1 ङ्‍हरो लिउँइ ख्रो पिंबै खेगि क्रथे हननिया नेरो को-कोइ चिबनाँब्मैं नेरो तर्तुल्‍लस मिं मुँबै वकिल घ्रि चर युसि पावलए बिरोधर रोमी क्रथे ङाँर मुद्दा झोंइ। 2 म्हिमैंइ पावललाइ क्रथे ङाँर पखबै लिउँइ तर्तुल्‍लसइ चए फिर छ्याब् ल्हैदिबर होंइ, “चिब फेलिक्स, क्हिउँइँले ङिइ थेबै शान्ति योंरिइमुँ, क्हिइ ङिए ह्रेंए ल्हागिरि छ्याँबै केमैं लबर होंइँमुँ। 3 छतसि चु ताँ खोंयोंन् बिलै ताँन् क्ल्ह्‍योर ङिइ सैं तोंसि म्हाँदिम्। 4 दिलेया क्हिए ल्हें त्हे ङि आकिं। गार आम्हाँदिल्‍ले, ङिए च्युगुथिरि ताँ थेमिंन्।

5 “चु म्हिइ ह्‍युल तिगोंन् दुःख पिंदै प्रसि ताँन् यहूदीमैंए म्हाँजोर प्होंगि लवाम्, धै नासरतथेंए टोलिर्बै चिब तसि प्रब ङिइ स्याइमुँ। 6 चुइ यरूशलेमर्बै मन्दिर या अशुद्ध लल् म्हैल। छतसि ङिइ चुलाइ क्हाइ। [ङिए ठिमइ बिब् धोंले चुलाइ सजैं पिंदा ङ्हाँल। 7 दिलेया पल्टनर्बै चिब लुसियस ङि ङाँर खसि ङाँमाङाँज्युले ङिए योउँइँले चलाइ प्हेंसि क्हि ङाँर पखइ, धै चुए बिरोधर छ्याब् ल्हैदिब्मैं क्हि ङाँर ह्‍याद् बिसि कुलइ।]* 24:6-7 धाँसे ओंसोंबै योइ प्ह्रिबै कितबमैंरि चु ब्राकेट न्होंर्बै ताँफुँमैं आप्ह्रिल। 8 तारे क्हिइ चु म्हिए जाँच लइबिस्‍याँ ङिइ चुए फिर ल्हैदिबै छ्याबए बारेर क्हिइ चुउँइँलेन् था सेल् खाँम्।”

9 अरू यहूदीमैंज्यै या सुँ घ्रिन तसि “चइ बिबै ताँ क्ह्रोंसेंन् ग!” बिइ।

10 झाइले क्रथेइ चने पोंन् बिसि हस्त लबै लिउँइ पावलइ बिइ:

“क्हि ल्हें बर्ष ओंनोंन् चु यहूदी ह्रेंर्बै नियाधिश तइमुँ बिब ङइ था सेइमुँ। छतसि ङइ ह्रोंसए ताँ क्हिए उँइँर पोंल् योंमा ङ सैं तोंइमुँ। 11 ङ यरूशलेमर परमेश्‍वरए मिं क्वेबर ह्‍याब च्युसे ङ्हिं त्हिंइ भन्दा ल्हें आतइमुँ बिसि क्हि ह्रोंसैन था सेल् खाँम्। 12 चुमैंइ ङ खाब्ने या प्होंरिब आस्याइमुँ, धै मन्दिरर, च्हों धिंजरे, नेरो सहरर्बै म्हिमैंलाज्यै या सुरेदिरिब चुमैंइ आस्याइमुँ, 13 तोगो ङए फिर छ्याब् ल्हैदिरिबै ताँरै या चुमैंइ प्रमाण पिंल् आखाँ। 14 ङ क्हिए उँइँर चु ताँ बिमुँ: चु मुक्‍ति पिंबै घ्याँने चुमैंइ स्योर्गु घ्याँ बिम्, दिलेया ङ च घ्याँर प्रसि ङए खेमैंए परमेश्‍वरए मिं क्वेम्। धै मोशाइ पिंबै ठिमर मुँबै ताँ नेरो स्योंम्बै अगमबक्‍तामैंइ प्ह्रिबै कितबमैंर बिबै ताँन् ताँ ङइ क्वेंम्। 15 छ्याँब ने आछ्याँबै के लब्मैं ङ्हिंना-ङ्हिंन् सिइरि सोगों तम् बिसि चुमैंइ क्वेंब् धोंलेन् ङज्यै या परमेश्‍वरए फिर आशा थेंम्। 16 छतसि परमेश्‍वर नेरो म्हिमैंए उँइँर खोंयोंन् बिले ङए सैंइ लद् बिब् धोंले ठिक के मत्‍त्रे ङइ लबै भों लरिमुँ।

