35
Yakobo ikaaluvila ina Beteli tetelina
1 E tuta tayamo Yaubada Yakobo ilatuwoko idigo kana,
‘Yakobo, kutāoya, kugāla kūna Beteli goi kulokāsa go, dídiya kukaudakodāko, aba kasala kumadāgi Yau yaigu. Boi amo asayana goi tuwowom Iso yaina kusiya be nakae Yau toinigu asowóduwo yaim.’† Abv 28:11-17.
2 Ibóbwara ikavava, e Yakobo osenao ilatuwokoidi idigo kana,
‘Osegowo, neta tokwalu sikaaiyaka yaimi, kokalavēdi. Ikavava, kokimavadēmi ame nakae: Ami kwama kokalavēdi go, kwama vau kolosīdi. 3 Kokimavademi ikavava, e kōma tatūko tāna Beteli. Maeko goi dídiya bei akaudakodako, aba kasala amadagi Yaubada yaina. Tauyana boi guna kategeda goi inovegu be nakae ivaitegu. Amo tutayana go, ima ame tuta, Tauyana ivakiitaugu.’
4 Tuwo moitamo idi tokwaluyao sikabidi be nakae idi gipolu sikabidi, Yakobo sivini. Sivini inavedi alova gagaina Sekem kikina, e alovayana unana goi itavi. Itavi ikavava, dogoiyadi idodoidi, ivakumdi. 5 Ivakumdi ikavava, asayana sikalave siketoiya. Siketoiya go, amoko goi Yaubada toni kasa liliudi diboyadi ikayovaedi, e Yakobo ma natunao simatoitedi, tauna geya sivatapiyedita.
6 E kidi Yakobo sima Lusi. Lusiyana youyuwoina Beteli moe Kenani sinaena. 7 Amoko goi dídiya ikaudakodako, aba kasala imadagi Yaubada yaina. E asayana ivayou El Beteli.‡ El Beteli: Ame youyana ana yagoina moe Beteli ina Yaubada. Neta kunuwaisi amoko goi Yaubada toinina isowóduwo Yakobo yaina tutayana boi isiyasiya.
8 E niga Ribeka ina pákwana yoina Debora ikámasa go, alova gagaina asa Beteli kikina goi iitaoya, e unana goi sivaliwoge, tauna alovayana sivayou Aloni Bakuta.‡ Aloni Bakuta: Ame youyana ana yagoina moe alovayana unana goi aba táiya.
9 E Yakobo Padani Aram bogina ikalave go, ima Beteli. Amoko goi aiyuwoina Yaubada toinina isowóduwo tauyana yaina go, ikaipakuye, 10 e idigo kana,
‘Ame tutayana yoim Yakobo.
Go geya tuwaina bei tomota sivayoum Yakobo.
Go sem sivayoum Isileli.’† Abv 32:28.
Tauna amo tutayana Yakobo sivayou Isileli.
11 E Yaubada aiyuwoina Yakobo ilatuwoko idigo kana,
‘Yau Yaubada Tokalika.
Kom kususāila, tubumowo badabadaidi,
e bei tubumowo boda tayamo gagaina.
Tubumowoyadi goi boda badabadaaidi
be nakae tokalibúbuna maniyedi bei sisowóduwo.
12 Poyapoyayana boi Eberamo be Aisake aavinidi,
e ame tutayana avinim
be nakae nava bei tubumowo avinidi.’† Abv 17:4-8.
13 E ibóbwara ikavava, Yakobo ikalave go, ituko ina. 14 Ago amo asayana goi Yakobo dídiya tayamo ivatáoe namliyeta ikaipakuye Yaubada yaina, tauna didiyayana yatana oine bwaena be nakae oribe putumina isiwoidi. 15 Ikavava, asayana ivayou Beteli unana amoko goi Yaubada ivadigo.† Abv 28:18-19.
Reitiyeli ina kámasa tetelina
16 E Beteli sikalave go, asa Eparati nava aduwanau, e kenao goi Reitiyeli ina venátuna ana tuta ibabane. Ago moumou isaki yaina. 17 E tutayana iivenátuna, ana tovaita idigo kana,
‘Kwatepātu! Natum ame nakae koroto.’
