1 ታኒ ኦራꬃ ሳሎኔ ኦራꬃ ሳዓ ቤዓስ። ኮይሮ ሳሎይኔ ኮይሮ ሳዓይ ꬋይስ፤ ኣባይካ ꬋይስ። ኢሳ 65፡17፤ 66፡22፤ 2ጴፂ 3፡13 2 ጌሻ ካታሚያ፥ ኦራꬃ ዬሩሳላሜይ፥ ኣዚና ጌላናው ኣሌቄታዳ ጊጋዳ ዴዒያ ማጫሳዳ ሳሎፔ ፆሳ ማታፔ ዱጌ ዎꬊሺን ቤዓስ። ኢሳ 52፡1፤ ዮ.ቆ 3፡12፤ ኢሳ 61፡10

3 ኣራታፔ ሃይሳዳ ያጊዲ፥ ኦዲያ ጊታ ቃላ ሲዓስ፤ «ፆሳ ኬꬃይ ኣሳራ ዴዔስ፤ ፆሳይ ባ ቦንቹዋራ ኣሳራ ኢሲፌ ዳና። ኤንቲ ኢያ ዴሬ ጊዳና፤ ፆሳይ ባ ሁዔን ኤንታራ ዳና፤ ኢ ኤንታ ፆሳ ጊዳና። ሂዝ 37፡27፤ ሌዌ 26፡11 4 ፆሳይ ኤንታ ኣይፌፔ ኣፉꬃ ኡባ ቁቻና። ሂዛፔ ሃይቆይ ዎይኮ ካዮይ ዎይኮ ዋሶይ ዎይኮ ዋዬይ ዴና። ጋልዓ ኡባይ ኣꬊስ» ያጊስ። ኢሳ 25፡8፤ ኢሳ 35፡10፤ 65፡19

5 ኣራታ ቦላ ኡቲዳይሲ፥ «ታኒ ኡባ ኦራꬂ ኦꬃና» ያጊስ። ቃሲ ዛሪዲ ታኮ፥ «ታኒ ኦዴይሲ ኣማንꬄይሳኔ ቱማ ጊዲያ ጊሾ ፃፋ» ያጊስ። 6 ቃሲ ታኮ፥ «ፖሌቲስ! ታኒ ኣልፋኔ ኦሜጋ፤ ዶሜꬂኔ ፖሎ። ኢሳ 55፡1 ሳሞቲዳ ኦናካ ዴዖ ሃꬃ ፑልቱዋፌ ጪጊ ባይና ጮ ኡሻና። 7 ፆኒያ ኦኒካ ሄሳ ኡባ ላታና፤ ታኒ ኢያው ፆሳ ጊዳና፤ ኢካ ታ ናዓ ጊዳና። 2ሳሙ 7፡14፤ ማዝ 89፡26 8 ሺን ያሻንቾታ፥ ኣማኔቶናይሳታ፥ ቱናታ፥ ሼምፖ ዎꬌይሳታ፥ ላይማቴይሳታ፥ ቢቴይሳታ፥ ኤቃ ጎይኔይሳታኔ ዎርዳንቾታ ቃዳይ ዲኔይ ኤፂያ ታማ ኣባን ጊዳና። ሄሲ ናምዓንꬆ ሃይቆ» ያጊስ።

9 ላፑን ዉርሴꬃ ቦሻቲ ኩሚዳ ላፑን ፁዓታ ኦይኪዳ ላፑን ኪታንቾታፔ ኢሶይ ታኮ ዪዲ፥ «ሃያ፥ ታኒ ኔና ጌሎስ ጊጊዳ ዶርሳ ማቺው ቤሳና» ያጊስ። 10 ኪታንቾይ ታና ዳሮ ꬎቃ ዴሪያ ሁዔ ጌሻ ኣያናን ኬሲዲ፥ ጌሻ ካታማይ፥ ዬሩሳላሜይ፥ ሳሎፔ ፆሳ ማታፔ ዱጌ ዎꬊሺን ቤሲስ። ሂዝ 40፡1 11 ሄ ካታማይ ፆሳ ቦንቾን ፖዔስ። ሄ ካታማ ፖዖይ ያስጲዴ ጊያ ኣልዖ ሹቻ ሜላ፤ ጌሻ ቢሪሌዳ ጶሌስ። 12 ሄ ካታማ ዲርሳይ ዎልቃማኔ ኣዱሴ። ኢያው ታማኔ ናምዑ ፔንጌቲኔ ሄ ፔንጌታ ናጊያ ታማኔ ናምዑ ኪታንቾቲ ዴዖሶና። ፔንጌታ ቦላ ታማኔ ናምዑ ኢስራዔሌ ዜሬꬃታ ሱንꬃይ ፃፌቲስ። ሂዝ 48፡30-35 13 ዶሎሃ ባጋራ ሄꬑ ፔንጌቲ፥ ፑዴሃ ባጋራ ሄꬑ ፔንጌቲ፥ ዱጌሃ ባጋራ ሄꬑ ፔንጌቲኔ ዉሎሃ ባጋራ ሄꬑ ፔንጌቲ ዴዖሶና። 14 ካታማ ጊምቤ ዲርሳይ ታማኔ ናምዑ ሹቻ ባሶታ ቦላ ኤቂስ። ኤንታ ቦላ ታማኔ ናምዑ ዶርሳ ሃዋሬታ ሱንꬃይ ፃፌቲስ።

