1 A'e rupi, Izo, ezeapyaka katu heze'eg rehe nehe.

Ezekaiw katu heremimume'u ràm nànàn nehe no.

2 Ahyk hezypyrog àwàm rehe kury.

Amume'u putar hema'enukwaw paw nehe.

3 Amume'u tuwe putar hema'enukwaw paw nehe. Naherekyty'ym kwaw nehe.

Naheremu'em kwaw nehe. Heze'eg uhem putar hepy'a wi nehe.

4 Tupàn Hekwe heapo a'e.

Tupàn purupy haw hemuigo kar.

5 Ewazar heze'eg ihewe nehe, aze erepuner nehe.

Ezemuàgà'ym ihewe neze'eg pà nehe.

6 Ihe aiko ne ài Tupàn henataromo. Ne ereiko ihe ài Tupàn henataromo no. Tupàn uma'ema'e ywyzuwa neapo pà.

Uma'ema'e ywyzuwa heapo pà nezewegatete no.

7 A'e rupi ekyze zo ihewi nehe.

Nuruzuhaw kwaw ihe nehe.

8 Aenu amo ma'e neremimume'u kwer ihe.

9 — Nazapo kwaw ikatu 'ym ma'e ihe. Nazawy kwaw ihe, ere nemyrypar wanupe.

Naiko kwaw ikatu 'ym ma'e iapo har romo. Nazapo kwaw ikatu 'ym ma'e ihe, ere wanupe.

10 — Tupàn wekar hekatu 'ymaw a'e, ta'e izepyk wer herehe a'e xe.

Herereko uwàmàtyry'ymar ài.

11 Uzàpixipixi hepy kyhàhàmtàtà pupe.

Wexak heremiapo iko tuweharupi no, ere wanupe.

12 Erezawy, a'e newe kury.

Ta'e Tupàn uhua'u wera'u wemiapo kwer wanuwi a'e xe, teko wanuwi a'e xe.

13 Màràzàwe tuwe eremume'u ikatu 'ym ma'e Tupàn hemiapo kwer.

— Tupàn nuzekaiw kwaw zanerehe a'e, aze ximume'u ikatu 'ym ma'e izeapo awer izupe zane, ere wanupe. Màràzàwe tuwe ereze'eg nezewe.

14 Màràmàràn uze'egaw rupi uze'eg Tupàn zanewe a'e.

Nezewe rehe we nazazekaiw kwaw ize'eg rehe.

15 Pyhaw, zaneker haw rehe,

Zaneker katu mehe,

Uze'eg zanewe zanepuahu pe. Wexak kar ma'e puahu zàwenugar zanewe no.

16 Tupàn uze'eg zaneapyakwar rupi.

Hemimume'u zanemynehem zanekyze haw pupe.

17 Uze'eg zanewe ikatu 'ym ma'e iapo re zanemupytu'u kar pà.

— Peiko wera'u zo amo wanuwi nehe, i'i zanewe.

18 Nezewe mehe zanepyro zanemàno àwàm wi.

Nazanereityk kar kwaw purupe zanetym àwàm pupe a'e.

19 Amo 'ar mehe Tupàn uzepyk purehe ma'eahy haw imur kar pà wanehe. Umur kar hahy haw iaiw ma'e purupe no. Nahahyir kwaw.

20 Ima'eahy ma'e upytu'u uma'uhez re.

Na'ipurexak wer kwaw temi'u hete katu wera'u ma'e rehe.

21 Iagaiwahy. Upaw oho iko.

Iahykaw rehe xo ipir zo heta ikagwer rehe we.

22 Upyta màno haw pe teixe haw huwake.

Na'arewahy weraha putar itym àwàm pe wà nehe.

23 Aze ru'u amo Tupàn heko haw pe har ur putar ipyro pà nehe.

Heta tetea'u Tupàn heko haw pe har wà. Zanemu'e ikatu ma'e iapo haw rehe wà.

24 Tupàn heko haw pe har upuhareko putar nehe.

— Emuhem kar nehe. Emono kar zo umàno ma'e kwer wapyta haw pe nehe, i'i putar Tupàn pe nehe.

— Nako ipyro àwàm hekuzar xe hepo pe, i'i putar izupe nehe.

25 Na'e ima'eahy haw uhem putar izuwi nehe.

Hetekwer ikàg wi putar ukwàkwàmo mehe arer zàwe nehe no.

26 Tupàn pe ize'eg mehe Tupàn wenu putar nehe.

Umuwete katu putar urywete haw rehe nehe no.

Tupàn umuawyze katu putar awa ikatu ma'e ài nehe no.

27 Uze'eg putar nezewe teko paw wanupe nehe.

— Azapo ikatu 'ym ma'e ihe. Hemunar amo ma'e rehe no.

Nezewe rehe we Tupàn nuzepyk kwaw herehe.

28 Hepyro hemàno haw wi.

Aexak tatainy ihe rihi, i'i putar wanupe nehe.

29 Tupàn uzapo a'e ma'e paw zanewe a'e.

Uzapo wiwi màràn haw no.

30 Nazanemumàno kar kwaw.

Nezewe mehe zaiko wi wi no.

31 Izo, ezeapyaka katu ko ze'eg rehe nehe.

Eze'eg zo nehe, ta'e aze'eg putar ihe nehe xe.

32 Aze nepurumume'u wer ma'e rehe nehe, ewazar heze'eg ihewe nehe.

Ta'e hepuruexak kar wer nekatu haw rehe ihe xe.

33 Aze nanepurumume'u wer kwaw ma'e rehe nehe, eze'eg zo nehe, ezeapyaka katu nehe.

Ta'e urumu'e putar ma'e kwaw katu har romo nereko àwàm rehe ihe nehe xe.