Tokámasa idi taoyamna manuna
15
(1 Korinta 15:1-58)
Paulo ina livala itaalavaite
moe Yeisu moitamo itaoyamna
moe Yeisu moitamo itaoyamna
1 E segowo, Vala Dedevina boi bogina atalavaite yaimi goi, akavilevile. Vala Dedevinayana bogina kouyaone nakae yaina goi kotaoyaakavata, 2 e imi numisa Valayana goi Yaubada iyavemi, neta Valayana boi bogina yaimi goi ataalavaite koyoisikavate. Go neta imi numisa dogoi besobeso, e geya. 3 Boi Valayana anove go, dogoi gagaina Valayana goi moe avadamane yaimi. Dogoiyana moe ame nakae:
Guyau ida goyo pasidi†a Gal 1:4. ikámasa
nakae Gínina Kimaasabaidi sidige.†b Ais 53:5-12.
4 Aiyuwoina ina kámasa mlina sivaliwoge go,
maliyalina aitonina goi itaoyamna
nakae Gínina Kimaasabaidi sidige.† Ose 6:2; Mad 16:21; Iyo 2:21-22; Gui 2:24-32.
5 Ina taoyamnayana mlina isowóduwo Kepasi yaina goi†a Luk 24:34.
namliyeta kidi yawou aiyuwo yaidi goi. †b Mad 28:16-17; Mak 16:14; Luk 24:36; Iyo 20:19,26; Gui 10:41.
6 Niga ina taoyamnayana mlina tuta tayamo goi isowóduwo sedao adi badabada ainima andedi (500) nakae yaidi. Bodayadi yaidi goi badabadaidi nava sikaaiyaka go, maniyedi bogina sitagau. 7 Niga isowóduwo Yemesa† Luk 2:33,36-37. yaina goi, namliyeta isowóduwo ina vamoleyanayao madabokidi yaidi goi. 8 E aba lukavava goi isowóduwo yau yaigu† Gui 9:3-6,17; 1Ko 9:1; Gal 1:16. go, amalavamoléyana geya kidi Yeisu ina vamoleyanayao madabokidi nakae geya. Go sem yau matabuwogu amalavamoléyana nakae vavina neta ina tuta venátuna nava go, tuwo ivatoopa. 9 Moitamo. Kidi Yeisu ina vamoleyanayaoyadi yaidi goi yau toosobugu. Yaubada ana totugugunayao ayogedegededi,†a Gui 8:3. tauna geya itoboineguta sivayokoigu yau Yeisu ina vamoléyana.†b Epe 3:8; 1Ti 1:15. 10 Ego Yaubada ina kanuwóiya goi yau Yeisu ina vamoléyana tayamo. Go ina kanuwoiyayana yaigu goi ma basabasaina. Apoisógana gagaina go, guna poisoganayana goi Yeisu ina vamoleyanayao liliudi akalisavedi. Ago yau geya, go sem Yaubada ina kanuwóiya yaigu goi ipaaisewa. 11 Tauna nakona yau Vala Dedevina ataalavaite yaimi o tauyadi sitaalavaite yaimi goi go, Valayana tayamo kataalavaite yaimi, e konumise.
Neta Guyau ámasa goi itaoyamna,
ina bodao nakae bei sitaoyamna
ina bodao nakae bei sitaoyamna
12 E Guyau kataalavaite yaimi bego tokámasa yaidi goi Yaubada ikaitáoe, tauna kaga unana maniyemi yaimi kodigo kami,
‘Kita tomota ida kámasa goi bei geya tataoyamneta’?
