1 परमेश्‍वरजी मोशा नेरो खीए इस्राएली म्हिमैं मिश्रउँइँले तेइ पखमा चमैंए ल्हागिर तोन्दोंरि लबै केमैं मिद्यानर्बै खेगि यित्रो, मोशाए क्येंइ थेइ। 2 ओंसों मोशाइ ह्रोंसए प्ह्रेंस्यो सिप्पोरा मैता कुलइ। छतसि मोशाए क्यें यित्रोइ सिप्पोरा 3 नेरो चए च्ह ङ्हिं मोशा ङाँर पखइ। (च्ह घ्रिए मिं गेर्शोम* 18:3 गेर्शोम हिब्रू क्युइर “स्यामैं” बिब् धों थेल। मुँल, तलेबिस्याँ च फिबै त्हेर मोशाइ, “ङ आगुए ह्‍युलर टिबै म्हि तइमुँ,” बिल। छतसि च्हए मिं चइ गेर्शोम थेंइ।✡ 18:2-3 प्रस २:२१-२२✡ 18:3 चिब्मैं ७:२९ 4 अर्को च्हए मिं एलीएजर† 18:4 एलीएजर हिब्रू क्युइर “परमेश्‍वरजी ङलाइ ल्होमिंम्” बिब् धों थेल। मुँल, तलेबिस्याँ मोशाइ, “ङए आबाए परमेश्‍वरजी ङलाइ ल्होमिंसि फारोए सेलाँउँइँले ङ जोगेमिंइ,” बिल। छतसि च्हए मिं चइ एलीएजर थेंइ।) 5 मोशाए च्हमैं नेरो प्ह्रेंस्यो पसि मोशाए क्यें यित्रो परमेश्‍वरए कों ङाँर मोशा टिबै क्यु आयोंबै क्ल्ह्‍योर खइ।

6 यित्रोइ मोशाने, “ङ क्हिए क्यें यित्रो, क्हिए प्ह्रेंस्यो नेरो क्हिए च्ह ङ्हिं किंसि क्हि ङाँर खसिन् मुँ,” बिसि सउँसर कुलल। 7 छतसि मोशा ह्रोंसए क्येंने त्होबर ह्‍याइ, धै त्होसि क्येंलाइ फ्योइ, धै रासि म्वैं लइ। चमैंइ खें-खेंमैंए छ्याँब आछ्याँब ताँमैं ङ्योएसि मोशाए तम्बु न्होंर होंइ। 8 इस्राएलीमैंलाइ मिश्रउँइँले फ्रेमिंबर याहवेहजी फारो नेरो मिश्रीमैंए फिर लबै तोन्दोंरि ताँमैं नेरो इस्राएलीमैंइ घ्याँर तो-तो दुःख योंइ, धै याहवेहजी चमैंलाइ खैले जोगेमिंइ बिबै ताँमै ताँन् मोशाइ ह्रोंसए क्येंने बिइ। 9 इस्राएलीमैं मिश्रीमैंए योउँइँले फ्रेसि पखमा चमैंए ल्हागिर याहवेहजी लबै छ्याँबै ताँमैं थेसि यित्रो सैं तोंइ। 10 यित्रोइ बिइ, “मिश्रीमैं नेरो फारो म्रुँए योउँइँले क्हेमैं फ्रेमिंबै याहवेहए मिं थेब् तरिगे! खीजी ह्रोंसए म्हिमैंलाइ मिश्रीमैंए केब्छैंमैं तबइँले फ्रेमिंइ! 11 याहवेह ताँन् देवतामैं भन्दा थेब मुँना बिसि ङइ तोगो सेइ, तलेबिस्याँ मिश्रीमैंइ इस्राएलीमैंए फिर आछ्याँबै के लमा खीजी चमैंलाइ जोगेमिंइ।” 12 च लिउँइ मोशाए क्यें यित्रोइ परमेश्‍वरए ल्हागिर मिइ ख्रोंबै ख्रो नेरो अरू भेटिमैं या पिंइ। झाइले हारून नेरो इस्राएलर्बै चिबनाँब्मैं मोशाए क्यें यित्रोने परमेश्‍वरए ओंसों क्हें चबर खइ।

13 प्हन्हाँगधों मोशा म्हिमैंए निसाफ लबर टिमा न्हाँगउँइँले ङेसा समा म्हिमैं मोशाए कारग्युले टिइ। 14 मोशाइ म्हिमैंए ल्हागिर लबै ताँन् केमैं मोशाए क्येंइ म्रोंसि चने ङ्योएइ, “क्हिइ चु म्हिमैंए ल्हागिर लबै के तो जा? क्हि घ्रि मत्‍त्रे तले निसाफ लबर टिरिमुँ? छलेन म्हिमैं न्हाँगउँइँले ङेसा समा तले क्हिए कारग्युले रारिमुँ?”

