18
Mosese yaona Iyetoro
ina vaita takínona manuna
ina vaita takínona manuna
1 E yaogu Iyetoro, tauyana da Midiyani adi Tonúwala, Yaubada valena inove. Valayana ame nakae: Kaga liliuna Yauwe Yaubada iguinuwe kai ina bodao, yau be nakae Isileli tubunao liliuma manuma tutayana Isileli tubunao Itipita goi ikabima imema. 2 Yau boi monegu Sipora† Tat 2:21-22. ma natunao aetuneviledi sina Midiyani bego yaogu Iyetoro taiyao sikaiyaka. E Iyetoroyana itaoya, monegu nakae natumao adi taiyuwo ikabidi, 3 taiyao sima yaigu goi. Natugu tayamo yoina Gerasom.‡ Gerasom: Ame youyana Isileli tubunao niyadi goi ana taiyakeka nakae ogaoga amoko goi (Tat 2:22).† Gui 7:29. Boi kagu, ‘Yau ogaoga ituli ta kasa goi.’ Tauna yoina avayou Gerasom. 4 Natugu aiyuwoina yoina Eliyesa.‡ Eliyesa: Ame youyana ana yagoina guna Yaubada moe tovaita. Boi kagu, ‘Tamagu ina Yaubada guna tovaita. Pero nimana goi bogina iyavegu.’ Tauna gomanayana avayou Eliyesa.
5-6 Yau guna tunagu Yaubada ina koya‡ Yaubada ina koya: Ame Koya Sainai go, youyuwoina Orebi. kikina yoyowo goi akaaiyaka go, yaogu Iyetoro livala ietune ima kana,
‘Yau yaom Iyetoro monem ma natunao taiyao bei kao kavadadem.’
E tutayana sima, 7 yau ana yaoguyana avalobode. Asowóduwo tauyana yaina avatugúyala be nakae ayowoi. Ikavava, kagu,
‘Manakae? Dedevim?’
‘Dedevigu. Go kom?’ tauyana kaena.
‘Yau nakae dedevigu’, kaegu.
E kakauyagu ikavava, kana guna yoyou goi kasiu. 8 Yaogu alituwoko kaga liliuna boi Yauwe bogina iguinuwedi Pero be nakae da Itipita yaidi Isileli tubunao manudi. Nakae alatuwoko Isileli tubunao mou liliuna idi ketoiya goi sibabanedi go, Yauwe manakaena iyavedi. 9 E yaogu Iyetoro iuyáwana tutayana inove kaga liliuna dedevina Yauwe iguinuwe kai Isileli tubunao manuma. Nakae manakaena da Itipita nimadi goi iyavema. 10 Tuwo idigo kana,
‘Yauwe tayapalīye! Tauyana da Itipita nimadi be nakae Pero nimana goi iyavemi. 11 Ame tuta bogina ayagoi bego Yauwe kina yaubadao liliudi itogagasavedi. Moe moitamo. Dogoiyadi liliudi manudi sigagágasa Yauwe itogagasavedi.’
12 E tuwo yaogu yoguyogu ikabi igabu ivakasave go, ikasale Yaubada yaina. Aiyuwoina yoguyogu maniyedi vininabeso manuna ikasaledi Yauwe yaina. Ikavava, áika siguinuwe go, Eroni be nakae Isileli tubunao idi tomoyamoyayao liliudi taiyao sima, e Iyetoroyana taiyao Yaubada matana goi kakáika.
13 E vanuwo itomo ana atusobu tomota idi wowókana atakínona. E tomotayadi nobuyana ina lavilavi goi simamaima yau yaigu takínona manuna. 14 Go Iyetoro kaga liliuna aguuinuwe tomota manudi igitegite, tuwo idigo kana,
‘Ame kaga kuguuinuwe tomota manudi? Kaga unana kom amta kutakínona go, tomota adi takínona manuna situyáwata nobuyana go, ina lavilavi?’
15 Tuwo adigo kagu,
‘Unana go tomota toinidi sima yau yaigu bei Yaubada ina nuwonúwana siyagoi. 16 Neta tayamo mou isowóduwo, bei sima yaigu, e yau atakínona avatau moitamo be nakae Yauwe ina lovina be ina katukeda avatulukoidi.’
17 Go yaoguyana idigo kana,
‘Moe sinapuyana kuguuinuwe geya idedevineta. 18 Tuta giyaina moe paisewayana bei ilausim be nakae tomotayadi ilausidi. Bogina kuyagoi. Paisewayana moumou isaki yaim. Kom amta geya itoboinemta. 19 Tauna kunovēgu go, alatuwokoim kaga bei kuguinuwe. Neta sopagu kukabikaone, e Yaubada bei ivakitaum nakae ivaitem. Kom bei tomota adi katumapu nakae Yaubada yaina, tauna adi mou kumēdi Yaubada matana goi. 20 Yaubada ina lovina be ina katukeda kuvatulukodokōidi. Kuvatulukōidi nako enao dedevina be kaga nakae siguinuwe. 21 Go kom sem tomota liliudi yaidi goi koroto idi sinapu dedevina kukinavedokōidi ame nakae: Neta Yaubada sitaaimamine be nakae kidi aba numisa, nakae taabu siitagōna toogoyoidi idi goyo manuna sitakonedi, e moe tauyadi kuvayokōidi kidi totakínona nakae koroto tayamo tausani (1,000) adi totakínona, tayamo koroto andedi (100) adi totakínona, tayamo koroto pipti (50) adi totakínona, e koroto tayamo yawou adi totakínona. 22 Tauyadi kutagonēdi tuta liliuna tomota adi mou sitakinoidi go, mou gagaidi neta sisowóduwo, e madabokidi sivinim bei kom kutakínona. Go mou giyaidi, tuwo liliudi toinidi sitakinoidi, e bei yaim ikakapu nakae paisewayana goi sivaitem. 23 Neta moe nakae kuguinuwe be nakae Yaubada ilatuwokoim kuguinuwe, bei itoboinem kutogaga go, ame tomotayadi liliudi itoboinedi madi tuboina sikaluvila sina idi yoyou.’
24 E tuwo moitamo yaogu sopana akabikaone, e kaga liliuna ilatuuwokoigu nakae aguinuwedi. 25 Isileli tubunao liliudi yaidi goi koroto idi sinapu dedevidi akinavedi go, avayokoidi kidi tomota adi totakínona, tausani (1,000) be andedi (100) be pipti (50) be nakae yawou yaidi. 26 Tuta liliuna amo tauyadi tomota adi mou sitakinoidi. Neta mou gagaidi sisowóduwo, simedi yau atakinoidi go, mou giyaidi toinidi sitakinoidi.
27 E yaogu avaduduwe. Ikavava, tauyana ikaluvila ina toinina ina kasa.