Bbaruha gya Pau̱lo hali
Bagalati̱ya
Kwanjuura
Bbaruha gigi gya Bagalati̱ya gyahandi̱i̱ki̱i̱rwe Pau̱lo, mukwenda wa Yesu̱ Ku̱ri̱si̱to (1:1). Pau̱lo anihirwa kubba yaahandi̱i̱ki̱ri̱ bbaruha gigi naali mu rub̯uga lwʼEfeeso rundi lwa Koli̱nso harabi̱ri̱hoona myaka, mili hakati̱ wa 54 na 58, Yesu̱ Ku̱ri̱si̱to amaari̱ kubyalwa. Yaagi̱handi̱i̱ki̱i̱ri̱ bitebe bya beikiriza ba Ku̱ri̱si̱to, bab̯wo banyakwicalanga mwisaza lya b̯ukama b̯wa Baru̱u̱mi̱ li̱beetengi̱ Galati̱ya.
Mu b̯u̱su̱mi̱ b̯wa Pau̱lo b̯u̱yaahandi̱i̱ki̱i̱ri̱mwo Bbaruha gigi, kitebe ki̱kyo kya beikiriza, kyalingimwo Bayudaaya na Banyamahanga. Bei̱tu̱ kandi Bayudaaya bamwei̱ beegesyengi̱ nzegesya gya b̯u̱gobya ginyakuhambirizanga Banyamahanga bei̱ki̱ri̱ri̱i̱ze mu Ku̱ri̱si̱to kandi bahondere biragiro bya Bayudaaya bya mu Kiragaanu Kikadei, na maani maani bahondere kiragiro kya kusalwa. Nahab̯waki̱kyo, Pau̱lo yaahandi̱i̱ki̱ri̱ bbaruha gigi ku̱lwani̱sya gi̱gyo nzegesya gya b̯u̱gobya.
Kintu kindi de, beegesa bab̯wo baagayengi̱ Pau̱lo batakumutwala kubba mukwenda wa Yesu̱ Ku̱ri̱si̱to mu̱terekereru̱. Ki̱kyo kyaheeri̱ Pau̱lo kwesobooraho naatonganiira b̯u̱sobozi̱ b̯wamwe b̯uyaalingi nab̯wo nka mukwenda wa Yesu̱ Ku̱ri̱si̱to (1:11—2:14). Kandi de, yaasoboleeri̱ nti, muntu tasobora kujunwa kutoolahogana ei̱ki̱ri̱ri̱i̱ze mu Yesu̱ Ku̱ri̱si̱to (2:16). Yoolokeerye nti kujunwa kwi̱zaho kwahi hab̯wa bikorwa bya muntu, bei̱tu̱ kwi̱za hab̯wa mbabazi̱ za Ruhanga zaagiriira muntu.
Bicweka Bi̱handu̱ bya mu kiki Kitabbu nka Ku̱bi̱honderegeeni̱
(i) Pau̱lo naatandika bbaruha na ku̱ramu̱kya beikiriza bya Galati̱ya 1:1-10
(ii) Pau̱lo naasoboora bintu bikumukwataho 1:11—2:21
(iii) Pau̱lo naasoboora mugasu gwa biragiro na mbabazi̱ mu kujunwa 3:1—4:31
(iv) Pau̱lo ni̱yeegesya mwikiriza wa Ku̱ri̱si̱to nka kwakusemeera kwicalanga 5:1—6:10
(v) Bi̱ramu̱kyo na kulamba 6:11-18
1
Bi̱ramu̱kyo Kuruga hali Pau̱lo
1 Bbaruha gigi gi̱ru̱gi̱ri̱ hali gya Pau̱lo mukwenda; atatu̱mi̱i̱rwe bantu rundi muntu, bei̱tu̱ munyakutumwa Yesu̱ Ku̱ri̱si̱to Mukama weetu̱ na Ruhanga Bbaawe munyakuhimboola Yesu̱ kuruga mu baku̱u̱. 2 Gya, hamwei̱ na bei̱ra bange bandi nabo, ni̱tu̱baramu̱kya nywe bitebe bya beikiriza ba Yesu̱ ba mwisaza lya Galati̱ya.
3 Ni̱tu̱baramu̱kya mu mbabazi̱ na b̯u̱si̱nge b̯wa Ruhanga na Mukama weetu̱ Yesu̱ Ku̱ri̱si̱to, 4 yogwo munyakwehayo kutujuna kuruga mu bibii byetu̱, na kutujuna kuruga mu nsi gigi gya bibii, ku̱si̱gi̱ki̱ra mu kwendya kwa Ruhanga Bbaa weetu̱ kuyaali nakwo. 5 Ruhanga yogwo ahaariizib̯we biro na biro. Amiina.
Tihaloho Makuru Garungi Gandi
6 Nkuhuniira hoi̱ kuwona ni̱mu̱kwi̱ru̱ka kuruga hali yogwo munyakubeeta kubajuna bibii byenyu̱ mu mbabazi̱ za Ku̱ri̱si̱to, nimukuhondera bigambu bindi bya bandi bibakweta makuru garungi; 7 kandi b̯u̱b̯wo gali kwahi Makuru Garungi. Bei̱tu̱, ki̱zooki̱ri̱ nti, haloho bantu bamwei̱ batabatab̯wi̱ri̱ bigambu bya Ruhanga, nibagyendeera kuhenehenera Makuru Garungi ga Yesu̱ Ku̱ri̱si̱to. 8 Kadi nab̯utwakabba nituli twetwe baaba, rundi malayika mutumwa wa Ruhanga ali mu ku̱tebya makuru garungi gandi, gatali gagwo gatwabatebereerye, yogwo muntu akyenwe. 9 Nka ku̱twabaweereeri̱ kadei, na hataati̱ kyokyo kikumpa ku̱b̯u̱ni̱a kubaweera nti: kakubba muntu abateberya Makuru Garungi gatali gagwo gamwei̱ki̱ri̱ri̱i̱zemwo, yogwo muntu akyenwe.