15 मोशाइ ह्रोंसए क्येंने बिइ, “म्हिमैं ङ ङाँइँले परमेश्‍वरए इच्छा क्होबर खम्। 16 चमैं न्होंरि आक्ह्रिबै ताँमैं तोइ मुँस्याँ चमैं ङ ङाँर खम्, धै ङ चमैंए म्हाँजोरि निसाफ लमिंब्मुँ। छलमा ङइ चमैंने परमेश्‍वरए ठिममैं बिमिंब्मुँ।”

17 मोशाए क्येंइ चने बिइ, “क्हिइ लबै चु के छ्याँब आत। 18 छलमा क्हि नारब्मुँ क्हि ङाँर खब्मैं या नारब्मुँ। तलेबिस्याँ क्हिए ल्हागिर चु के बेल्‍ले गारो मुँ। क्हि घ्रिइ चु के लल् खाँरिब् आरे। 19 तारे ङए ताँ थेद्। परमेश्‍वर क्हिने बालु तरिगे बिसि ङ क्हिलाइ सल्‍ला पिंब्मुँ, बरु क्हि म्हिमैंए आक्ह्रिबै ताँ परमेश्‍वरए ओंसों बोब छ्याँब मुँ। 20 क्हिइ चमैंलाइ परमेश्‍वरजी बिबै ताँमैं नेरो चमैंइ छ्ह खैले थोल् त्हुम् बिबै ताँ नेरो चमैंइ लल् त्हुबै केमैं चमैंलाइ लोमिंन्। 21 दिलेया म्हिमैंए न्होंउँइँले ह्रब्-सेबै म्हिमैं त्हाँन्। चमैं परमेश्‍वरने ङ्हिंब्मैं, बिश्‍वास योग्यर्बै म्हिमैं, आछ्याँबै केमैं आलब छ्याँबै के लबै म्हिमैं तल् त्हुम्। चमैं हजार-हजार, प्र-प्र, ङ्‍हच्यु-ङ्‍हच्यु नेरो च्यु-च्युए फिर चिब तबर त्हाँन्। 22 चमैंइ खोंयोंइ बिले म्हिमैंए आक्ह्रिबै ताँमैं क्ह्रिमिंबै के लरिगे। थे-थेबै आक्ह्रिबै ताँमैं बिस्याँ चमैंइ क्हि ङाँर पखरिगे, दिलेया च्योंबै ताँमैं चमैंइन क्ह्रिमिंरिगे। छ लस्याँ क्हिए के योंब्मुँ, तलेबिस्याँ चमैंज्यैया क्हिए ति नोबर ल्होमिंब्मुँ। 23 परमेश्‍वरजी बिब् धोंले क्हिइ लइ बिस्याँ क्हिइ चु के आनरल्‍ले लल् खाँब्मुँ, धै चु म्हिमैंया सैं क्होसि ह्रों-ह्रोंसए धिंर ह्‍याब्मुँ।”

24 छबिमा मोशाइ चए क्येंइ बिबै ताँ ङिंइ, धै खिइ बिब् धोंले ताँन् लइ। 25 मोशाइ ताँन् इस्राएलीमैं न्होंर ह्रब्-सेबै म्हिमैं त्हाँसि हजार-हजार, प्र-प्र, ङ्‍हच्यु-ङ्‍हच्यु, च्यु-च्युए फिर्बै चिब्मैं तल् पिंइ। 26 चमैंइ खोंयोंइ बिलै म्हिमैंए आक्ह्रिबै ताँमैं क्ह्रिमिंबै के लमल। क्ह्रिल् आखाँबै ताँमैं मत्‍त्रे चमैंइ मोशा ङाँर पखमल, दिलेया च्योंब ताँमैं चमैं खेंमैंन क्ह्रिमिंमल।

27 च लिउँइ मोशाइ ह्रोंसए क्येंलाइ मान लसि कुलइ, धै यित्रो ह्रोंसए ह्‍युलउँइ ह्‍याबै घ्याँ क्हाइ।