15 ታው ኦዲያ ኪታንቹዋስ፥ ካታማ፥ ኢያ ፔንጌታኔ ኢያ ዲርሳ ዋꬊያ ዎርቃ ፃምዓይ ዴዔስ። ሂዝ 40፡3 16 ካታማስ ኦይዱ ማዛኔቲ ዴዖሶና፤ ካታማ ጌሳይኔ ጎምፓይ ኢሲ ጊና። ኪታንቾይ ካታማ ባ ፃምዓን ዋꬊን፥ ካታማይ ታማኔ ናምዑ ሙኩሉ ኪሎ ሚቲሬ ጊዲስ፤ ካታማ ጌሳይ፥ ጎምፓይኔ ꬎቃቴꬃይ ኢሲ ጊና። 17 ኪታንቾይ ቃሲ ዲርሳ ዋꬊን፥ ኪታንቾይ ጎዔቲያ ኣሳ ኩሼን ኢሲ ፄታኔ ኦይታማኔ ኦይዱ ዋꬋ ጊዲስ።

18 ካታማ ዲርሳይ ያስጲዴ ጊያ ሹቻን ዲሬቲስ። ካታማይ ማስቶቴዳ ጶሊያ ጌሻ ዎርቃን ኦሴቲስ። 19 ካታማ ዲርሳ ባሶይ ኡባ ቆሞ ቦንቼቲዳ ሹቻን ኣሌቄቲስ። ኮይሮ ሂፄቲዳ ሹቻይ ያስጲዴ፥ ናምዓንꬆይ ሳምፔሬ፥ ሄꬓንꬆይ ኬልቄዶኔ፥ ኦይዳንꬆይ ባሉሬ፥ 20 ኢቻሻንꬆይ ሳርዶንኪሴ፥ ኡሱፑንꬆይ ሳርዲዮኔ፥ ላፑንꬃይ ኪሪስቲሎቤ፥ ሆስፑንꬆይ ቢሪሌ፥ ኡዱፉንꬆይ ቶጳዚዮኔ፥ ታማንꬆይ ኪሪስጲራሲሴ፥ ታማኔ ኢሲንꬆይ ያኪንቴ፥ ታማኔ ናምዓንꬆይ ኣሜቴስፂኖሴ።

21 ታማኔ ናምዑ ፔንጌታስ ታማኔ ናምዑ ኢንቆ ጊያ ኣልዖ ሹቺ ዴዔስ። ኢሲ ኢሲ ፔንጌይ ኢሲ ኢንቆን ኦሴቲስ። ካታማ ዎጋ ኦጌይ ማስቶቴዳ ጶሊያ ጌሻ ዎርቃፌ ኦሴቲስ። ኢሳ 54፡11-12

22 ጎዳይ፥ ኡባፌ ዎልቃማ ፆሳይኔ ዶርሳይ ካታማስ ኬꬄ ጊዲያ ጊሾ ታ ሄ ካታማን ፆሳ ኬꬂ ቤዓቢኬ። 23 ፆሳ ቦንቾይ ሄ ካታማስ ፖዒያ ጊሾኔ ዶርሳይ ኢያው ፆምፔ ጊዲያ ጊሾ ካታማስ ኣዋ ዎይኮ ኣጌና ፖዖ ኮሼና። ኢሳ 60፡19 24 ካዎቴꬃቲ ሄ ካታማ ፖዖን ሃሙታና፤ ካዎቲካ ባንታ ቦንቹዋ ያ ኤሃና። ኢሳ 60፡3 25 ቃሚ ያን ባይና ጊሾ ካታማ ፔንጌቲ ኡባ ዎዴ ዶያ ጊዳና፤ ጎርዴቶኮና። ኢሳ 60፡11 26 ካዎቴꬃታ ጊታቴꬃይኔ ቦንቾይ ሄ ካታማ ያና። 27 ዶርሳ ዴዖ ማፃፋን ሱንꬃይ ፃፌቲዳይሳታ ፃላሊ ኣቲን ቱናባ ዎይኮ ዬላያባ ኦꬄይ ዎይኮ ዎርዶቴይ ኦኒካ ሄ ካታማ ጌሌና። ኢሳ 52፡1፤ ሂዝ 44፡9