1 “क्हिइ पर्दा च्युउलो झोंबै पबित्र तम्बु बनद्। च पर्दामैं छेनाले रोबै सुति क्वेंला तल् त्हुम्। च क्वेंमैं मु रङ (नीलो), कलेजी नेरो ओल्ग्या रङर्बै रुइ रोब तल् त्हुम्। माराए के लल् ह्रब्मैंइ बनेबै करूबमैं चर थेंन्। 2 ताँन् पर्दामैं नाप घ्रिर्बै तल् त्हुम्, ताँन् पर्दामैं ङ्हिस्युसे प्रेउरु ह्रिंब, प्लिउरु प्ल्हाब तल् त्हुम्। 3 ङ्‍हउलो पर्दा अर्को पर्दामैंने जोड्दिद्, छलेन अर्को पर्दा ङ्‍ह या अर्को पर्दा घ्रि‍ घ्रिने जोड्दिद्। 4 ओंसों जोड्दिबै भागए दे क्याइ दनेबै ङाँर मु रङर्बै सुर्कानि झोंन्। छलेन लिउँइ जोड्दिबै भागए दे क्याइ दनेबै ङाँरै या छलेन् सुर्कानि झोंन्। 5 पर्दा घ्रिर ङ्‍हच्यु सुर्कानि झोंन्, छलेन लिउँइ जोड्दिबै भागए अर्को पर्दार ङ्‍हच्यु सुर्कानि झोंन्। च सुर्कानिमैं तिरैना ह्‍वेंल् त्हुम्। 6 झाइले माराए अङ्‌कुसि ङ्‍हच्यु बनेसि पर्दामैं जोड्दिद्, छलमा पबित्र तम्बु घ्रिन् तब्मुँ।

7 “पबित्र तम्बु हुबै ल्हागिर रए मुइइ रोबै क्वेंए पर्दा च्युसे घ्रि टुद्। 8 ताँन् पर्दामैं च्युसे सों मिटर ह्रिंब नेरो मिटर ङ्हि प्ल्हाब तल् त्हुम्। च्युसे घ्रि पर्दामैं नाप घ्रिर्बैन् तल् त्हुम्। 9 ङ्‍हउलो क्वें गैंदिसि पर्दा घ्रि बनेदु। छलेन टुउलो क्वें गैंदिसि पर्दा घ्रि बनेद्। टुउलो क्वें गैंदिसि बनेबै पर्दा बिस्याँ तम्बुए ओंसों च्योद्। 10 ओंसों गैंदिबै भागए क्याइ दनेबै पर्दाए ङाँर ङ्‍हउलो सुर्कानि झोंन्, छलेन अर्को गैंदिबै भागए क्याइ दनेबै पर्दाए ङाँरै या ङ्‍हउलो सुर्कानि झोंन्। 11 पर्दा ङ्हिं गैंदिसि घ्रिन् लबै ल्हागिर क्हिइ काँसाए ङ्‍हच्यु अङ्‍कुसि बनेसि पर्दाए सुर्कानिर झोंन्। 12 ङैब आधा पर्दा पबित्र तम्बुए लिउँइ च्योद्। 13 तम्बु हुसि ह्रिंग्यो तबै पर्दा तिउरु छुइ हार धै तिउरु छाइबै हार पबित्र तम्बु हुबै ल्हागिर पर्दाए ङो ङ्हिंर च्योइ थेंन्।

14 “तम्बु हुबै ल्हागिर ओल्ग्या रङ फोबै क्यु साँडए ट्हुबिए पर्दा बनद्, छलेन सिल ताँगाए ट्हुबिए अर्को पर्दा बनेद्।

