14
Yeisu ina kámasa be nakae Baloma Kimaasabaina
ina sowóduwo italavaitedi
ina sowóduwo italavaitedi
1 Yeisu tuwaina kana,
‘Taabu nukotomi taitáiya iiuyōi. Yaubada bogina koonumise, tauna yau nakae konuumisēgu. 2 Yau Tamagu ina vada goi aba kaiyaka badabadaidi sikaaiyaka. Neta moe nakae geya, bei alatuwokoimi. Yau anonoina bei imi kaba kaiyaka akatubayasidi.‡ Da Giriki niyadi geya imavadeta ameko. Itoboineda takaigavile kada, ‘Neta moe nakae, manakae? Bei alatuwokoimi bego anonoina bei imi kaba kaiyaka akatubayasidi? Geya ae?’ 3 Neta ana imi kaba kaiyakoyadi akatubayasidi, niga bei akaluvilamna ama akabimi yau yaigu goi kokaaiyaka bego nako goi yau akaaiyaka, e komi taiyao takaaiyaka. 4 Ago nako anonoina, e ana kenao bogina koyagoi.’
5 Go Tomasi idigo kana,
‘Tomoya, geya kayagoiyeta nako kunonoina. Bei manakaema enaoyana kayagoi?’
6 Go iya Yeisu idigo kana,
‘Yau Tauyagu enaoyagu, nakae yau Nanamsa Mooitamoina, yau yawana vau. Geya vatau tayaamo toinina itoboine ina Tamagu goi, go sem yau aguta goi itoboinemi. 7 Neta bogina koyagoigu, yau Tamagu nakae bei koyagoi. Go ame tuta be nakae tuta simamaima Tauyana kooyagoi nakae bogina kogitegite.’
8 Go iya Pilipo kana,
‘Tomoya, neta Tamam kuvatulukōima. Ame tauna latuwoma.’
9 Go iya Yeisuyana idigo kana,
‘Pilipo, tuta maanawena bogina yaimi goi akaaiyaka go, nava geya kuyagoiguta ae? Avatauwa neta bogina sigitegu, Tamagu nakae bogina sigite. Kom manakae kam,
“Tamam kuvatulukōima?”
10 Manakae? Geya kunumiseta bego yau Tamagu goi akaaiyaka nakae Tamagu yau goi ikaaiyaka? Ame livalayadi yau alatuuwokoimi moe geya toinigu guna nuwonúwana goi aboboredi geya. Ego Tamagu yaigu goi ikaaiyaka ina guinuwa iguinuwedi. 11 Konumisēgu bego yau Tamagu goi akaaiyaka nakae Tamagu yau goi ikaaiyaka. Go neta guna livala pasidi geya konumiseguta, e Tauyana ina guinuwayadi yau yaigu goi pasidi konumisegu. 12 Konumisēgu go, ame alatuuwokoimi konōve: Avatauwa komi neta konuumisegu, guinuwayadi yau aguuinuwedi, komi nakae bei koguinuwedi. Yau anonoina Tamagu yaina goi namliyeta Balomaina bei aetune iwo yaimi, tauna itoboinemi guinuwa toogagaidi toidi bei koguinuwedi. 13 Tuwo, kaga neta yoigu goi kokawanoiye Yaubada yaina, moe bei aguinuwe bego Yaubada ina togaga ana káeyana yau Natuna guna guinuwa goi avagitakoedoko tomota yaidi. 14 Kaga neta yoigu goi kokawanoiye yaigu, yau bei aguinuwe.’
15 Tuwaina Yeisu kana,
‘Neta komatakooiyegu, guna lovina bei kokabikaaonedi 16 be nakae yau bei akawanoi Tamagu yaina bei ami Tovapísiya ituli ivinimi bego yaimi goi ikaiyako vata. 17 Tovapisiyayana moe Baloma Kimaasabaina, Yaubada ana Nanamsa Mooitamoina ana tovagitákwana. Da poyapoya geya sigiteyeta nakae geya siyagoiyeta, tauna geya siuyaoneyeta. Komi yaimi goi Tauyana ikaaiyaka nakae nuwomi goi bei ikaaiyaka, tauna komi kooyagoi. 18 Giyakainava bei akalavemi go, komi geya kada gumalau nakae geya. Bei akaluvilamna amekoimi. 19 Tuta giyaina tuwaina akaaiyaka gobe akalavemi, e da poyapoya geya tuwaina bei siigitegu go, komi bei kogitemneigu. Yau aiyuwoina bei maa yawoigu, tauna komi nakae bei maa yawoimi.
20 Tuta amo goi bei komi koyagoi bego yau Tamagu goi akaaiyaka, komi yau goi kokaaiyaka, e yau komi goi akaaiyaka. 21 Avatauwa neta guna lovina siyaagoidi be nakae sikabikaaonedi, e amo tauyadi simatakooiyegu. E avatauwa neta simatakooiyegu, yau Tamagu nakae imatakoiyedi be yau amatakoiyedi be nakae toinigu avagitakodokoigu yaidi.’
22 Ituli ta Yudasa (tauyana geya guma Keriota geya) kana,
‘Tomoya, kom manakaem bei toinim kuvagitakoim kai yaima goi go, kidi da poyapoya yaidi goi geya?’
23 Yeisu idigo kana,
‘Avatauwa neta simatakooiyegu, e guna livala sikabiikaone go, yau Tamagu bei imatakoiyedi be kawokoidi yaidi goi kakaaiyaka. 24 Avatauwa neta geya simatakoiyeguta, e guna livala nakae geya sikabikaonedita. Go livalayadi koonovedi moe geya yau guna livala geya, go sem Tamagu guna Toetuna ina livala.
25 Ame livalayadi alatuuwokoimi tutayana nava yaimi goi akaaiyaka. 26 E iya go Tovapisiyayana yau yoigu goi Tamagu bei ietune iwo yaimi. Tovapísiya moe Baloma Kimaasabaina. E ame Tauyana kaga liliuna bei ivatulukoimi go, kaga liliuna bogina alatuuwokoimi bei ikavilevilemi. 27 Bei akalavemi go, guna yabobona yaimi moe tuboina. Yau guna tuboina avinimi. Go tuboinayana geya da poyapoya idi tuboina nakae geya. Taabu nukotomi taitáiya iiuyōi nakae taabu kokaateyōva. 28 Guna livala bogina konove kagu,
“Giyakainava akalavemi go, niga bei amekoimi.”
Tamagu itobukukuyuigu, tauna neta komatakooiyegu, bei kouyáwana bego ana Tamaguyana yaina goi. 29 Tuta ame goi kaga nava bei sisowóduwo bogina agimilatuwokoimi bego tutayana sisowóduwo, konumisegu.
30 Geya itoboineguta bei tuta maanawena tuwaina abobóbwara yaimi. Poyapoya ame ana tolovina imamaima bei ipoikíkina isanabodegu go, geya tayaamo goyo manuna itoboine iwowokoigu, 31 go sem itoboine da poyapoya siyagoi bego Tamagu amataakoiye. Nakae nakonakae Tamaguyana ikatumaataligu, nakae aguuinuwe.
Kotāoya be ame dadavayana takalāve.’
‡14:2 Da Giriki niyadi geya imavadeta ameko. Itoboineda takaigavile kada, ‘Neta moe nakae, manakae? Bei alatuwokoimi bego anonoina bei imi kaba kaiyaka akatubayasidi? Geya ae?’