2 Izo, — Naiko kwaw ikatu 'ym ma'e iapo har romo ihe,

Nerepuner kwaw ne'e haw rehe Tupàn henataromo.

3 — O Tupàn, aipo heremiapo kwer ikatu 'ym ma'e na'ikatu kwaw newe. Màràzàwe tuwe atyryk putar ikatu 'ymaw wi nehe.

Aipo erezapo putar ikatu ma'e ihewe nehe,

Nerepuner kwaw ne'e haw rehe Tupàn pe hehe nepuranu pà.

4 Ihe awazar putar neze'eg newe nehe kury,

Nemyrypar wanupe nehe no.

5 Eme'e ywak rehe nehe.

Ywàkun upyta muite ne'aromo wà.

6 Aze erezapo ikatu 'ym ma'e, neremiapo kwer nuhem kwaw Tupàn ywate har pe.

Aze nekatu 'ymaw heta tetea'u, nezewe rehe we nuhem kwaw huwake, numuaiw kar kwaw Tupàn.

7 Aze erezapo ikatu ma'e, nerepytywà kwaw Tupàn nezewe haw iapo mehe.

Nuputar kwaw ni pitài nema'e a'e.

8 Aze erezapo ikatu 'ym ma'e, amogwer teko upuraraw ma'erahy a'e re wà.

Aze erezapo ikatu ma'e, erepytywà amo teko ne wà.

9 Aze waàmàtyry'ymar upuraraw kar ma'erahy amo awa wanupe tuweharupi wà,

A'e awa ikuhem wà, uhapukaz wà no. — Tuwe amo zanepyro wà nehe, upuner ma'e wapo wi wà nehe, i'i wà.

10 Nezewe rehe we nuzewyr kwaw Tupàn pe wà, uwapo arer pe wà.

'Ar ipytunahy wera'u ma'e rehe Tupàn umur ukàgaw purupe.

11 Nezewe rehe we nuzewyr kwaw izupe wà. Tupàn umuigo kar teko ma'e kwaw katu har romo a'e wà.

Ukwaw katu ma'e wiràmiri wanuwi wà, ma'ea'yr wanuwi wà no.

12 Uhapukaz Tupàn pe upyro àwàm henoz pà wà. Nezewe rehe we Tupàn nuwazar kwaw waze'eg wanupe.

Ta'e — Upuner wera'u ma'e romo aiko ihe, i'i uzeupe wà xe. Iaiw a'e wà no.

13 — Tupàn nuenu kwaw teko wà, naza'e kwaw.

— Tupàn upuner wera'u ma'e nuexak kwaw ma'e, naza'e kwaw. Aze mo zaze'eg nezewe, zaneremu'em mo zane.

14 Izo, — Napuner kwaw Tupàn hexakaw rehe ihe, ere izupe.

Nezewe rehe we eàrogatu nehe. Ta'e ukwaw ma'erahy neremipuraraw a'e xe. Ima'enukwaw iko nerehe.

15 — Tupàn nuzepyk kwaw purehe a'e, ere nezeupe.

Nuzekaiw kwaw teko wanemiapo kwer ikatu 'ym ma'e rehe, ere nezeupe.

16 Na'ikatu kwaw neze'eg wiwi àwàm nehe.

Ereze'eg tetea'u. Nezewe rehe we eremume'u neremigwaw 'ym iko.