17 “ङ दे बर्ष अरू ह्‍युलजरे टिबै लिउँइ ह्रोंसए ह्रेंए ल्हागिर दान पिंबर नेरो परमेश्‍वरए मिंर ख्रो पिंबर यरूशलेमर खल।✡ 24:17 चिब्मैं २१:१७-२८ 18 चुमैंइ मन्दिरर ङलाइ त्होमा ङइ चोखो तबै के ताँन् लल् खाँल। चर म्हिए हुल नेरो खै‍ला-बैला तोइ आरेल, दिलेया एशियार्बै को-कोइ यहूदीमैं चर मुँल। 19 चमैं क्हिए उँइँर चुर मुल त्हुमल। ङए बिरोधर तोइ बिल् त्हुबै ताँ मुँस्याँ चमैं क्हिए ङाँर युसि छ्याब् ल्हैदिल् खाँमल। 20 आस्याँ, थेबै म्हि च्होंए उँइँर ङ रामा ङने तो गल्ति स्याइ बिसि चुर मुँबै म्हिमैंइन बिरिगे। 21 चु ताँ घ्रिर मत्‍त्रे चमैंइ ङए फिर छ्याब् ल्हैदिल् खाँम्। च तो जा बिस्याँ चमैंए उँइँर रासि ङइ थेबै कैले ओरसि ‘म्हिमैं सिइरि धबै सोगों तब्मुँ!’ बिल, च ताँए बारेर्न तिंयाँ क्हेमैंए उँइँर ङए फिर चु मुद्दा तरिइमुँ।”✡ 24:21 चिब्मैं २३:६

22 दिलेया फेलिक्सइ मुक्‍ति योंबै घ्याँए बारेर छेनाले था सेल। छतसि चु ताँमैं थेबै लिउँइ बिइ, “पल्टनर्बै चिब लुसियस चुर युबै लिउँइ ङइ क्हेमैंए मुद्दा फैसला लमिंस्यो।” 23 च लिउँइ फेलिक्सइ कप्‍तानने “पावल छेनाले रुँसि थेंन्, दिलेया ल्हें गार आलद्। चए थुमैंइ चैदिबै सैमैं चलाइ पिंबर खस्याँ खल् पिंन्,” बिइ।

24 दे त्हिंइ लिउँइ फेलिक्स ह्रोंसए यहूदी प्ह्रेंस्यो द्रुसिल्‍लाने बालु खसि पावललाइ हुइइ। धै ख्रीष्‍ट येशूए फिर बिश्‍वास लबै बारेर्बै ताँ चउँइँलेन् थेइ। 25 दिलेया “ठिक के लल् त्हुम्, आछ्याँबै के आलबर ह्रोंसए सैं फैल् त्हुम्, तलेबिस्याँ परमेश्‍वरजी निसाफ लबै त्हिंइ खसिन् मुँ,” बिसि पावलइ बिरिमा फेलिक्स ङ्हिंयाँइ, धै “तोगो मुँरिगे। क्हि ह्‍याद्। मौका योंबै त्हेर ङइ क्हि हुइस्यो,” बिइ। 26 चइ पावलउँइँले मुइ योंम् उ ङ्हाँसि आशा या लल। छतसि चइ घरि-घरि ताँ लबर पावल हुइब्रें लमल। 27 दिलेया ङ्हिंदिं लिउँइ फेलिक्सए क्ल्ह्‍योर पर्किअस फेस्‍तस बिबै क्रथे खइ। झाइले फेलिक्सइ यहूदीमैं सैं तोंन् लबर पावल झेलर्न वाथेंसि ह्‍याइ।