13 E, neta ámasa goi taoyamna geya, e Guyauyana nakae geya itaoyamneta. 14 Go neta Tauyana geya itaoyamneta, e ima talavaita dogoi besobeso be imi numisa nakae dogoi besobeso. 15 E bogina katalavaite bego Yaubada Guyau ina kámasa goi ikaitáoe. Neta moitamo woi Yaubada geya ikaitaoeyeta o kada, ‘Tokámasa geya ikaitaoedita’ go, kai katalavaite bego moitamo tokámasa ikaitaoedi, e Yaubada manuna bogina kapolemi, tauna kai totalavaita polapola. 16 Moitamo. Neta tokámasa bei geya sitaoyamneta, e Guyau nakae geya itaoyamneta. 17 Go neta Guyau geya itaoyamneta, e ida numisa geya basabasainamo, nakae komi be yau ida goyo goi nava takaaiyaka. 18 Neta ame moitamo, kidi tokámasa nakae; boi mainao Guyau siinumise bogina adi liuna sibabanevatae. 19 Neta ida lotuta Guyau yaina moe tauna ame tuta ma yawoida manuna go, geya tayaamo kaga nava bei tababane, e itoboine bei tomota liliudi sigiteda kita aba nuwokapisi gagaina.
Yeisu igimitaoyamna namliyeta ina bodao
20 E moitamo kina go Guyauyana tokámasa yaidi goi bogina igimitaoyamna. Tauna moe aba kinana tayagoi tokámasa nakae bei sitaoyamna. 21 Taoyamna moitamo. Koroto tayamo goi ámasa isowóduwo, e nakae koroto tayamo goi tokámasa adi taoyamna isowóduwo. 22 Ame moitamo. Madabokidakova ida spwagógana Adama yaina pasina bei takámasa. E nakae madabokidakova ida spwagógana Guyau yaina pasina bei tataoyamna ma yawoida. 23 E kita tamo tamo mada tuta taoyamna manuna. Guyau ivakumgo namliyeta kita ina bodao ina tuta aluvila goi tataoyamna. 24 Moe ikavava, tuta ana kaba lukavava bei ima. Amo tutayana goi Guyau tolovina liliudi be aba togaga liliudi itauwedi. Ikavava, ina kalibúbuna Tamada Yaubada nimana goi iyato. 25 Moitamo. Itoboine ikaalibúbuna ana kadókana ina kaleyayao liliudi aena ogalaoina goi bogina iyatoidi.† Mad 22:44; Sam 110:1. 26 Ago ida kaleya vaamliyaina bei itauwe, moe ámasa. 27 Moitamo. Same tayamo ana togínina Yaubada ivadigo idigo kana,
‘Kaga liliuna aena ogalaoina goi bogina
kuyatoidi kuvasobusobuyedi.’† Epe 1:22; Ibe 2:8.
Same 8:6
Moe Guyau aena idigedige. Ego tutayana idigo kana, ‘Kaga liliuna ivasobusobuyedi’, bogina tayagoi moe geya Tovasobusobu taiyao unana Tauyana ivasobusobuyedi. 28 E tutayana kaga liliuna Yaubada Natuna nimana goi bogina iyatoidi, e Natunayana toinina ikasale Yaubada yaina. Tauyana lovina liliuna ana tokaiguyau. E Guyau toinina ikasale Yaubada yaina bego Yaubada moe kaga liliuna adi Tokalibúbuna. 29 Go neta tokámasa geya sitaoyamneta, e tomota sayóyova sibabane tokámasa pasidi bego nava bei itoboinedi sediyao kaamasidi taiyao sikaiyaka manakaedi sinuwonúwana siguinuwe? Neta taoyamna geya, kaga ana dedevina neta tomota maniyedi tokamasayadi pasidi sitagona sisayoyoidi? 30 Neta tokámasa geya sitaoyamneta, kaga ana dedevina kai Yeisu ina vamoleyanayao tuta liliuna aba vailai goi Yeisu valena kataalavaite? Geya! 31 Segowo, maliyalina tamo tamo ámasa matagu goi ikaaiyaka. Iyagoida! Abóbwara moitamo nakae ame moitamo: Komi manumi aedidigu asaamolai ida Tomoya Guyau Yeisu ina guinuwa yaigu pasina. 32 Boi Epeso goi akaaiyaka go, tomota woiwoi nakae avayaviyedi go, kita tomota ida nuwonúwana goi moe kaga kaaigiyana? Geya. Neta kita tonumisa nava bei ámasa goi geya tataoyamneta, ame tuta itoboine ida sinapu nakae tomota maniyedi idi bóbwara kadi,
‘Mada uyáwana takāika be tanīm!
