1 याहवेहजी मोशाने बिइ, 2 “ङइ यहूदाए कुलर्बै हुरए क्वें नेरो ऊरीए च्ह बजलेललाइ त्हाँइमुँ। 3 ङइ चलाइ परमेश्‍वरए प्ल्हजी प्लिंसि ह्रब सेब नेरो ताँन् खालर्बै के लल् ह्रबै सिप पिंइमुँ। 4 चइ मारा, चाँदि नेरो काँसार नक्सा प्ह्रिब, 5 छलेन हिरा थोसि जोड्दिब, सिंर बुट्टा झोंब नेरो अरू ल्हें खालर्बै बुट्टा झोंबै केमैं लरिगे बिसि चलाइ त्हाँब् ग। 6 चलाइ ल्होबर दान कुलर्बै अहीसामाकए च्ह ओहोलीआबलाइया त्हाँइमुँ। धै ङइ क्हिने लद् बिबै तोन्दोंरि सैमैं बनेबर अरू ताँन् के लब्मैंलाइ ङइ सिप पिंइमुँ।

12 च लिउँइ याहवेहजी मोशाने बिइ, 13 “क्हिइ इस्राएलीमैंने चु या बिद्, प्रिबै त्हिंइ ङए भों न्हबै त्हिंइ ग।✡ 31:13 उत २:२ छतसि क्हेमैंइ खैले बिलेना प्रिबै त्हिंइर के आलद्। क्हेमैंलाइ पबित्र लमिंम् बिसि क्हेमैंइ सेरिगे बिसि, क्हेमैं नेरो ङए म्हाँजोर चु प्रिबै त्हिंइ खोंयोंन् बिलै चिनु घ्रि तब्मुँ। 14 क्हेमैंइ प्रिबै त्हिंइर के आलद्, तलेबिस्याँ क्हेमैंए ल्हागिर चु पबित्र त्हिंइ ग। चु ताँ आम्हाँदिब्मैं खैलसे या सैल् त्हुम्। च त्हिंइर के लब्मैंलाइ समाजउँइँले तेवाब्मुँ। 15 टुगैं समा के लरिगे, दिलेया ङिगैंर भों न्हबै त्हिंइ ग, चु त्हिंइ याहवेहए ल्हागिर पबित्र ग। चु त्हिंइर के लब्मैंलाइ सैवाल् त्हुम्।✡ 31:15 प्रस २०:८-११; २३:१२; ३४:२१; ३५:२; लेबी २३:३; व्य ५:१२-१४ 16 इस्राएलीमैंइ च त्हिंइर के आलरिगे, खेंमैंए तुस्ता-पुस्ता समा खोंयोंन् बिलै च त्हिंइ बाछाए चिनु धोंलेन् म्हाँदिल् त्हुम्। 17 इस्राएलीमैंए म्हाँजोर चु प्रिबै त्हिंइ खोंयोंन् बिलै तबै चिनु घ्रि तब्मुँ, तलेबिस्याँ याहवेहजी टुगैं न्होंर मु नेरो पृथ्‍बी बनेइ, धै ङिगैंर भों न्हइ।”✡ 31:17 प्रस २०:११

18 याहवेहजी सिनै कोंर मोशाने ताँ लल् खाँबै लिउँइ खीए योरिंइ प्ह्रिबै युँमाए प्लना ङ्हिं खीजी मोशालाइ पिंइ।