1 “क्‍हेमैंइ दुःख आयोंरिगे बिसि ङइ चु ताँन् ताँमैं क्हेमैंने बिब् ग। 2 म्हिमैंइ क्हेमैं यहूदीमैंए च्हों धिंउँइँले तेवाब्मुँ। क्हेमैंलाइ सैब्मैंइ परमेश्‍वरए सेवा लसिन् मुँ बिसि मैंबै त्हे खसिन् मुँ। 3 आबा नेरो ङ ङो आसेबइले चमैंइ चु के लब्मुँ। 4 दिलेया चमैंइ चु के लमा ङइ बिबै ताँ क्हेमैंइ मैंरिगे बिसि ङइ चु ताँमैं क्हेमैंने बिइमुँ।

“ङइ ओंसोंन् क्हेमैने चु ताँ आबि, तलेबिस्याँ ङ क्हेमैंनेन् मुँल। 5 ङ तारे ङ कुल्मिंबै आबा ङाँर ह्‍याइनमुँ, दिलेया क्हेमैं खाबज्यै ‘क्हि खनिर ह्‍याइनमुँ?’ बिसि ङने आङ्योए। 6 दिलेया ङइ चु ताँ बिबइले क्हेमैंए सैंर बेल्‍ले न्हुँ तइमुँ। 7 छान् तलेया ङइ क्हेमैंने क्ह्रोंसेंन्बै ताँ बिमुँ, ङ छुइले ह्‍याबन् क्हेमैंए ल्हागिर छ्याँब् तम्। तलेबिस्याँ ङ आह्‍याइ बिस्याँ ल्होमिंबै पबित्र प्ल्ह क्हेमैं ङाँर युरिब् आरे। ङ ह्‍याइ बिस्याँ पबित्र प्ल्ह क्हेमैं ङाँर कुल्मिंब्मुँ। 8 झाइले पबित्र प्ल्ह युबै लिउँइ ह्‍युलर्बै म्हिमैंलाइ पाप, धार्मिकता नेरो नियाए बारेर दोषि ठर्दिब्मुँ। 9 ङए फिर बिश्‍वास आलब पाप ग बिसि खीजी चमैंने उँइँमिंब्मुँ। 10 खीजी परमेश्‍वरए उँइँर तो ठिक मुँ चन् उँइँमिंब्मुँ तलेबिस्याँ ङ आबा ङाँर ह्‍याइनमुँ, क्हेमैंइ धबै ङ म्रोंरिब् आरे। 11 परमेश्‍वरए निसाफ खैबै तम् बिसि खीजी म्हिमैंने उँइँमिंब्मुँ। तलेबिस्याँ चु ह्‍युलर्बै म्रुँ दोषि ठर्दिल् खाँइमुँ।* 16:11 चु ह्‍युलर्बै म्रुँ दोषि ठर्दिल् खाँइमुँ दुष्‍टइ दण्ड योंल् खाँइमुँ।

12 “ङइ क्‍हेमैंने बिल् त्‍हुबै ताँ ल्‍हेन् मुँ, दिलेया च ताँमैं तोगो क्हेमैंइ सैदिल् आखाँ। 13 दिलेया क्ह्रोंसेंन्बै ताँ लोमिंबै पबित्र प्ल्ह युब्मुँ, धै खीजी क्हेमैं ताँन् क्ह्रोंसेंन्बै छ्याँबै घ्याँर डोरेमिंब्मुँ। खीजी ह्रोंसए सैंर मैंब् धोंले आपों। खीजी तो ताँ थेमुँ चन् पोंब्मुँ, धै लिउँइ तखबै ताँमैं क्हेमैंने बिमिंब्मुँ। 14 ङइ बिबै ताँमैं खीजी क्हेमैंने बिमिंसि ङए मान लब्मुँ। 15 आबाने मुँबै ताँन् सैमैं ङल् ग। छतसि पबित्र प्ल्हजी ङए ताँ क्हेमैंने बिमिंब्मुँ बिब् ग।

16 “तिस्‍याँदे लिउँइ क्‍हेमैंइ ङ म्रोंरिब् आरे, झाइले तिस्याँदे लिउँइ क्हेमैंइ धबै ङ म्रोंब्मुँ।”

17 छले खीए को-कोइ चेलामैंइ घ्रिइ-घ्रिने बिइ, “ ‘तिस्‍याँदे लिउँइ क्‍हेमैंइ ङ म्रोंरिब् आरे। तिस्याँदे लिउँइ क्हेमैंइ धबै ङ म्रोंब्मुँ, तलेबिस्याँ ङ आबा ङाँर ह्‍यासिन् मुँ।’ बिसि खीजी ङ्योने बिब तो जा?” 18 चमैंइ बिइ, “खीजी ‘तिस्‍याँदे लिउँइ’ बिब तो जा? ङिइ था आसे, खीजी बिल् म्हैबै ताँ ङिइ आक्हो।”

