1 याहवेहजी मोशाने बिइ, “क्हिए सन्तानलाइ पिंम् बिसि ङइ अब्राहाम, इसहाक नेरो याकूबने बाछा फैबै क्ल्ह्‍योर मिश्रउँइँले फखबै म्हिमैंने ह्‍याद्।✡ 33:1 उत १२:७; २६:३; २८:१३ 2 क्हेमैंए ओंसों-ओंसों दूत घ्रि कुल्मिंब्मुँ, धै कनानी, एमोरी, हित्ती, परिज्जी, हिव्वी नेरो यबूसीमैंलाइ ल्हाब्मुँ। 3 दिलेया क्हेमैं आच्योब्मैं ग, धै ङ क्हेमैंने ह्‍यास्याँ ङइ क्हेमैंलाइ सैवालै। छतसि ङ क्हेमैंने बालु ह्‍यारिब् आरे।”

4 चु ताँ थेसि म्हिमैंइ न्हुँ लसि खाबज्यै या घानामैं आखि। 5 तलेबिस्याँ “ ‘क्हेमैं आच्योमैं ग। ङ तिस्याँदे क्हेमैंने ह्‍यास्याँ ङइ क्हेमैंलाइ सैवालै। छतसि तोगो क्हेमैंइ ह्रोंसए घानामैं प्लिद्, धै क्हेमैंलाइ तो लल् त्हुमुँ ङ बिचार लस्यो,’ बिसि इस्राएलीमैंने बिद् बिसि याहवेहजी मोशाने बिल।” 6 छतसि इस्राएलीमैंइ सिनै* 33:6 सिनै हिब्रू क्युइर, होरेब, सिनै कोंए अर्को मिं। कों वाथेंसि घानामैं आखिमल।

7 म्हिमैं टिबै ब्यारेकउँइँले ल्हें ह्रेंगो मोशाइ तम्बु घ्रि टौंदिमल। च तम्बुलाइ मोशाइ याहवेहने त्होबै तम्बु† 33:7 याहवेहने त्होबै तम्बु चु तम्बु नेरो याहवेहए पबित्र तम्बु (२६ अध्याय) स्यो-स्यो मुँ। बिमल, धै याहवेहने त्होदा ङ्हाँब्मैं च तम्बुर ह्‍यामल। 8 मोशा च तम्बुर ह्‍यामा ताँन् म्हिमैं ह्रोंसए तम्बुए म्रार रासि मोशा याहवेहने त्होबै तम्बु न्होंर आहोंन् समा च ङाँइन ङ्‍ह्‍योरिमल। 9 मोशा न्होंर होंमा न्हाँम्स्योए त्हो रासि च तम्बुए म्रार रामल। झाइले न्हाँम्स्योए म्हाँजोउँइँले याहवेहजी मोशाने ताँ सेमल। 10 म्हिमैंइ न्हाँम्स्योए त्हो तम्बुए म्रार राब् म्रोंमा चमैं रेसि ह्रों-ह्रोंसए तम्बुर्बै म्रार कुरसि फ्योमल। 11 म्हिमैं ह्रोंसए थुमैंने ताँ सेब् धोंले याहवेह या मोशाने बालु सुँ-सुँ ह्‍वेंसि ताँ सेमल। झाइले मोशा ब्यारेकर एखमा चलाइ ल्होबै फ्रेंसि नुनए च्ह यहोशू च तम्बुर टिमल।

12 झाइले मोशाइ याहवेहने बिइ, “क्हिजी ङने ‘चु म्हिमैं बोसि ह्‍याद्,’ बिमुँ, दिलेया ङने बालु खा-खाब् कुलम् बिसि क्हिजी ङने आबिइमुँ। ‘ङइ क्हिलाइ क्हिए मिंइ सेम्: धै क्हिए फिर ङए म्हाँया मुँ,’ बिसि क्हिजी बिइमुँ। 13 क्हिए म्हाँया ङए फिर मुँ बिस्याँ, ङइ क्हिलाइ ङो सेल् खाँरिगे धै क्हिए उँइँर छ्याँबै केमैं लसि क्हिलाइ सैं तोंन् लल् खाँरिगे बिसि ङलाइ क्हिए घ्याँ उँइँमिंन्। चु ह्रें (जात) क्हिलन् ग बिसि मैंमिंन्।”

14 छबिमा याहवेहजी बिइ, “ङ क्हिने बालुन् ह्‍याब्मुँ, धै क्हिलाइ भों न्हल् पिंब्मुँ।”

15 मोशाइ याहवेहने बिइ, “क्हि ङिने बालुन् आह्‍यास्याँ ङिलाइ चु क्ल्ह्‍योउँइँले क्याइ आबोमिंन्। 16 क्हि ङिने बालु आह्‍यास्याँ क्हिए म्हिमैं नेरो ङइ क्हिए म्हाँया योंइमुँ बिसि अरू ह्रेंमैंइ खैले सेब? ङ नेरो क्हिए म्हिमैं पृथ्‍बीर्बै ताँन् म्हिमैंने स्योन् उँइँबर क्हि ङिने बालुन् तल् त्हुम्।”

17 याहवेहजी मोशाने बिइ, “क्हिइ बिब् धोंले ङ लब्मुँ, तलेबिस्याँ ङए म्हाँया क्हिने मुँ, धै ङइ क्हिलाइ क्हिए मिंइ सेइमुँ।”

18 मोशाइ यो छ्युँ लसि बिइ, “क्हिए चारबै ह्‍वे उँइँमिन्।”

19 याहवेहजी बिइ, “ङ क्हिए उँइँर्न ङए औदिबै छ्याँबै केमैं उँइँमिंसि ‘याहवेहए’ मिं ओरसि पोंब्मुँ। खाबलाइ ङ दयाम्हाँया लदा ङ्हाँमुँ चलाइ ङ दयाम्हँया लमुँ, खाबलाइ ल्हयो खदा ङ्हाँमुँ चलाइ ङ ल्हयो खमुँ।✡ 33:19 रोम ९:१५ 20 दिलेया क्हिइ ङए लि म्रोंल् खाँरिब् आरे, तलेबिस्याँ ङए लि ङ्ह्‍योस्याँ म्हिमैं सोल् आखाँ। 21 दिलेया ङए रेर पारा घ्रि मुँ। चर्न क्हि राद्। 22 ङए चाराबै ह्‍वे छाइले ह्‍यामा ङइ क्हिलाइ च पाराए पोर थेंब्मुँ, धै छाइले ङ आखन् समा ङए योइ क्हिलाइ हुथेंब्मुँ। 23 च लिउँइ ङए यो स्योवामा ङए क्हो क्हिइ म्रोंब्मुँ, लि बिस्याँ म्रोंरिब् आरे।”