाल बिसि च त्‍हेर चर खागु तबै म्हिमैंइ येशूने,” बिइ।

2 छबिमा येशूजी चमैंने बिइ, “चमैंइ छाबै ङ्हिंन् तबै दुःख योंइ बिबर्न अरू गालीलथेंमैं भन्दा चमैं पापि मुँना बिसि क्हेमैंइ मैंल् वा? 3 ङ क्‍हेमैंने बिमुँ, छले आङिं। ताँन् म्‍हिमैं पापिन् मुँ। क्‍हेमैंइ दुष्‍ट के लब् आपिइ बिस्‍याँ क्‍हेमैं या छलेन् नास तब्‍मुँ। 4 झाइले अर्को ताँ, सिलोआम बिबै क्ल्ह्‍योर्बै धरर फुयासि च्युसे प्रे म्‍हि सि‍याल। चमैं या अरू यरूशलेमथेंमैं भन्दा ल्हें पापिमैं तसि सिब् वा? 5 ङ क्‍हेमैंने बिमुँ, छले आङिं, ताँन् म्‍हिमैं पापि मुँ। क्‍हेमैंइ दुष्‍ट के लब् आपिइ बिस्‍याँ क्‍हेमैं ताँन् छलेन् नास तब्‍मुँ।”

6 च लिउँइ येशूजी चु अहान् बिइ, “म्‍हि घ्रिइ ह्रोंसए म्रोंर तुँबु धुँ घ्रि रुँइँल। च धुँर रो रोइ उ बिसि च ङ्‍ह्‍योबर खब्ब्रें लमल। खोंयों खलैया च धुँर रो आरोब् म्रोंसि 7 चइ के लबै म्हिने ‘ङइ चु तुँबु धुँर रो म्‍हैब सोंदिं तइ, दिलेया खोंयोंइ आरो। क्ल्ह्‍यो पैबर तले थेंरिब? छतसि चु धुँ थोवाद्,’ बिइ।

8 “दिलेया के लबै म्हिइ बिइ, ‘ओ चिब, अझै तिदिंदे चु धुँ आथोले। ङइ चु धुँए जरर तासि मला झोंम्। 9 क्‍हुरिमा रो रोइबिस्‍याँ छ्याँबन् तइ, आरोइ बिस्‍याँ थोइ भ्योंवाले।’ ”

10 तिगें प्रिबै त्हिंइर येशू च्हों धिं घ्रिर लोमिंसिन् मुँल। 11 चर मोंइ स्‍यासि नबै च्हमिरि घ्रि मुँल। च मोंइ स्यासि नब च्युसे प्रेदिं तयाल। च क्वार्ग तयल, ठाड्ले प्रल् आखाँमल। 12 येशूजी च च्हमिरि म्रोंइ, धै हुइसि बिइ। “ओ नानि, क्‍हिलाइ ठाड् तल् आपिंबै सै त्होंयाँइ, तारे क्हि ठाड् तल् खाँम्।” 13 च्हौ बिसि येशूजी ह्रोंसए यो चए फिर थेंबै तोदोंन् च च्हमिरि ठाड् तइ धै परमेश्‍वरए मिं क्वेबर होंइ।

14 येशूजी प्रिबै त्हिंइर च च्हमिरि सल् लमिंब् म्रोंसि च्हों धिंर्बै चिब बेल्‍ले ह्रिस खसि चर्बै म्‍हिमैंने बिइ, “के लब टुरो मुँ, छतसि च टुरो न्‍होंर खसि सस्याँ तम्। प्रिबै त्हिंइर छ लब आत।”✡ 13:14 प्रस २०:९-१०; व्य ५:१३-१४

15 दिलेया प्रभु येशूजी चने बिइ, “ओ फिब्लो पार्दिब्‍मैं! क्‍हेमैंए न्होंरि खाबज्यै या प्रिबै त्हिंइर ह्रोंसए गधामैं नेरो क्‍ल्‍यामैं प्ह्रोंउँइँले पिसि क्‍यु थुँबर आबो वा? 16 चु अब्राहामए कुलर्बै च्हमि च्युसे प्रेदिं समा दुष्‍टइ फैथेंबै फैंसों प्रिबै त्हिंइर प्ल्हमिंल् त्हुब् आङिं वा? 17 येशूजी चु ताँ बिल् खाँबै लिउँइ खीए बिरोधीमैं ताँन् फापिन् तयाइ। दिलेया खीजी लबै औदिबै के म्रोंसि चर्बै म्हिमैं बेल्‍ले सैं तोंइ।”

18 येशूजी बिइ, “परमेश्‍वरए ग्याल्स तो धों तब मुँ? ङइ तो सैने च च्‍हैंले? 19 च च्‍युगुथिरि पासगि प्‍लु धोंन् तब् ग। म्‍हि घ्रिइ च प्‍लु ह्रोंसए म्रोंर बोसि प्‍लुइ। झाइले च फारसी सिं धुँ धोंले थेब तइ। धै मुर्बै नमेमैंइ चए हाँगजरे च्‍हों थाइ।”

