1 इश्‍माएलीमैंइ योसेफ किंसि मिश्र ह्‍युलर बोइ। धै फारो म्रुँए दरबार रुँब्मैं न्होंर्बै कप्‍तान पोतीफर बिबै म्हिए योर चुँवाँइ।

2 दिलेया याहवेह परमेश्‍वर योसेफने बालु मुँल। छतसि चर च प्लब् ततै ह्‍याइ। च ह्रोंसए क्ल्हे मिश्रीथेंए धिंर टिमल।✡ 39:2 चिब्मैं ७:९ 3 “याहवेह चने बालु मुँब नेरो चइ लबै ताँन् केमैं याहवेहजी छ्याँब लमिंम्” बिसि चए क्ल्हे पोतीफरइ म्रोंसि 4 सैं तोंइ, धै ह्रोंसए धिंर के लब्मैंए न्होंर्बै चिब लमिंइ। ह्रोंसने मुँबै तोन्दोंरि सैए जिम्मा योसेफलाइ पिंइ। 5 चइ ह्रोंसए धिंर्बै नेरो ह्रोंसने मुँबै तोन्दोंरि सैए जिम्मा योसेफलाइ पिंबै त्हेसेरो योसेफ चर मुँबइले याहवेहजी च मिश्रीथेंए धिंर आशिक पिंसि चए धिं-नाँ नेरो म्रोंर रोबै ताँन् सैमैंए फिर आशिक पिंइ। 6 छतमा ह्रोंसने मुँबै तोन्दोंरि सैमैं योसेफए जिम्मार पिवाइ। ह्रोंसइ चबै सै बाहेक ह्रोंसने मुँबै तोइ सैलेया चइ वास्ता आलमल।

योसेफ ङ्ह्‍योबर बेल्‍ले छ्याँब मुँल। 7 छतमा दे त्हे लिउँइ चए क्ल्हेए प्ह्रेंस्योइ योसेफउँइ ङ्ह्‍योसि “ङने बालु रोद्,” बिइ।

8 दिलेया योसेफइ आङिंसि चने बिइ, “ङ चु धिंर मुँबइले ङए क्ल्हेइ चु धिंर मुँबै तोइ सैलेया न्हुँ आल। चने मुँबै तोन्दोंरि सैमैं या चइ ङए जिम्मार पिंइमुँ। 9 चु धिंर ङ भन्दा थेब खाबै आरे। क्हि बाहेक अरू तोन्दोंरि सै चइ ङए जिम्मर्न पिंइमुँ, तलेबिस्याँ क्हि चए प्ह्रेंस्यो ग। छतसि चु आछ्याँबै के ङइ खैले लब, धै परमेश्‍वरए बिरोधर ङइ खैले पाप लल् खाँमुँ?” 10 च च्हमिरिइ त्हिंइ ह्रोंसे योसेफने ताँ ललेया चने बालु रोब टिब लबर योसेफ आङिंमल।

11 तिगें योसेफ के लबर धिं न्होंर ह्‍यामा धिंर अरू के लब्मैं खाबै आरेल। 12 छतमा च च्हमिरिइ योसेफए क्वें क्हासि “ङने बालु रोद्,” बिइ। दिलेया योसेफइ ह्रोंसए क्वें चए योर्न वाथेंसि न्हेह्‍याइ, धै धिं न्होंउँइँले बैरु त्होंह्‍याइ। 13 योसेफइ ह्रोंसए क्वें चए योर्न वाथेंसि धिं न्होंउँइँले त्होंह्‍याब् म्रोंसि, 14 च च्हमिरिइ ह्रोंसए केब्छैंमैं हुइसि बिइ, “ङ्ह्‍योत्ति! ङिए मिं वाबर ङए प्युँइ चु हिब्रू म्हि चुर पखन। च म्हि ङने बालु रोबर धिं न्होंर खइ। दिलेया ङ थेबै कैले ओरइ। 15 छले ङ ओरब् थेसि चइ ह्रोंसए क्वें ङ ङाँर वाथेंसि धिं न्होंउँइँले बैरु न्हेह्‍याइ।”

16 चए प्युँ धिंर आखन् समा चइ च क्वें ह्रोंसनेन् थेंइ। 17 लिउँइ चए प्युँ खमा चु ताँ बिइ, “ङ्यो ङाँर क्हिइ पखबै च हिब्रू केब्छैं ङए मिं वाबर धिं न्होंर खइ। 18 दिलेया ङ ओरबै तोदोंन् चइ ह्रोंसए क्वें ङ ङाँर्न वाथेंसि धिं न्होंउँइँले भौदिह्‍याइ।”

19 प्ह्रेंस्योइ बिबै ताँ थेमा पोतीफर मि धोंलेन् लुँबै ह्रिस खइ। 20 झाइले चइ योसेफलाइ म्रुँए कैदिमैं च्युथेंबै झेलर च्युवाइ। छले योसेफ झेलर टिइ। 21 दिलेया याहवेह योसेफने बालु मुँल। खीजी चए फिर ल्हयो खइ, छतसि योसेफ झेलर्बै चिबइ खोबै म्हि तल् पिंइ।✡ 39:21 चिब्मैं ७:९ 22 छतसि झेलर्बै चिबइ च झेलर च्युथेंब्मैंए फिर्बै चिब योसेफ लमिंइ। चर लल् त्हुबै केमैं तो मुँलेया योसेफइ ल्हैदिसेरो तयामल। 23 योसेफए जिम्मार पिंबै तोइ सैलेया झेलर्बै चिबइ न्हुँ लल् आत्हुमल। तलेबिस्याँ याहवेह योसेफने बालु मुँल। योसेफइ लबै तोन्दोंरि के याहवेह परमेश्‍वरजी बेल्‍ले छ्याँब लमिंइ।