1 दिलेया तरे लिउँइ खबै त्हिंइ जरे बेल्‍ले ङ्हिंन् ङ्हाँबै दुःखए त्हे खब्मुँ, बिब सैंर मैंइ थेंन्। 2 च त्हेर म्हिमैंइ ह्रोंसलाइ मत्‍त्रे म्हाँया लब, मुइए लोब लब, ह्रोंसन् थेब् प्‍हैंब, सैं सार तब, अरूलाइ म्हि आलल्‍ले पोंब, आबा-आमाइ बिब आङिंब, खाबइ तो सै पिंलेया धन्यबाद आपिंब धै परमेश्‍वर आम्हाँदिब गुन् आरेब अपबित्र तब्‍मुँ। 3 धै खाब्ने खैबै म्हाँया लल् त्हुमु छ आलब, आगुए फिर ल्‍हयो आखब, अरूए फिर तोनतोर्न छ्याब् ल्‍हैदिब, आमादु, सैं सार तसि छ्याँबै ताँ आखोब। 4 अझै चमैंइ अरूलइ धोका पिंब, खैचिज्हिले पोंब, ह्रब् प्‍हैंब, परमेश्‍वरए सैं तोंन् लबै साटोर चमैं मोज-मज्‍जा लब् खोब। 5 चमैंइ सुँइ परमेश्‍वरलाइ म्‍हाँदिम् बिम्, दिलेया चमैंए सैंइ परमेश्‍वरए क्‍ह्रोंसेंन्‍बै शक्‍तिलाइ आक्‍वें। छाबै म्‍हिमैंउँइँले स्‍यो तद्। 6 तलेबिस्याँ चमैं न्होंरि को-कोइ धिं-धिंर होंसि पापइ प्लेंथेंब नेरो सैंर आछ्याँबै इच्छा मैंरिबै च्हमिरिमैंलाइ ह्रोंसए अधीनर थेंम्। 7 छाबै च्हमिरिमैंइ लोबम् लोमुँ, दिलेया क्ह्रोंसेंन्बै ताँ खोंयोंइ क्‍होल् आखाँ। 8 यान्‍नेस नेरो याम्‍ब्रेसइ मोशाए बिरोध लब् धोंले छाबै स्योलिबै ताँ लोमिंब्‍मैंइ क्ह्रोंसेंन्बै ताँए बिरोध लम्। छाबै म्हिमैं मदि न्होंयाब्मैं, बिश्‍वास लल् आखाँबै म्हिमैं ग।✡ 3:8 प्रस ७:११ 9 दिलेया चमैंए स्‍योर ताँ ल्हें समा टिक्दिरिब् आरे। तलेबिस्याँ यान्‍नेस नेरो याम्‍ब्रेसए स्योलिबै ताँ ताँनइ सेब् धोंले चमैंए स्योलिबै ताँ या ताँनइ था सेब्मुँ।

10 दिलेया क्हिइमि ङइ लोमिंबै ताँमैं, ङए बानि ब्योर, ङइ लल् म्हैबै केमैं, ङए बिश्‍वास, ङइ पैंल् खाँबै ताँ, ङइ लबै म्हाँया नेरो दुःख सैदिबै शक्‍ति म्रोंइमुँ। 11 एन्‍टिओखिया, आइकोनियम नेरो लुस्‍त्रार ङइ खै-खैबै दुःखमैं सैदिइ बिसि क्हिइ सेइमुँ। दिलेया प्रभुजी च ताँन् दुःखउँइँले ङ जोगेमिंइ।✡ 3:11 चिब्मैं १३:१४-५२; १४:१-२० 12 ख्रीष्‍ट येशए फिर बिश्‍वास लसि छ्ह थोदा ङ्हाँब्मैं ताँनए फिर दुःख तब्मुँ। 13 दिलेया आछ्याँबै के लबै म्हिमैं नेरो आगुलाइ लुब्मैंइ अरूमैंलाइ लुसि अरूमैंउँइँलेन् लुयासि चमैं झन्-झन् दुष्‍ट त-तै ह्‍याम्। 14 दिलेया क्‍हि बिस्याँ बिश्‍वासर भोंब् तसि ह्रोंसइ क्होबै क्ह्रोंसेंन्बै ताँइ बिब् धोंले के लरिद्। च क्ह्रोंसेंन्बै ताँमैं खाबइ लोमिंइ बिसि क्हिइ सेइमुँ। 15 क्‍हिइ कोलो ओनोंन् परमेश्‍वरए छ्वेर्बै ताँ सेइमुँ। च छ्वेर्बै ताँमैंइ ख्रीष्‍ट येशूए फिर बिश्‍वास लब्मैंइ खोंयोंइ आखाँबै छ्ह खैले योंम् बिबै ताँ लोल् खाँम्। 16 चु छ्वेर्बै ताँन् ताँ परमेश्‍वरए प्ल्हजी म्हिमैंने प्ह्रिबर ल्हैदिब् ग। छतसि चु छ्वेर्बै ताँमैं बेल्‍ले केर फेब् मुँ। क्‍ह्रोंसेंन्‍बै ताँ लोमिंबर, अर्थि बुद्धि पिंबर, न्होंह्‍याबै ताँमैं क्योंएँबर, छेनाले लोदा सैंदा लबर चु छ्वेर्बै ताँन् ताँमैं बेल्‍ले केर फेब् मुँ। 17 परमेश्‍वरजी कुल्मिंबै म्‍हि ताँन् छ्याँबै के लल् खाँसि छ्याँबै म्हि तरिगे बिसि खीजी चु छ्वे पिंब् ग।