Itomo nakona bei takámasa.’
Aiseya 22:13
33 Moe bobwarayadi pola. Tauna taabu sikatuubaūmi. Amo tauyadi kovakilisīdi o tadigo kada, ‘Neta toogoyoidi taiyao takabivekoveko, ida sinapu dedevina sikaigoyai.’ 34 Matami ilāla be konuwonuwana dōkana, e imi goyo goi tuwo, kosayāta. Maniyedi yaimi goi kotaiyaakekedi go, tauyadi Yaubada sitamogemogeye. Moe alatuwokoimi bego agieomaemaemi.
Taoyamna ana tuta wowana vau kobabane
35 Nakona tomota maniyemi taoyamna nava geya konumiseta, go sem kodigo kami,
‘Tokámasa manakaedi itoboinedi sitaoyamna? E wowodi bei nakonakae?’
36 Komi yaaluwoimi! Kaga taabaguli mainao itoboine ikámasa namliyeta itabo maa yawoina. 37 Kaga taabaguli moe kutukutu kaka. Nakona witi kutukutuna o ituli ta kutukutu tabaguli go, tutayana itabo, e ituli. Geya kutukutuyana mainao ana kaigigita nakae geya. 38 E kina go Yaubada toinina ina nuwonúwana iguinuwe kutukutuyadi tamo tamo goi go, tamo tamo toinidi maisidi ivinidi, adi kaigigita ituli ituli. 39 Wówana liliudi sikaaiyaka poyapoya ame goi go, geya sivavaseta, go sem tomota wowoda ituli, yoguyogu wowodi ituli, mánuwo wowodi ituli, íyana wowodi ituli. 40 Moe poyapoya wowonina go, dogoi yábana osasaina goi nakae sikaaiyaka. Ago dogoiyadi yábana osasaina goi adi gumaboina ituli ituli go, poyapoya wowonina adi gumaboina nakae ituli ituli. 41 Dogoiyadi yábana goi ame nakae: Níyala ana gumaboina ituli, tukówana ana gumaboina ituli, utuna adi gumaboina nakae ituli. Moitamo. Utunayadi tamo tamo adi gumaboina ituli ituli. 42 Tokámasa idi taoyamna bei nakae. Boi mainao Yaubada wowoda iwodugudi‡ Iwodugudi: Da Giriki niyadi goi sidigo kadi, ‘Ibagulidi.’ Bágula moe livalakaibala madágina manuna. go, sidáura. Ago wowodayadi tokámasa yaidi goi ikaitaaoedi geya sidaureta, go sem sikaiyako vata. 43 Mainao wowoda iwodugudi aba omayamaya. Nava bei ikaitaoedi aba taimámina. Mainao wowoda iwodugudi neenetaidi. Nava bei ikaitaoedi madi togaga. 44 Mainao wowoda iwodugudi poyapoya wowonina go, ikaitaoedi, baloma wowonina. Poyapoya wowonina ikaaiyaka, e baloma wowonina nakae ikaaiyaka. 45 Moe nakae Gínina Kimaasabaina idigedige: Koroto vakuumgoina moe Adama.‡ Adama: Ame youyana ana yagoina koroto (Abv 2:20). Tutayana korotoyana Yaubada imolului ikavava, e tauyana maa yawoina.† Abv 2:7. Ago koroto aiyuwoina moe Guyau. Tauyana iebaloma, e yawana vau ana tokaiguyau. 46 Go baloma wowonina geya ivakumgoita, go sem poyapoya wowonina ivakumgo namliyeta baige baloma wowonina. 47 Koroto vakuumgoina Yaubada poyapoya kaukauna goi imolului, tauna tauyana unana moe poyapoya. Koroto aiyuwoina yábana goi ima. 48 Korotoyana vakuumgoina unana moe poyapoya, e kita da poyapoya unada moe tauyana, tauna ma wowoda tauyana nakae. Korotoyana aiyuwoina unana moe yábana, e avatauwa kita neta Tauyana ina bodao, bei ma wowoda Tauyana nakae. 49 Kita ame tuta poyapoya wowonina kwama nakae talosi, e moe Adama wowona nakae go, nava bei yábana wowonina kwama nakae talosi, e moe bei Yeisuyana wowona nakae.