20 येशूजी धबै बिइ, “परमेश्‍वरए ग्याल्स ङइ तो सैने च्‍हैंले? 21 च प्लेढा धों तबै सै ग। च्हमिरि घ्रिइ क्हें झोंबै प्रो सोंब्‍योंर प्लेढा म्‍लोथेंमा लिउँइ च ताँन् क्हें फुल्दिम्।”

22 च लिउँइ येशू सहर सहर नाँ-नाँसर ह्‍यासि म्हिमैंलाइ परमेश्‍वरए ताँमैं लोमिंदै यरूशलेमउँइ ह्‍याइ। 23 छले ह्‍यारिमा म्‍हि घ्रिइ खीने “ओ गुरु, च्युगुदे म्हिइ मत्‍त्रे खोंयोंइ आखाँबै छ्ह योंम्मा?” बिसि ङ्योएइ।

24 येशूजी चमैंने बिइ, “रुबै म्राउँइँले न्‍होंर होंबै भों लद्, तलेबिस्याँ ङ क्‍हेमैंने बिमुँ, ल्‍हें म्‍हिमैं रुबै म्राउँइँले न्‍होंर होंल् म्‍हैब्‍मुँ, दिलेया होंल् खाँरिब् आरे। 25 धिं क्‍ल्‍हे रेसि म्रा तोरवाबै लिउँइ क्‍हेमैं बैरु रासि म्रा ह्रादै ‘ओ प्रभु, म्रा थोंमिंन्,’ बिब्‍मुँ, दिलेया खीजी ‘क्‍हेमैं खनिउँइँले खल ङइ क्‍हेमैं ङो आसे,’ बिब्मुँ।

26 “च त्हेर क्‍हेमैंइ ‘ङिइ क्‍हिने बालु चमल थुँमल। झाइले ङिए नाँसजरे क्हिजी लोमिंमल,’ बिब्मुँ।

27 “दिलेया ‘क्हेमैं खनिउँइँले खल ङइ आसे। ओ दुष्‍ट के लब्मैं, ङ ङाँइँले ह्रेंगो तयाद् बिसि च क्‍ल्‍हेइ क्‍हेमैंने,’ बिब्मुँ।✡ 13:27 भज ६:८

28 “झाइले परमेश्‍वरए ग्याल्सर* १३:२८ ग्रिक क्युइरि, परमेश्‍वरए ग्याल्स‍रि स्‍योंम्‍बै अब्राहाम, इसहाक, याकूब नेरो अगमबक्‍तामैं टिरिब क्‍हेमैंइ म्रोंब्‍मुँ। दिलेया परमेश्‍वरजी क्‍हेमैं बैरु भ्योंवाब्‍मुँ, झाइले क्हेमैं क्रोदै स ह्राब्मुँ।✡ 13:28 मत्ती २२:१३; २५:३० 29 पूर्व, पश्‍चिम, उत्तर नेरो दक्षिणउँइँले ल्‍हें म्‍हिमैं खसि स्‍वर्गर्बै† १३:२९ ग्रिक क्युइरि, परमेश्‍वरए ग्याल्स‍रि भत्‍यारर टिब्‍मुँ।✡ 13:28-29 मत्ती ८:११-१२ 30 थेद्! तोगो लिउँइ तब्मैं ओंसों तब्‍मुँ, धै तोगो ओंसों तब्मैं लिउँइ तब्मुँ।”✡ 13:30 मत्ती १९:३०; २०:१६; मर्क १०:३१

31 च त्‍हेर्न को-कोइ फरिसीमैं येशू ङाँर खसि खीने बिइ, “छुइले छ्युडिह्‍याद् तलेबिस्याँ हेरोद म्रुँइ क्‍हि सैल् म्‍हैइमुँ।”

32 येशूजी चमैंने बिइ, “ ‘तिंयाँ नेरो प्‍हँना मोंइ स्‍यासि नब्मैं नेरो अरू बेथाइ नब्‍मैं ङइ सल् लसिन् मुँ, नोगि मत्‍त्रे ङए के खाँम्’ बिसि च सेला हेरोदने बिने। 33 ‘तिंयाँ, प्‍हँना नेरो नोगि या ङ‍ चु जरेन् प्रल् त्हुम्। तलेबिस्याँ यरूशलेम बाहेक अरू क्ल्ह्‍योर अगमबक्‍तामैं सैल् आखाँ।’ ”

34 झाइले येशूजी बिइ, “यरूशलेमथेंमैं, ओ यरूशलेमथेंमैं, क्‍हेमैंइ अगमबक्‍तामैं सैवाइमुँ, छलेन क्हेमैं ङाँर खब्मैंलाज्यै या युँमाइ प्रिंइ। नग आमाइ प्हसेमैं प्‍ह्‍याइ हुब् धोंले ङइ ल्‍हें खे क्‍हेमैंलाइ हुल् म्हैइ, दिलेया क्‍हेमैं आङिं। 35 ङ्‍ह्‍योद्! तारे क्‍हेमैंए सहर परमेश्‍वरजी नास लवाब्‍मुँ। ङ क्‍हेमैंने बिमुँ, क्‍हेमैंइ ‘परमेश्‍वर आबाजी कुल्‍मिंबै म्‍हिए मान तरिगे’ आबिन् समा क्‍हेमैंइ ङ म्रोंरिब् आरे।”✡ 13:35 भज ११८:२६