1 याकूब (इस्राएल) ह्रोंसने मुँबै तोन्दोंरि सै किंसि प्रइ, धै बेर्शेबार खसि ह्रोंसए आबा इसहाकए परमेश्‍वरए मिंर ख्रो पिंइ। 2 च म्हुँइँसर परमेश्‍वर याकूबने दर्शनर पोंसि “याकूब, याकूब” बिसि चलाइ हुइइ।

धै याकूबइ “ङ चुर्न मुँ,” बिइ।

3 खीजी बिइ, “ङ परमेश्‍वर क्हिए आबाए परमेश्‍वर ग। मिश्र ह्‍याबर आङ्हिंन् चर ङइ क्हिउँइँले थेबै ह्रें घ्रि बनेब्मुँ। 4 क्हिने बालु ङ मिश्रर ह्‍याब्मुँ, धै क्हिलाइ खैले बिलेन ङइ धबै एसि पखब्मुँ। धै क्हि सिमा योसेफए योइ क्हिए मि हुमिंब्मुँ। धै ह्रोंसए यो क्हिए मिर थेंब्मुँ।”

5 च लिउँइ याकूब बेर्शेबाउँइँले ह्‍याइ। फारो म्रुँइ चलाइ पखबर गाडामैं कुल्मिंमा याकूबए च्हमैंइ ह्रोंसए आबा, प्हसेमैं नेरो परवामैं च गाडामैंर झोंसि बोइ। 6 ह्रोंसए खेदोमैं नेरो कनान ह्‍युलर खागु लबै सैमैं किंसि याकूब नेरो चए ताँन् परवा मिश्रर ह्‍याइ।✡ 46:6 चिब्मैं ७:१५ 7 याकूबइ ह्रोंसने बालु ह्रोंसए च्हमैं-च्हमिमैं क्वें क्वेंमिमैं ताँन् मिश्रर बोइ।

8 मिश्रर ह्‍याबै याकूबए च्हमैंए मिंमैं चुन् ग: याकूबए च्ह थेब रूबेन मुँल। 9 रूबेनए च्हमैं, हानोक, पल्‍लु, हेस्रोन नेरो कर्मि मुँल। 10 शिमियोनए च्हमैं: यमूएल, यामिन, ओहद, याकिन, सोहोर नेरो कनानी प्ह्रेंस्योउँइँबै च्ह सों मुँल। 11 लेबीए च्हमैं: गेर्शोन, कहात नेरो मरारि। 12 यहूदाए च्हमैं: एर, ओनान, शेलह, फारेस नेरो जेरह मुँल, दिलेया एर नेरो ओनान कनान ह्‍युलर्न सियाल। फारेसए च्हमैं हेस्रोन नेरो हामूल मुँल। 13 इस्साखारए च्हमैं: तोला, पुवा, याशूब नेरो शिम्रोन मुँल। 14 जबूलूनए च्हमैं: सेरेद, एलोन नेरो यहलेल मुँल। 15 चुमैं याकूबउँइँले लेआइ पद्दन-आरामर फिबै च्हमैं नेरो चए च्हमि दीना या मुँल। लेआउँइँले याकूबए सन्तानमैं ताँन् लसि सोंच्युसे सों मुँल।

16 गादए च्हमैं: सेफोन, हाग्‍यि, शूनि, यसबोन, एरि, अरोदि नेरो अरेलि मुँल। 17 ‍आशेरए च्हमैं यिम्ना, यिश्‍वा, यिश्‍वि नेरो बरिआ नेरो चमैंए अङाँ सेरह मुँल। बरिआए च्हमैं हेबेर नेरो मल्कीएल मुँल। 18 लाबानइ ह्रोंसए च्हमि लेआने पिंबै केब्स्यो जिल्पाइ फिबै याकूबए सन्तानमैं चुमैं मुँल। चुमैं ताँन् लसि च्युसे ट्हु म्हिमैं मुँल।

19 याकूबए प्ह्रेंस्यो राहेलए च्हमैं: योसेफ नेरो बेन्यामीन मुँल। 20 योसेफए च्हमैं मनश्शे नेरो एफ्राइम ओनए खेगि पोतिपेराए च्हमि आसनतउँइँले मिश्रर फिल।✡ 46:20 उत ४१:५०-५२ 21 बेन्यामीनए च्हमैं बेला, बेकेर, अश्बेल, गेरा, नामान, एहि, रोश, मुप्पिम, हुप्पिम नेरो आर्द मुँल। 22 चुमैं राहेलउँइँले फिबै याकूबए सन्तानमैं मुँल। चुमैं ताँन् लसि च्युसे प्लि म्हिमैं मुँल।

23 दानए च्ह: हुशिम मुँल। 24 नप्‍तालीए च्हमैं: यहसेल, गुनि, येसेर, नेरो शिल्‍लेम मुँल। 25 लाबानइ ह्रोंसए च्हमि राहेललाइ पिंबै केब्स्यो बिल्‍हाइ याकूबउँइँले फिबै सन्तानमैं चुमैंन् मुँल। चुमैं ताँन् लसि म्हि ङि मुँल।

26 चए चोंमैं आच्योल्‍ले याकूबने बालु मिश्रर ह्‍याबै चए ताँन् सन्तानमैं ट्हुच्युसे ट्हु मुँल। 27 मिश्रर फिबै योसेफए च्हमैं ङ्हिं मुँल। मिश्रर खबै याकूबए धिंर्बै परवार ताँन् लसि म्हि ङिच्यु मुँल।✡ 46:27 चिब्मैं ७:१४

28 “गोशेन ह्‍याबै घ्याँ उँइँमिंन्” बिसि याकूबइ यहूदालाइ योसेफ ङाँर ओंसों कुलइ। धै चमैं गोशेनर फेनेमा 29 योसेफइ के लब्मैंने ह्रोंसए रथ तेबर ल्हैदिइ। धै गोशेन समा ह्रोंसए आबा याकूबने त्होबर ह्‍याइ। धै आबालाइ म्रोंबै तोदोंन् योसेफ आबाने अँखलो ख्वेसि क्रोबै क्रोबन् तइ। 30 याकूबइ योसेफने बिइ, “क्हिए लि म्रोंल् योंसि क्हि सोगों मुँब ङइ सेइ। छतसि तारे ङ सन्तोकले सिल् खाँब्मुँ।”

31 योसेफइ ह्रोंसए आघें-अलिमैं नेरो ह्रोंसए आबाए परवाने बिइ, “ ‘कनान ह्‍युलर्बै ङए आघें-अलिमैं नेरो ङए आबाए परवामैं ङ ङाँर खइमुँ बिसि तारे ङ ह्‍यासि फारोने बिब्मुँ। 32 चमैं ताँन् खेदोमैं न्हबै प्ह्रोंछैंमैं ग। छतसि चमैंइ ह्रोंसए ताँन् बगालमैं नेरो चमैंने मुँबै तोन्दोंरि सै किंसि खइमुँ।’ 33 धै फारो म्रुँइ क्हेमैं हुइसि ‘क्हेमैंइ तो के लमुँ?’ बिसि ङ्योएब्मुँ। 34 छले ङ्योएमा ‘क्हिए केब्छैंमैं ङि आबा-च्हमैं ताँन् कोलोउँइँले तोगो समा खेदोमैं न्हब्मैं ग,’ बिद्। छ बिस्याँ क्हेमैं गोशेनर टिल् योंब्मुँ। तलेबिस्याँ मिश्रीमैं ताँनइ प्ह्रोंछैंमैंलाइ हेल् लम्।”