50 E ame alatuwokoimi, segowo, bego sakava be ikaika geya itoboinedita bei Yaubada ina kalibúbuna goi sisiu. Moe nakae kaga idaudáura geya itoboineyeta bei ikaiyako vata. 51 Konovēgu bei Yaubada ina nuwogau tayamo avatulukoimi. Maniyeda bei geya takamaseta. Go madabokida sem wowoda Yaubada bei ikaigaviledi.† Pil 3:21; 1Tk 4:15-17. 52 Moe ina sowóduwo geya ivamumugoneta. Moe nakae neta matada tatukapekape, e bogina ikavava. Moe tutayana anerose síula bei iuwe. Moitamo. Síula iuwe go, kidi tokámasa sitaoyamna ma wowodi aiyako vaatayaidi. Kita nava maa yawoida, e wowoda nakae ikaigaviledi. 53 Guna nuwonúwana ataligei. Ame tuta wowoda kwama nakae o tadigo kada, ‘Maada kwama daaurina’ go, nava bei itoboine kwama tayamo geya idaudáura talosi. Nakae ame tuta kada, ‘Ámasa talosilosi’ go, nava bei itoboine kwama aiyako vaatayaina nakae talosi. 54 E tutayana wowoda ame kwama daaurina nakae ikavava o kada, ‘Kwama kaamasina nakae ikavava’ go, tayamo wówana aiyako vaatayaina kwama nakae bogina talosi, e livala ame Gínina Kimaasabaina goi bei imalatomota, livalayana kana,
‘Ámasa bogina ikavava
unana Yaubada bogina itauwe.’
Aiseya 25:8
Nakae kana,
55 ‘Ámasa, manakae? Im togaga nako?
Im kaipíyama nako?
Bogina sikavava.’
Oseya 13:14
56 E ámasa ina kaipiyamayana moe goyo. E goyo ana togagayana moe Yaubada ina Katukeda unana Atukedayana pasina tayagoi goyo taguinuwe. 57 E goyo ina togaga yaida goi Yaubada italigeida go, moe ida Tomoya Yeisu Guyau ina guinuwa goi iguinuwe, e moe manuna Yaubada yaina goi takauyāgu.
58 E tauna segowo guna kaloyao, tatogāga be tataoyakavāta. Nakae tuta liliuna ida Tomoya ina paisewa tapooisogāne unana tayagoi ida paisewa ida Tomoya umana geya dogoi besobeso geya.
†b15:3 Ais 53:5-12.
†15:4 Ose 6:2; Mad 16:21; Iyo 2:21-22; Gui 2:24-32.
†b15:5 Mad 28:16-17; Mak 16:14; Luk 24:36; Iyo 20:19,26; Gui 10:41.
†15:8 Gui 9:3-6,17; 1Ko 9:1; Gal 1:16.
‡15:42 Iwodugudi: Da Giriki niyadi goi sidigo kadi, ‘Ibagulidi.’ Bágula moe livalakaibala madágina manuna.
‡15:45 Adama: Ame youyana ana yagoina koroto (Abv 2:20).