10 Hati̱ mu̱kwendya kukoba, nkubaza yatyo hab̯wa kwendya kwenolya hali bantu, rundiki hab̯wa kwendya kubba murungi hali Ruhanga? Rundi mukuteekereza nti, nkwendya kubba murungi mu bantu? B̯u̱nyaku̱bbeeri̱ nindi muntu akukora aleke bantu bansi̱i̱me, nyaakabba ntali omwei̱ hali bab̯wo bakukoora Yesu̱ Ku̱ri̱si̱to.
Pau̱lo Nka Ku̱yei̱zi̱ri̱ Kubba Mukwenda
11 Beikiriza bei̱ra bange, nkwendya mwi̱cale mu̱kyegi̱ri̱ nti, Makuru Garungi ganyabatebeerye bitakabbe bigambu bikuruga hali muntu. 12 Bi̱byo bigambu ntakabitunge kuruga hali muntu yensei̱, rundi muntu wondi yensei̱ ku̱bi̱nzegesya, kyonkei nyaabi̱tu̱ngi̱ri̱ mu kuwonekerwa kunyakuruga hali Yesu̱ Ku̱ri̱si̱to.
13 Kubba nanywe nziicala gyange gya kubanza na kubanza gya nzikiriza gya Kiyudaaya mwagyegwi̱ri̱, nka ku̱nyaalwani̱si̱i̱rye hoi̱ kitebe kya beikiriza ba Yesu̱, nyeekambira ki̱mwei̱ ku̱bazi̱kya. 14 Kandi de, mu̱kyegi̱ri̱ nka ku̱nyaali̱ngi̱ mu̱ku̱gu̱ na kukira Bayudaaya bandi bensei̱ ba mu̱hi̱hi̱ gwange mu kuhondera nzikiriza gya Kiyudaaya; nyaali omwei̱ ha bantu banyakubba beehereeriyo ki̱mwei̱ ku̱kwera nzikiriza gya bahaaha beetu̱. 15 Bei̱tu̱ Ruhanga yogwo munyakumbona b̯wondi̱ kadei, ntakabeeri̱ na kubyalwa,* 1:15 Bbai̱bbu̱li̱ zindi zi̱koresya: ntakabbeeri̱ kwemetwa mu nda gya maama. yankomi̱ri̱ yanfoora kubba mutumwa waamwe ku̱si̱gi̱ki̱ra mu mbabazi̱ zaamwe. Kandi b̯u̱yendeerye, 16 yaacwi̱ri̱mwo nyaawonekerwa Mwana waamwe, aleke mu kuwonekerwa ku̱kwo, nsobore ku̱tebeerya Banyamahanga Makuru Garungi gakukwatagana na Yesu̱ Ku̱ri̱si̱to Mwana wa Ruhanga. Kandi ha b̯wi̱re b̯u̱b̯wo, ntakagyende hali muntu wondi yensei̱ ku̱mweb̯u̱u̱lyaho, 17 rundi ntakagyende mu rub̯uga Yeru̱salemu̱ kweb̯u̱u̱lyaho hali bab̯wo banyakumbanza kubba bakwenda ba Yesu̱; bei̱tu̱ nyaakoleeri̱ho, nyaagyenda mu kicweka kibeeta Arabbi̱ya, kasi hei̱nyu̱ma, nyei̱ra mu Damasi̱ko.
18 Hei̱nyu̱ma gya myaka misatu, nyaagyendi̱ri̱ kuwona Keefa yeegebeerwe de nka Peeteru mu rub̯uga lwa Yeru̱salemu̱, nyei̱cala nayo kumala biro i̱ku̱mi̱ na bitaanu. 19 Tihaloho mukwenda wondi yensei̱ gi̱nyaaweeni̱yo, kutoolahoona Yakobbo, yogwo waab̯u Mukama weetu̱ Yesu̱ Ku̱ri̱si̱to. 20 Mu bibi bintu bi̱mbahandi̱ki̱i̱ri̱, Ruhanga abyegi̱ri̱ nka kubili bya mananu, tihalihoona kigambu kyensei̱ kya b̯u̱gobya ki̱mbawereeri̱.
21 Hei̱nyu̱ma gya Yeru̱salemu̱, nyaagyendi̱ri̱ mu bicweka bya Si̱ri̱ya na Ki̱li̱ki̱ya. 22 B̯u̱b̯wo, bitebe bya beikiriza ba Ku̱ri̱si̱to bya mu B̯uyudaaya baali batakambonanga; 23 bei̱tu̱ kandi, baalingi nibali na bigambu bi̱banzegwi̱ri̱ho bikukoba yati: “Yogwo mudulu mu̱nyaku̱tu̱lwani̱syanga, hataati̱ yooyo ali mu ku̱tebya nzikiriza gi̱yaagereeryeho kugaana bantu kuhondera.” 24 Mwomwo bensei̱ baahaariiza Ruhanga hab̯wa maani gaamwe ganyakunjuna.