2 Azeharomoete peze'eg teko wanekuzaromo. Pemume'u wama'enukwaw paw.

Pemàno mehe naheta kwaw ma'e ikwaw katu haw ywy rehe nehe kury.

3 Ihe akwaw ma'e ihe no.

Napekàg wera'u kwaw ihewi.

Mo nukwaw kwaw ko penemimume'u kwer wà.

4 Hemyrypar upuka herehe wà. Aiko imunar 'ym ma'e romo.

Aiko ikatu 'ym ma'e iapo 'ymar romo.

Kwehe mehe aze'eg teko Tupàn pe. Uwazar heze'eg ihewe a'e.

5 Ikàg ma'e uze'eg zemueteahy iaiw haw pupe u'ar ma'e kwer wanehe wà.

Umuàzàn u'ar etea'i ma'e ràm wà no.

6 Imunar ma'e wiko ikatu haw rehe wàpuz me wà.

Tupàn henataromo ikatu 'ym ma'e iapo har wikuwe uzemupy'a 'ym pà wà.

Wakàgaw uzeapo wazar romo.

7 Zopar, epuranu wiràmiri wanehe nehe, ma'ea'yr wanehe nehe no.

Nemu'e putar ma'e rehe wà nehe.

8 Eze'eg ma'ea'yr ywy rehe har wanupe, ipira yryhu rupi har wanupe nehe no.

Nemu'e putar ma'e rehe wà nehe no.

9 Tupàn Tuweharupi Wiko Ma'e wiko a'e ma'ea'yr paw wapo arer romo a'e.

A'e ma'ea'yr ukwaw heko haw wà.

10 Ma'ea'yr paw waneko haw upyta Tupàn ipo pe.

A'e umuigo kar teko paw wanereko wà.

11 Hemyrypar wà. Zaneapyakwar wenu amo ze'eg ikatu haw. O wenu ikatu 'ymaw.

Zaneapeku ukwaw zaneremi'u ikatu haw.

Nezewegatete azeapyaka katu penemimume'u rehe.

— Azeharomoete, aze a'e izupe, xo a'e mehe zo azeruzar hehe.

12 Tua'uhez ma'e wiko ma'e kwaw katu har romo wà.

Ta'e tua'uhez haw werur ma'e kwaw paw purupe xe.

13 Tupàn ukwaw katu ma'e a'e. Upuner katu no.

Heta ma'e kwaw katu haw hehe. Ukwaw ma'e a'e.

14 Aze Tupàn weityk ma'e, ni amo nupuner kwaw a'e ma'e iapo wi haw rehe wà.

Aze upyhyk ma'e, ni amo nupuner kwaw imuhem kar haw rehe izuwi wà.

15 Aze Tupàn umupytu'u kar àmàn ikyr ire, uxinig ywy a'e.

Aze umuhem kar 'y, Tynehem ywy 'y pupe.

16 Tupàn ikàg a'e, weityk wàmàtyry'ymar wà no.

Aze amo imunar amo ma'e rehe, Tupàn ikàg wera'u imunar ma'e wi a'e. Ikàg wera'u a'e ma'e izarer wi no.

17 O'ok ma'e kwaw katu haw tuwihaw wanuwi.

Umuigo kar tuwihaw awa iranaiw ma'e romo wà no.

18 Tupàn o'ok tuwihawete wanenaw wi a'e wà,

Wamono pà zemunehew paw pe wà.

19 Tupàn umunyryk kar xaxeto wama'ereko haw wi wà. Weityk upuner ma'e wà no.

20 Tupàn umupytu'u kar pureruze'eg ma'e waze'eg ire wà.

Umumaw tua'uhez wama'ekwaw katu haw wanuwi no.

21 Nuwereko katu kwaw tuwihaw wà.

Umumaw wapuner haw upuner ma'e wanuwi no.

22 Tupàn wexak kar ma'e imim pyrer ipytunahy haw pupe har a'e.

Umuhyape katu kar tatainy ipytunaw rehe no.

23 Tupàn umuhua'u teko imono'og pyrer ywy rehe har wà.

Omono wapuner haw wanupe no. A'e re weityk a'e teko wamumaw pà wà.

24 Umue'o kar teko wanuwihaw wà.

Weraha ywyxiguhu rehe pe heta 'ymaw rupi no.

25 Wata ipytunahy haw rupi ma'e hexak 'ym pà.

Uzepyapi oho waiko uka'u ma'e ài wà.