19
Sodoma be Gamora adí mtula tetelidi
1 E bogina lavilavi go, anerose adi taiyuwo bogina sisou sina Sodoma. Kina go Loti asa ana kaba siu goi iitusobu. Iitusobu, ikandobala aneroseyadi igitedi simamaima. Tuwo itaoya ina ivalobodedi ikauyagu yaidi go, ivatugúyala ikanakabobo, 2 e idigo kana,
‘Guna tomoyamoya, konōve. Kōma tāna yau imi pákwana guna vada sabamgo ame goi aemi konikīdi, kokaiyāka komasīsi. E vanuwo itomo nobuyana giyaina kotāoya, e kōna.’
‘Tuwo. Bareki goi bei kamasisi’, kidi kaedi.
3 Ago kina Lotiyana ilumakikinedi gagaina, tuwo sitagona, e taiyao sina ina vada goi sisiu. Sisiu, beredi pokaka igabu be nakae áika dedevina iwodugu. Iwodugu ikavava, ivaideda sikáika. 4 Sikáika ikavava, bego simasisi go, Sodoma korotoidi madabokidi, tubuwau be nakae tomoyamoya, sima vadayana sitaoyakobu. 5 Sitaooyakobu go, Lotiyana siduduwe sidigo kadi,
‘Loti e! Koroto maine lavilavi im vada goi sisiusiu nakoidi? Kwaiwoduwēdi bei kamasisiyedi!’† Tot 19:22-24.
6 Tuwo Lotiyana isowóduwo go, totom ikatunibode, 7 e ilatuwokoidi idigo kana,
‘Segowo, akawanoi yaimi bego moe dogoiyana goyogoyoina toina taabu koguuinūwe! 8 Konōve. Yau natugowo vevina adi taiyuwo amedi go, koroto taiyao geya simasisita. Neta kotagona, akabidi amedi avinimi go, kaga latuwomi koguinuwe yaidi toinimi kolovina, go sem ame korotoyadi taabu kobisiikonēdi unana tauyadi guna vada goi sikaiyaka, tauna itoboine avabodebodedi. Tauna taabu kobisiikonēdi!’
9 Go kidi korotoyadi sidigo kadi,
‘Geya! Kusiyāmo!’
Go taudiva kadi,
‘Iyaa! Ame tauyana ogaoga go, manakae? Bego itakinoida?’
Tuwo Loti silatuwoko kadi,
‘Ima guinuwa yaim bei igoyo toina.’
Tuwo Lotiyana sivatubibi nakae niboda sivalabelabene; latuwodi bego sikaugaegae, e sisiu. 10 Ago korotoyadi vada sinaena nimadi siyosale, Loti siyoisi, sibiu vada sinaena sibuvaisiu go, totom sikatunibode. 11 Ikavava, korotoyadi totom goi sikaaiyaka madabokiidi matadi siguinuwedi sikebo, tauna totom sikamyayai go, geya sibabaneyeta, go sem ana lusala ilausidi.† 2To 6:18.
12-13 Tuwo koroto adi taiyuwo vada sinaena sidigo kadi,
‘Loti, giyakainava bei ame asayana madabokina kamtulidi. Yauwe matana goi idi goyo bogina ivakaigaga, tauna ietunema kama bego kamtulidi. Tauna aivina im bodao amedi Sodoma sinaena? Neta natumowo o yaomowo o avakavamowo sikaaiyaka, e asa goi kwabīdi go, kosīya.’
14 E Loti vada goi isowóduwo ina natunao adi kamatakwanayao ibabanedi, e ilatuwokoidi idigo kana,
‘Kotāoya! Giyakainava bei Yauwe asa ame madabokina imtulidi. Tauna woilīmi kosīya!’
Go korotoyadi sinuwonúwana kadi, ‘Loti nakona ivaponuponu.’
15 E tomo ikaupesapesagi, aneroseyadi Loti sisatubetube sidigo kadi,
‘Woilīm! Monem be natumowo kwabīdi, kosīya, govila bei kokámasa tutayana asa ame ana liuna ibabane!’
16 Ago Lotiyana isabilibili go, Yauwe inuwokapisiye. Tuwo aneroseyadi Loti mana bodao nimadi siyoisidi sivakededi asayana sikalave. 17 Sivakededi asa goi siisowóduwo go, anerose tayamo idigo kana,† 2Pi 2:7.
‘Kosīya bei yawoimi koyavedi go, taabu kokaandovīla! Kolokōina kōna koya goi, govila bei kokámasa!’
18 Go kina Lotiyana idigo kana,
‘Tomoya, moe nakae geya! 19 Kunōve. Neta yau im pákwana kusoosalegu be nakae kulookategu, e tutayana Sodoma aná mtula goi, yawoigu kuyāve. Go kai geya itoboinemeta kasiya kana amo koyayana goi. Aduwanau isaki. Tauna taabu kueetunēma kana maeko goi, govila bei ame vailaiyana ibabanema, e kakámasa. 20 Kunōve. Asa amo dobala kugite giyaina. Asayana yomana nakae itoboinema kasiya kana amoko goi. Kutagōna kasiya kana amoko goi bei ama yava kababane.’
