8
बिश्वासीमैंइ अरू बिश्वासीमैंए ल्हागिर भेटि पिंब
1 ओ अलि-अङाँमैं, माकेडोनिया ह्युलर्बै बिश्वासीमैं न्होंरि परमेश्वरजी कति थेबै दयाम्हाँया लइ बिबै बारेर ङिइ क्हेमैंने बिम्। 2 चमैंए फिर थेबै दुःख तनबिलेया, चमैं बेल्ले ङ्हाँदुमैं मुँलेया चमैंइ बेल्ले सैं तोंदै थेबै सैं लसि अरूमैंलाइ ल्होबै ल्हागिर भेटि पिंइ। 3 ङइ क्हेमैंने चु ताँ ग्वाइ पिंल् खाँम्: चमैं ङ्हाँदुमैं मुँलेया सैं तोंदै ल्हें मुइ पिंइ। 4 “अरू बिश्वासीमैंलाइ ल्होमिंबै ल्हागिर ङिज्यै या भेटि पिंल् योंम्मा?” बिसि ङिने यो छ्युँ लइ।✡ 8:1-4 रोम १५:२६ 5 ङिए सैंर मैंब् धोंले चमैंइ आल, तलेबिस्याँ चमैंइ ओंसों ह्रोंसलाइ प्रभुने सुम्पिदिइ, धै परमेश्वरए सैंर मैंब् धोंले खीए के लबर चमैंइ ह्रोंसलाइन ङिने सुम्पिदिइ। 6 छतसि चु भेटि रेबै केर तीतसइ क्हेमैंलाइ ल्होरिगे धै क्हेमैंज्यै च छ्याँबै के पूरा लल् खाँरिगे बिसि ङइ चने यो छ्युँ लइमुँ। तलेबिस्याँ ओंसों ओंनोंन् तीतसइ छाबै के लसेन्मुँ। 7 क्हेमैं तोन्दोंरि सैर ओंसों बडिदै ह्याइमुँ: प्रभु येशूए फिर बिश्वास लबर, छेनाले ताँ पोंबर, ज्ञानर, भों खल्ले छ्याँबै के लबर, ङिए फिर म्हाँया लबर। छलेन छाबै छ्याँबै केमैं क्हेमैंइ ल्हें लरिगे बिब ङिए सैं मुँ।
8 ङइ क्हेमैंलाइ हुकुम पिंसि बिब आङिं, दिलेया अरूमैंइ भों खल्ले छ्याँबै के लब् म्रोंसि क्हेमैंए म्हाँया क्ह्रोंसेंन ङिंब् उ आङिं बिसि जाँच लबर ग। 9 तलेबिस्याँ ङ्योए प्रभु येशू ख्रीष्टजी ङ्योए फिर कति थेबै दयाम्हाँया लइमुँ बिब क्हेमैंइ सेइमुँ। येशू ख्रीष्टने तोन्दोंरि सै मुँलेया क्हेमैंए ल्हागिर ङ्हाँदु तइ। तलेबिस्याँ खीए ङ्हाँदुउँइँले क्हेमैं प्लब् तरिगे बिब खीए सैं मुँल।
10 क्हेमैंइ तुग्युमसेरो भेटि पिंबै के तों मत्त्रे आल, दिलेया ओंसों ओंनोंन् चु के लबै सैं क्हेमैंल मुँल। छतसि तारे चु के पूरा लस्याँ क्हेमैंए ल्हागिर छ्याँब तमुँ बिसि ङइ चु केर सल्ला पिंम्। 11 छतसि तोगो क्हेमैंइ तों लबै के या पूरा लद्। खैले क्हेमैं च के लबर तयार मुँल, छलेन क्हेमैंइ पिंल् खाँब् दे पिंसि च के पूरा लद्। 12 तलेबिस्याँ पिंबै सैं मुँस्याँ क्हेमैंइ पिंल् खाँब् दे पिंबै भेटि म्रोंसि परमेश्वर सैं तोंम्। आरेस्याँ म्हैसि पिंल् आत्हु। 13 क्हेमैंलाइ गारो तरिगे अरूलाइ ल्हें योंरिगे बिसि ङइ चु ताँ बिब आङिं, दिलेया ताँन् बराबर तरिगे बिबै ङए सैं मुँ। 14 छलेन अरूमैंइ लिउँइ ल्हें योंमा क्हेमैंलाइ खाँचो तबै त्हेर क्हेमैंलाइ ल्होरिगे बिसि तिंजोरो क्हेमैंने ल्हेन् मुँसेरो चमैंए खाँचो तबै त्हेर चमैंलाइ ल्होल् त्हुम्। छलस्याँ ताँन् बराबर तब्मुँ। 15 परमेश्वरए छ्वेरै या मन्ना बिबै चबै सै खुमा बराबर तबै ताँ छले प्ह्रिइमुँ,
“ल्हें खुबै म्हिने तोइ आचै,
च्युगुदे खुबै म्हिने या खाँचो आत।”✡ 8:15 प्रस १६:१८
पावलइ ह्रोंस् भन्दा ओंसों तीतस कोरिन्थ सहरर कुल्मिंब
16 परमेश्वरलाइ धन्यबाद तरिगे, तलेबिस्याँ खीजी तीतसलाइ क्हेमैं ल्होमिंबै सैं पिंइमुँ। 17 छतसि ङिइ बिबै ताँ ङिंसि मत्त्रे आङिं, चइ सैं न्होंउँइँलेन् क्हेमैं ङाँर ह्याबै सैं लसि क्हेमैं ङाँर खसिन्मुँ।
18 ङिइ तीतसने अर्को अलि या कुलसिन् मुँ। सैं तोंबै ताँ बिप्रमा ताँन् क्ल्ह्योर्बै बिश्वासीमैं न्होंरि च अलि मान योंसि मिं कालिदिइमुँ। 19 च्हौ मत्त्रे आङिं, प्रभुए मिं थेब् तबै के लबै ल्हागिर नेरो ङिलाइ ल्होबर ताँन् क्ल्ह्योर्बै बिश्वासीमैंइ ङिने ह्यारिगे बिसि चलाइ त्हाँइ।
20 सैं प्ल्हसि पिंबै चु भेटिए बारेर खाबज्यै ङिलाइ छ्याब् आल्हैदिरिगे बिब ङिए सैं मुँ। 21 ङिइ परमेश्वरए उँइँर मत्त्रे आङिं, म्हिमैंए उँइँरै या ठिक के लम्।✡ 8:21 हितो ३:४
22 चमैंने ङिए अर्को बिश्वासी अलि या क्हेमैं ङाँर कुल्मिंइमुँ। च अलिलाइ ङिइ ल्हें खे तोन्दोंरि सैर जाँच लमा चल छ्याँबै के लबै सैं मुँ बिब ङिइ सेल् खाँइमुँ। तोगो च अलिइ क्हेमैंए फिर बेल्ले भर म्हाँदिसि अझै छ्याँबै के लबै सैं लइमुँ।
23 तीतस बिस्याँ ङए थु तसि ङने बालुन् क्हेमैंलाइ ल्होबै के लम्। चने बालु खबै अरू अलिमैं ख्रीष्टए मान तबै के लबर बिश्वासीमैंइ कुल्मिंब् ग। 24 चमैंए फिर क्हेमैंइ कति थेबै म्हाँया लम् बिसि चमैंने उँइँन्, झाइले ङिइ क्हेमैंए बारेर प्हैंसि पोंबै ताँ क्ह्रोंसेंन् मुँना बिब ताँन् क्ल्ह्योर्बै बिश्वासीमैंइ सेरिगे।