16
Livalakaibala esaesa manuna
1 E Yeisu ina tovatotowanayao nakae livalakaibala goi ilatuuwokoidi idigo kana,
‘Tayamo toesaesa ikaaiyaka. Tauyana mana torugwáuta tayamo ina esaesa iruugwausi. E tomota sima toesaesayana yaina goi torugwáuta ina goyo sitalavaite sidigo kadi,
“Im torugwáuta im esaesa ikavavaalugedi.”
2 Tuwo ina torugwautayana iduduwe ima ilatuwoko idigo kana,
“Valem anove igoyo. Kūna guna esaesa rugwáuta bukina kwābi kūme kuvinimnēigu! Geya tuwaina guna esaesa kurugwausidi geya.”
3 E torugwautayana toinina yaina idigo kana,
“Rugwáuta ana paisewayana goi guna tomoya bogina bei ivalilivegu, tauna bei manakaegu? Geya itoboineguta paisewa moumouna aguinuwe. Ogu imayamaya bego tomota yaidi goi vaita manuna akawanoi. 4 Ee bogina ayagoi kaga bei aguinuwe bego tutayana rugwáuta ana paisewa goi ivalilivegu, tomota idi vada goi bei siuyaonegu.”
5 Tuwo tomota tamo tamo madi rowaga ina tomoya yaina iduduwedi sima. Tayamo ima torugwautayana idigo kana,
“Aivina am rowaga guna tomoya yaina?”
6 “Pútuma opo ma bayaoidi tayamo andedi (100)”, korotoyana kaena.
“Im buki kukābi, kutusōbu go, woilīm kwaisobūye ima pipti (50) kugīni!” torugwautayana kaena.
Tuwo moitamo, nakae iguinuwe.
7 Ituli ta torowaga ima torugwautayana idigo kana,
“E kom aivina am rowaga?”
“Witi ma bayaoidi adi badabada tayamo tausani (1,000)”, korotoyana kaena.
Torugwautayana idigo kana,
“Im buki kwābi go, kwaisobūye ima eita andedi (800) kugīni!”
Tuwo nakae korotoyana iguinuwe. E nakae torugwautayana iguinuwe torowaga liliudi yaidi. 8 Tuwo tomoyayana ina torugwáuta polapolaina ina guinuwa valena inove, ina kabitam manuna iyapaliye. Unana da poyapoya idi guinuwa goi madi kabitam gagaina toinidi idi bodao yaidi namliyeta kidi mavada goi sikaaiyaka idi kabitam. Tauna torugwautayana iyapaliye.
9 Ame yau alatuuwokoimi konōve: Da poyapoya idi esaesa goi tomota kovasiyanēdi bego tutayana kokámasa, aba kaiyaka vaatayaina goi bei siuyaonemi.‡ Siuyaonemi: Ameko da Giriki niyadi geya imavadeta. Itoboineda kada, ‘Sedao siuyaoneda’ go, aiyuwoina itoboineda kada, ‘Yaubada bei iuyaoneda.’
10 Guna nuwonúwana tuwaina ataligei. Avatauwa komi neta dogoi giyaidi manudi sinumisemi, dogoi gagaidi manudi nakae itoboinedi sinumisemi. Avatauwa komi neta dogoi giyaidi manudi kopola, dogoi gagaidi manudi nakae bei kopola. 11 Tauna neta Yaubada geya itoboineyeta poyapoya esaesaina goi inumisemi, e yábana esaesaina mooitamoidi goi nakae geya inumisemita. 12 Neta ituli ta tomota geya sinumisemita idi esaesa korugwausi, e toinimi imi esaesa Yaubada bei geya ivinimita. 13 Geya tayaamo tomota paakonina itoboine bei ina tomoyayao adi taiyuwo manudi ipaisewa yuwoyuwo. Bogina koyagoi. Tayamo bei ikaolilive be nakae ikubuyeve go, tayamo imatakoiye be nakae yaina toinina ikasale. Tauna geya itoboinemita Yaubada be esaesa manudi kopaisewa yuuwoyuwo.’† Mad 6:24.
Yeisu ina vatulúkwana
Parisi idi sinapu manudi
Parisi idi sinapu manudi
14 E Parisi esaesa nuwodi ilokonako, tauna Yeisu ina livalayadi siinovedi, Tauyana sivaponuponuye. 15 Tuwo Yeisu ilatuwokoidi idigo kana,
‘Komi tomota matadi goi toinimi kovayokoimi komi tokibóbwata. E kina go Yaubada nuwomi bogina iyagoidi bego komi toogoyoimi bei liuna kobabane. Bogina koyagoi. Kaga tomota sikailaagasidi bego aba wowoina moe aba kalagíwala Yaubada matana goi. 16 Tauyana ina Katukeda be nakae ina tokabivalavala idi buki sitalavaite bego ina kalibúbuna bei ima. Nakae sitalavaite ana kadókana Iyoni ima ina sowóduwo italavaite. Amo tutayana go, ima ame Yaubada ina kalibúbuna ina sowóduwo Valena Dedevina atalavaite bei boda liliudi atamyabidi sisiu.† Mad 11:12-13.