18 E Reitiyeli bogina ikamakámasa go, idigo kana,
‘Natugu avayou Benoni.’‡a Benoni: Ame youyana Isileli tubunao niyadi go, ana yagoina moe guna mou goi natugu.
Kina go Yakobo ivayou Beniyamina.‡b Beniyamina: Ame youyana Isileli tubunao niyadi go, ana yagoina moe natugu koroto ana dedevina bei ibabane.
19 E Reitiyeli ikámasa. Ina kamasayana mlina Eparati kenaoina goi sivaliwoge. Eparatiyana youyuwoina moe Bedeliyema.‡ Bedeliyema : Ame youyana da Yudiya niyadi moe Betalekem. Ana yagoina moe beredi ana vada. Beta ana yagoina moe vada go, lekem moe beredi. 20 Sivaliwoge ikavava, Yakobo dídiya tayamo ikabi, e Reitiyeliyana ina valiwoga goi ivatáoe, moe valiwoga ana kaba kinana. Didiyayana ame tuta nava ikaaiyaka.
21 E kidi Isileli siketoiya sina asa Migadali‡ Migadali: Ame youyana Isileli tubunao niyadi go, ana yagoina moe vada aba yáusa. Vadayana tupwana ituko nakae yoguyogu adi tomatakavata itoboinedi simwera yoguyoguyadi sigitedi go, woiwoi siyausedi. Ederi goi sisiu sina dadavina sisowóduwo. E amoko goi idi yoyou parai siyowóidi. 22 E tutayana amoko goi sikaaiyaka, Rubeni ina Bila imasisiye. Bilayana moe Reitiyeli ina pákwana go, Isileli moneyuwoina. Imasisiye go, valena Isileliyana inove, tuwo gamona igoyo.† Abv 30:4, 49:4.
E Yakobo natunao adi badabada yawou aiyuwo. Tauyadi adi bíbina ame nakae:
23 Reya natunao koroto ame nakae: Rubeni kina Yakobo ina botomoya, Simion, Livai, Yuda, Isakara be Sebuloni.
24 Reitiyeli natunao koroto ame nakae: Iyosepa be Beniyamina.
25 Reitiyeli ina pákwana Bila natunao koroto ame nakae: Dani be Napatali.
26 Reya ina pákwana Silipa natunao koroto ame nakae: Gadai be Aseri.
E ame tauna Yakobo natunao koroto, tauyadi Padani Aram goi sibíbina.
Aisake ina kámasa tetelina
27 E Yakobo ikaluvila ina tamana Aisake ina kasa Mamre,† Abv 13:18. moe Asa Ariba kikina. Asayana youyuwoina moe Ebironi. Ego asa Mamre goi Eberamo be Aisake boi sisuvaadavada. 28 E Aisake ana tala tayamo andedi eiti (180) bogina ibabane, 29 e tauyana ikaitomoya, yawoina maanawena. Tuwo yawoina ikavava go, ina tamana be tubunao yaidi. Ikámasa ikavava, natunao Iso be Yakobo sivaliwoge.
‡35:7 El Beteli: Ame youyana ana yagoina moe Beteli ina Yaubada.
‡35:8 Aloni Bakuta: Ame youyana ana yagoina moe alovayana unana goi aba táiya.
‡a35:18 Benoni: Ame youyana Isileli tubunao niyadi go, ana yagoina moe guna mou goi natugu.
‡b35:18 Beniyamina: Ame youyana Isileli tubunao niyadi go, ana yagoina moe natugu koroto ana dedevina bei ibabane.
‡35:19 Bedeliyema : Ame youyana da Yudiya niyadi moe Betalekem. Ana yagoina moe beredi ana vada. Beta ana yagoina moe vada go, lekem moe beredi.
‡35:21 Migadali: Ame youyana Isileli tubunao niyadi go, ana yagoina moe vada aba yáusa. Vadayana tupwana ituko nakae yoguyogu adi tomatakavata itoboinedi simwera yoguyoguyadi sigitedi go, woiwoi siyausedi.