21 E kina idigo kana,
‘Kunōve. Im kawanoi nakae atagone. Amo asayana kudigedige geya amtulidita. 22 Go woilīmi kosīya kōna amoko goi. Geya tayamo kaga itoboinegu aguinuwe ana kadókana kosowóduwo asayana goi.’
Moe pasina asayana yoina Sowa.‡ Sowa: Ame youyana ana yagoina moe giyaina.
23 E tuwo níyala bogina ituko, e Loti isowóduwo Sowa goi. 24 E kina go Yauweyana yeu mana poiseni mokauna ibisilave yábana goi isou ina Sodoma be Gamora yaidi.† Mad 10:15, 11:23-24; Luk 10:12, 17:29; 2Pi 2:6; Yud 1:7. 25 Tuwo asayadi be nakae Iyoridani butumina naunina be nakae tomotaidi madabokidi imtulidi. 26 Go Lotiyana mlina goi monena inonoina ikandovila, e imalagurewa go, gurewayana moe soroti.† Luk 17:32.
27 E nobuyana giyaina Eberamo itaoya ina boi Yauwe taiyao sikaaiyaka kiyaudi. 28 Ikandosobu Sodoma be Gamora be nakae Iyoridani butumina madabokina igitedi, aubowoidi itukotuko limou aubowoina nakae.
29 E tutayana asayadi dadava amo goi Yauwe imtulidi, Eberamo inuwaisi, tauna itagona bego Lotiyana ina kasa goi isiya.
Loti ma natunao adi taiyuwo tetelidi
30 E Loti ma natunao adi taiyuwo Sowa goi sisowóduwo sina koya goi. Imatoita bego Sowa goi ikaiyaka, tuwo situko sina tukubu sinaena goi sikaaiyaka. 31 E sikaaiyaka, tuta tayamo natunao adi taiyuwo aditava sibobóbwara go, botomoya idigo kana,
‘Guna gómana, kita geya natudamo go, geya tayaamo koroto ikaaiyaka ameko bego tanai, taiyao tamasisi, e kidi goi takéuwama, tavenátuna nakae poyapoya ame sinapuna. Tamada ikaaiyaka go, giyakainava bei ikaitomoya, geya itoboineyeta ivanátuna. 32 Tauna ame taguinūwe: Tamadayana oine tavini inim ginagina iyaluwo. Niga baige tasiu tauyana tamasisiye, e kina goi takéuwama tavenátuna bei ida boda geya ikavaveta.’
33 Tuwo moitamo sabamgo goi tamadiyana oine sivini inim ginagina, e iyaluwo go, botomoya igimisiu tamana imasisiye. Ego tamadiyana geya iyagoiyeta ava tuta natuna isiu imasisiye be nakae ava tuta isowóduwo.
34 Niga go vanuwo itomo botomoya ana gómana ilatuwoko idigo kana,
‘Guna gómana kunōve. Nuwobuna tamada amasisiye. E sabamgo ame aiyuwoina oine tavini inim ginagina iyaluwo gobe kom kusīu tauyana kumasisīye, e bei tamada goi ida boda ikaiyako vata.’
35 Tuwo moitamo amo sabamgoyana goi tamadiyana oine sivini inim ginagina iyaluwo namliyeta baige bogomane isiu tamana imasisiye. Ego tamadiyana geya iyagoiyeta ava tuta natuna isiu imasisiye be nakae ava tuta isowóduwo.
36 E tauna natunao adi taiyuwokova tamadi Loti goi sikéuwama. 37 Sikéuwama, e botomoya ivenátuna, natuna koroto ivayou Moabe.‡ Moabe: Ame youyana Isileli tubunao niyadi goi ana taiyakeka nakae tamagu goi. Moabe tubuna tayamo yoina Ruti. Tauyana monena yoina Boase. Ame tauyana tubunao moe Devida be Yeisu. Niga tauyana tubunao yoidi Moabe† Rut 1:4, 4:17. go, ame tutayana nava sikaaiyaka. 38 E kina go bogomane nakae ivenátuna, natuna koroto ivayou Beni Ammi.‡ Beni Ammi: Ame youyana ana yagoina moe guna bodao natudi. Niga tauyana tubunao yoidi Ammoni, tauyadi ame tutayana nava sikaaiyaka.
†19:5 Tot 19:22-24.
†19:11 2To 6:18.
‡19:22 Sowa: Ame youyana ana yagoina moe giyaina.
†19:24 Mad 10:15, 11:23-24; Luk 10:12, 17:29; 2Pi 2:6; Yud 1:7.
‡19:37 Moabe: Ame youyana Isileli tubunao niyadi goi ana taiyakeka nakae tamagu goi. Moabe tubuna tayamo yoina Ruti. Tauyana monena yoina Boase. Ame tauyana tubunao moe Devida be Yeisu.
‡19:38 Beni Ammi: Ame youyana ana yagoina moe guna bodao natudi.