17 E yábana be poyapoya idi sáwala ikakapu go, Yaubada ina Katukeda goi geya tayaamo kaga giyaina bei itagau.† Mad 5:18. 18 Tauyana ina lovina nai ana sinapu manuna nakae. Ava koroto neta monena ivaisobuyebeso bego inaidámana ituli ta vavina yaina, e bogina iroerata.† Mal 2:14-16; Mad 5:32, 19:9; Mak 10:11-12; 1Ko 7:10-11. Go ava koroto neta vavina vaisobunayana inai, bogina iroerata.’
Livalakaibala toesaesa be Lasalo manudi
19 E Yeisu tuwaina Parisiyadi ivatulukoidi esaesa manuna idigo kana,
‘E tayamo koroto toesaesa. Ana kwama dedevidi be nakae adi maisa gagaidi iikotedi. Maliyalina tamo tamo mana uyáwana áika dedevina goi ikakáika.
20 E tayamo tokai yoina Lasalo‡a Lasalo: Diyuu niyadi goi ame youyana moe Eliyesa (Abv 15:2) o Eliyasa (Tat 6:3) go, ameko sikupo. Youyana ana yagoina moe Yaubada ivaita. toesaesayana ina kasa ana kaba siu goi ikanabalabala.‡b Ikanabalabala: Ame livalayana ana yagoina aiyuwo da Giriki niyadi. Tayamo mae nakae go, tayamo ana yagoina moe tomota sina Lasalo sikabi sinave toesaesa ina kasa ana kaba siu goi siyato ikaaiyaka. Lasaloyana sakavaina madabokina potu kaka. 21 Latuwona toina toesaesayana avana mgumguna goi ikáika bei gamona go, geya. Go sem ina kaiyaka igoyo toina nakae weiniya sima ina potu siyeemosidi. 22 E niga tokaiyana ikámasa go, anerose sikavale sinave Eberamo kikina. E toesaesayana nakae ikámasa namliyeta sivaliwoge. 23 Ikavava, tokámasa idi dadava goi mana gedageda matana ikandolaga aduwanau goi Eberamo igite go, kikina Lasaloyana ikaaiyaka. 24 Tuwo iduduwo idigo kana,
“E tubugu Eberamo, kunuwokapisiyēgu. Yeu sabeninimina ame pasina gedageda gagaina aalotowo. Tauna Lasalo kuetūne ina bego nimana bwae goi ivakutui go, ima maegu isavaibute bei igietule.”
25 Go kina Eberamo idigo kana,
“Tubugu, kunuwāisi boi nava maa yawoim am dedevina madabokina bogina kubabane go, kina Lasaloyana mou goyogoyoidi ibabanedi. E tuta ame goi kina Lasalo ana kipáiwala ibabane ameko go, kom sem gedageda kubabane. 26 Go tuwaina kai be komi nauyayanaida goi sasa gagaina ikaaiyaka bego avatau neta latuwona ameko goi isaidámana iwo moeko goi, geya itoboineyeta. O moeko goi latuwona ima ameko kai goi, nakae geya itoboineyeta.”
27 E kina toesaesayana idigo kana,
“Tubugu, moe tuwo bokoyo kwalāve. Go akawanoiyem bego Lasaloyana kuetune ina tamagu ina vada goi. 28 Segowo adi tainima amoko goi nava sikaaiyaka. Lasalo kuetūne ina tauyadi yaidi bego ikatumatalidi, govila bei kidi nakae simekoigu aba gedageda ame goi.”
29 Go kina Eberamoyana idigo kana,
“Geya. Buki kidi Mosese be nakae Yaubada ina tokabivalavalayao liliudi boi siiginidi nava sikaaiyaka yaidi. Idi livalayadi, tuwo semowo itoboinedi siinovedi be sikabikaaonedi.”
30 E kina toesaesayana kana,
“Tubugu Eberamo, moe nakae bei geya itoboineyeta, go sem neta tokámasa tayamo ina tauyadi yaidi bei situgavila.”
31 E kina Eberamoyana idigo kana,
“Neta Mosese be Yaubada ina tokabivalavalayao liliudi idi livala bei geya sinovedita, e nakae tomota tayamo neta ámasa goi itaoyamna ina yaidi, geya itoboineyeta itamyabidi situgavila.” ’
‡16:9 Siuyaonemi: Ameko da Giriki niyadi geya imavadeta. Itoboineda kada, ‘Sedao siuyaoneda’ go, aiyuwoina itoboineda kada, ‘Yaubada bei iuyaoneda.’
†16:18 Mal 2:14-16; Mad 5:32, 19:9; Mak 10:11-12; 1Ko 7:10-11.
‡a16:20 Lasalo: Diyuu niyadi goi ame youyana moe Eliyesa (Abv 15:2) o Eliyasa (Tat 6:3) go, ameko sikupo. Youyana ana yagoina moe Yaubada ivaita.
‡b16:20 Ikanabalabala: Ame livalayana ana yagoina aiyuwo da Giriki niyadi. Tayamo mae nakae go, tayamo ana yagoina moe tomota sina Lasalo sikabi sinave toesaesa ina kasa ana kaba siu goi siyato ikaaiyaka.