19 चमैंइ खीने चु ताँए बारेर ङ्योएबै सैं लसिन् मुँ बिब येशूजी था सेइ। छतसि खीजी बिइ, “ ‘तिस्‍याँदे लिउँइ क्‍हेमैंइ ङ म्रोंरिब् आरे, झाइले तिस्याँदे लिउँइ क्हेमैंइ ङ धबै म्रोंब्मुँ,’ बिबै अर्थ तो मुँगे बिसि क्हेमैंए न्होंर छलफल लरिल् वा? 20 क्ह्रोंसेंन ङ क्हेमैंने बिमुँ, क्हेमैं न्हुँ लसि क्रोब्मुँ, दिलेया ह्‍युलर्बै म्हिमैं बिस्याँ सैं तोंब्मुँ। क्हेमैं न्हुँ लसि टिलेया लिउँइ सैं तोंल् योंब्मुँ। 21 कोलो फिबै त्‍हे तमा च्हमिरिमैं बेल्‍ले दुःख तम्, दिलेया कोलो फिल् खाँब लिउँइ चइ ताँन् दुःख म्‍ले‍याम्। तलेबिस्याँ ह्‍युलरि कोलो घ्रि फिइ बिसि च बेल्‍ले सैं तोंम्। 22 छलेन तोगो क्हेमैंलाइ शोक तमुँ। दिलेया ङ धबै क्‍हेमैंने त्‍होयुमा क्‍हेमैंए सैं बेल्‍ले तोंब्‍मुँ। धै खाबज्यै क्हेमैंलाइ सैं आतोंल् लल् खाँरिब् आरे।

23 “च त्‍हिंइर क्‍हेमैंइ ङने तोइ ङ्योएरिब् आरे। क्ह्रोंसेंन ङ क्हेमैंने बिमुँ, क्हेमैंइ ङए मिंर आबाने तोइ ह्रिलेया खीजी क्हेमैंलाइ पिंब्‍मुँ। 24 तोगो समा ङए मिंरि क्‍हेमैंइ आबाने तोइ आह्रिइमुँ। तारे ह्रिद् क्‍हेमैंइ योंब्मुँ। झाइले क्‍हेमैं बेल्‍ले सैं तोंल् योंब्‍मुँ।

25 “तोगो ङइ क्हेमैंने अहानउँइँले ताँ लरिइमुँ। प्हँन लिउँइ बिस्याँ परमेश्‍वर आबाए बारेर ङइ क्हेमैंइ क्होल्‍ले बिमिंब्मुँ। 26 च त्हिंइर क्‍हेमैं ह्रोंसइन ङए मिंर परमेश्‍वरने ह्रिब्मुँ। ङइ क्‍हेमैंए ल्हागिर आबाने ह्रिमिंल् आत्हु। 27 तलेबिस्याँ आबाजी क्‍हेमैंने म्हाँया लम्। तलेबिस्याँ क्हेमैंइ ङलाइ म्हाँया लइमुँ, धै ङ परमेश्‍वर आबाउँइँले युब् ग बिसि क्वेंइमुँ। 28 ङ आबउँइँले ह्‍युलर युइमुँ, तारे ह्‍युल पिसि ङ आबा ङाँर एह्‍याम्।”

29 खीए चेलामैंइ बिइ, “तोगोम् क्हिजी अहान आबिल्‍ले बेल्‍ले क्होल्‍ले पोंरिइमुँ। 30 क्हिजी तोन्दोंरि ताँ सेमना बिसि तारे ङिइ क्होइ।† 16:30 क्हिजी तोन्दोंरि ताँ सेमना १९ पदरि चेलामैंइ खीने ताँमैं ङ्योएबै सैं लइमुँ बिब येशूजी सेइ। धै चमैंइ ङ्योएब् भन्दा ओंसों ज्वाफ पिंइ। परमेश्‍वरजी मत्‍त्रे म्हिमैंए सैंर्बै ताँ था सेम्। खाबज्यै या क्हिने ताँमैं ङ्योएल् आत्हु। छतसि क्हि परमेश्‍वर आबाउँइँले युब् ग बिसि ङिइ क्वेंइमुँ।”

31 येशूजी चमैंने बिइ, “क्हेमैंइ तारे ङए फिर बिश्‍वास लम्मा? 32 ङ्ह्‍योत्ति! त्हे खसिन् मुँ, खल् खाँइ। च त्हेर क्हेमैं खन्तोदोंन् प्हुँयासि ह्रों-ह्रोंसए धिंर ह्‍याब्मुँ धै ङ घ्रिन् वाथेंब्मुँ। दिलेया ङ घ्रि आरे, तलेबिस्याँ आबा ङने बालुन् मुँ।

33 “क्हेमैं ङने बालु टिमा छिं ङ्हाँरिगे बिसि ङइ क्हेमैंने चु ताँमैं बिइमुँ। ह्‍युलर मुँमा क्हेमैंलाइ दुःख तब्मुँ, दिलेया सैं थेब लद्। ङइ ह्‍युललाइ ट्होवाइमुँ।”