15 “पबित्र तम्बुए ल्हागिर बबुल सिंए फालेमैं बनेद्। 16 च फालेमैं ताँन् च्युउरु ह्रिंब, छलेन तिउरुसे आधा प्ल्हाब तल् त्हुम्। 17 च फालेमैं जोड्दिबै ल्हागिर च फालेमैंर ङ्हिं-ङ्हिं चोसोमैं थेंल् त्हुम्। क्हिइ पबित्र तम्बुए ल्हागिर ताँन् फालेमैं छलेन् बनेद्। 18 पबित्र तम्बुए छ्यो ल्हुए (दक्षिण) भागए ल्हागिर ङ्हिस्यु फालेमैं बनेद्। 19 च ङ्हिस्यु फालेए न्होंर चाँदिए प्लिच्यु क्योबै क्ल्ह्‍यो बनेद्। क्योबै क्ल्ह्‍यो ङ्हिं फाले घ्रिर न्होंर थेंन्, धै ताँन् चोसाए न्होंर क्योबै क्ल्ह्‍यो घ्रि थेंन्। 20 पबित्र तम्बुए उत्तर हारए ल्हागिर ङ्हिस्यु फालेमैं बनेद्। 21 झाइले च फालेमैंए न्होंर क्योबै क्ल्ह्‍यो ङ्हिं योल्‍ले चाँदिए प्लिच्यु क्योबै क्ल्ह्‍योमैं बनेद्। 22 पबित्र तम्बुए छ्यो न्हुए भागए (पश्‍चिम दिशा) ल्हागिर टुउलो फाले बनेद्। 23 कुना-कुनार झोंबै ल्हागिर क्हिइ फाले ङ्हिं बनेद्। 24 च फालेमैं ताइले माइ समा ङ्हिथु खप्टिदिद्, च फालेमैं न्ह घ्रिर्न जोड्दिद्। च फालेमैं ङ्हिं या छलेन् जोड्दिद्। 25 ‍तम्बुर फ्रेउलो फालेमैं तल् त्हुम्, च फालेए ल्हागिर चाँदिए च्युसे टुउलो क्योबै क्ल्ह्‍यो तल् त्हुम्। फाले घ्रिए न्होंर ङ्हिं-ङ्हि क्योबै क्ल्ह्‍यो तल् त्हुम्।

26 “क्हिइ बबुल सिंए बारमैं बनेद्। च्युसे ङ्‍ह पेडो तबै बारमैं बनेद। पबित्र तम्बुए तिरैबै फालेमैंए ल्हागिर ङ्‍हउलो बार बनेद्। 27 छलेन अर्को फालेमैंए ल्हागिर ङ्‍हउलो बार बनेद्। धै छ्यो न्हुए भागर्बै फालेमैंए ल्हागिर ङ्‍हउलो बार बनेद्। 28 फालेमैंए म्हाँजोर मुँबै बार छेउ घ्रिउँइँले अर्को छेउ समा फनेल् त्हुम्। 29 फालेमैं माराइ म्होरद्। बारमैं क्हाबै ल्हागिर माराए न्हमैं बनेद्। बारमैं या माराइ म्होरल् त्हुब्मुँ।

30 “क्हिलाइ कोंर नमुना उँइँब् धोंले पबित्र तम्बु बनेद्।

31 “झाइले पबित्र तम्बुए न्होंर सजेबै ल्हागिर, मु रङ, कलेजी रङ, ओल्ग्या रुइ छेनाले ख्रिंबै सुति क्वेंए पर्दा बनेद्। धै सिपालु म्हिइ बनेबै करूबमैं चर थेंल् त्हुम्। 32 माराइ म्होरबै बबुल सिंए प्लिउलो त्होर माराए अङ्‍कुसिइ च पर्दा च्योद्। 33 क्हिइ च पर्दामैं अङ्‍कुसिइ च्योद् धै चए लिउँइ ठिम थेंबै मुदुस थेंन्। च पर्दाइ क्हेमैंए ल्हागिर पबित्र क्ल्ह्‍योलाइ ताँन् भन्दा पबित्र क्ल्ह्‍योउँइँले स्यो लब्मुँ।✡ 26:33 हिब्रू ६:१९; ९:३-५ 34 ताँन् भन्दा पबित्र क्ल्ह्‍योर्बै ठिम थेंबै मुदुसए फिर क्हा थेंन्। 35 पर्दाए बैरु हार पबित्र क्ल्ह्‍योए उत्तर हार टेबल थेंन्, छलेन पबित्र क्ल्ह्‍योए छ्यो न्हुउँइ टेबलए ओंसों पानस थेंन्।

36 “तम्बुए म्राए ल्हागिर मु रङ, कलेजी रङ, ओल्ग्या रु नेरो छेनाले रोबै सुति क्वेंए बुट्‍टा फ्रिंबै पर्दा बनेद। 37 च पर्दाए ल्हागिर बबुल सिंए त्हो ङ्‍ह बनेद्, धै च त्होलाइ माराइ म्होरद्। अङ्‍कुसिमैं माराल तल् त्हुम्। चए ल्हागिर काँसाए ङ्‍हउलो क्हा बनेद्।