1 तारे कुर चडेबै चबै सैए बारेर ङ ताँ लम्।

“ङि ताँन् ह्रब-सेब् मुँ” बिबै क्हेमैंए ताँ ठिकन् ग। दिलेया ह्रब-सेब् मुँ बिसि क्हेमैं ह्रोंसन् थेब् प्हैंइमुँ, खाबइ आगुए फिर म्हाँया लमुँ, चइ अरूमैंलाइन थेब् लमिंम्। 2 खाबज्‍यै या “ङइ तोन्दोंरि ह्रइमुँ” बिलेया ह्रल् त्‍हुबै ताँ चइ तोइ या आह्रइमुँ। 3 दिलेया परमेश्‍वरउँइ सैं एसि खीलाइ म्हाँया लबै म्हिलाइन परमेश्‍वरजी ङो सेम्।

4 छतसि कुर चडेबै सै चल् तम् उ आत बिबै ताँ ङ्योइ सेइमुँ, “परमेश्‍वर घ्रि मत्‍त्रे मुँ, कु परमेश्‍वर आङिं।” कु म्हिए योइ बनेबै सै मत्‍त्रे ग। 5 मु नेरो पृथ्‍बीर ल्हें “देवतामैं” नेरो ल्हें “प्रभुमैं” मुँलै। छाबै केर आफेबै देवतामैं नेरो प्रभुमैं मुँलेया 6 ङ्योए ल्हागिरि घ्रि मत्‍त्रे परमेश्‍वर आबा मुँ। खीजीन् तोन्दोंरि सै बनेइ, छतसि खीए ल्हागिर्न ङ्यो सोम्। धबै ङ्योए ल्हागिरि प्रभु घ्रि मत्‍त्रे मुँ, खी येशू ख्रीष्‍ट ग। खीउँइँलेन् ताँन् सैमैं तखइ, धै खीउँइँलेन् ङ्यो सोल् योंम्।

7 दिलेया ताँन् बिश्‍वासीमैंइ चु क्ह्रोंसेंन्बै ताँ छेन्‍ले आसेइमुँ। ङ्यो न्‍होंरि कोइ म्‍हिमैंइ ओंसों ओनोंन् कुलाइ चडेबै बानि मुँबइले “कुलाइ पिंबै सै कुल्न ग” बिसि अझै मैंम्। छतसि चमैंइ छ्याँब आछ्याँब छेनाले फेलल् आखाँबइले च कुर चडेबै सैमैं चल् आत बिसि मैंम्। 8 दिलेया चबै सैइ ङ्यो परमेश्‍वरए ङाँर बोल् आखाँ। कुर चडेबै सै चलैया आचलैया ङ्योलाइ नोक्‍सानै आत, फायदै आत।

9 बरु छेन्ले मैंन्! क्हिइ तोइ आमैंन्ले कुर चडेबै सै चलेन् तम् बिसि चबइले बिश्‍वासर आभोंबै म्हिमैं पापर आच्होरिगे। 10 तलेबिस्याँ क्‍हिइ कुर चडेबै सै चलेन् तम् बिसि कु थेंबै मन्‍दिरर कुर चडेबै सैमैं चरिब बिश्‍वासर आभोंबै म्हिमैंइ म्रोंइ बिस्याँ चमैंज्‍यै या कुर चडेबै सै चलेन् तमना बिसि आचलै वा? 11 क्हिइ चबै सै तो चलेन् तम् बिसि चबइले बिश्‍वासर आभोंबै अलिमैं पापर च्होम्। च बिश्‍वासर आभोंबै अलिए ल्हागिरै या ख्रीष्‍ट सिब् ग। 12 छले क्हेमैंइ बिश्‍वासर आभोंबै अलिलाइ पापर च्होवासि ख्रीष्‍टए बिरोधर पाप लइमुँ। 13 छतसि बिश्‍वासर आभोंबै अलिलाइ ङइ चबै सैइ पापर च्होवाम् बिस्‍याँ, कुर चडेबै सै ङइ खोंयोंइ चरिब् आरे।