1 Moitamo geya kawoita. Yau toinigu bogina alovina ame: Neta ao avadademneimi go, guna bolagu pasina aiyuwoina kokategedamna, bei geya awoita. 2 Neta yau pasigu kokategeda, e geya vatau tayaamo yaimi goi ikaaiyaka bei ivauyaonegu ae? 3 Nakae alovina, tauna boi nakae ami leta goi agini, govila bei ao kogienuwomouyegu. Ago itoboine komi kovauyaonegu! Bogina boi anumisa madabokimi yaimi bego yau guna uyáwana bei ivauyaonemi. 4 Amo letayana magu yogedageda gagaina be magu kategeda gagaina be magu táiya gagaina agini. Ago letayana aetune iwo geya bego kokategeda geya, go sem bego guna matakoi gagaina yaimi goi koyagoi.

5 E boi toogoyoina yaimi goi yau ategeda geya iviniguta, go sem komi madabokimi ategedayana ana kakainaki ituli ituli ivinimi. Go geya latuwogu bego guna bóbwara goi tauyana ina goyo bolotona akatusavi. 6 Madabokimi bogina koliune, e moe ina liunayana bogina yoiyana. 7 Tauna ame tuta ina goyo konuwotāo be kokipaiwōle, govila bei ina nuwomou ivakaigagasave. 8 Tauna akawanoi makimaki komi kolovina bego imi matakoi tauyana manuna kokamoitamoe be kokabivekovekomnei. 9 Moitamo nakae itoboinemi. Moe nakae boi letayana agini aetune iwo unana ame: Bego avakakonemi be ayagoi neta kaga liliuna alatuuwokoimi kokabikaonegu o geya. 10 E avatau neta ina goyo konuwotao, yau nakae anuwotao. Neta moitamo goyo tayamo iguinuwe, e kaga nakae bogina anuwotao, moe komi ami dedevina manuna Guyau matana goi anuwotao 11 bego Kaleya geya itoboineyeta ikatubauda. Ina sinapu tulutuludi bogina tayagoidokoidi.

12 E boi ana Tarowasi goi Guyau Valena Dedevina ana talavaita manuna. E ida Tomoya ina togaga goi totom ikatupáeva yau manugu bego valayana atalavaite yaidi go,† Gui 20:1. 13 balomaigu geya itoboineyeta iwaiwasi unana siyagu Taito geya ababaneyeta bego italavaitemi. Tuwo geya akaiyaketa, go sem sedao Tarowasi goi akalavedi go, ama ameko Mesadoniya goi asiu bego Taitoyana nakona ameko goi avalobode.

14 Go Yaubada yaina takauyagu unana tuta liliuna Tauyana yaviya ina tokalikumatana nakae ida spwagógana Guyau pasina ivakumgoiyeda bei tatogaga. Go Guyau valena moe emáina dedevina insensi nakae go, kai ima talavaita goi Yaubada ikaiwoduwe dadava liliudi bego tomota itoboinedi sisamkone, e bei Tauyana siiyagoi. 15 Guna nuwonúwana ataligei. Kai ima talavaitayana moe Guyau mainina dedevina nakae, e Yaubada ivauyaone go, avatauwa neta iiyavedi o avatauwa neta siivailai, liliudikova sinove. 16 Emainayana kidi siivailai sinove, moe ámasa mainina kaka nakae o tadigo kada, ‘Bei sikámasa.’ Ago kita Yaubada iiyaveda tanove, moe yawana vata kaka mainina nakae o tadigo kada, ‘Yawoida vata tababane.’ Go moe paisewayana Guyau Valena manuna avatau itoboine iguinuwe? Kaai go! 17 Moitamo. Maniyedi totalavaita polapola madi váobuna Yaubada ina livala sitaalavaite. Go kai amo tauyadi nakae geya, go sem kai geya ima polamo kataalavaita. Kai ima spwagógana Guyau taiyao pasina katalavaita go, moe paisewayana Yaubada ikawoima bei matana goi katalavaita.