19
1 Yaatin, salon daro asay,
“Xoossay galatetto!
Atotethay, bonchchoynne wolqqay nu Xoossaas gido.
2 Iya pirdday tumanne xillo.
Sa7aa tunisida iita laymiw Xoossay pirddis.
Xoossay ba aylleta suuthaa iippe achchis” yaagishin si7as. 19:2 Zaare 32:43; 2Kawo 9:7
3 He asay zaaridi bantta qaala dhoqqu oothidi,
“Xoossaa galati gakko.
He katamiya merinaw cuyashe daana” yaagidosona. 19:3 Isa 34:10
4 Laatamanne oyddu cimatinne de7on de7iya oyddu medhetethati araatan uttida Xoossaas gufannidi,
“Amin7i! Xoossaa galati gakko” yaagidi goynnidosona.
5 Yaatin,
“Xoossaa aylleti,
Xoossaas yayyiya guuthinne giti ubbay,
nu Xoossaa galatite” yaagiya qaalay araatappe keyis. 19:5 Maz 115:13
6 Yaatin, daro asada wocamiya, wolqqaama shaafada guummiya, dadada dechchiya girssay,
“Xoossaa galati gakko;
nu Goday, Ubbaafe Wolqqaama Xoossay kawotis. 19:6 Hiz 1:24; Maz 93:1; 97:1; 99:1
7 Dorssaa yaaganoy gakkida gishonne iya geliyara giigida gisho,
nu ufayttoos, galatoosinne Dorssaa bonchchos.
8 Gelos giigidaara phooliyanne geeshshi gidida
liino ma7o ma77ana mela iw imettis”
yaagishin ta si7as. (Liino ma7oy geeshshata xillo ooso leemiso.)
9 Hessafe guye, kiitanchchoy taakko, “Dorssa yaaganuwa xeegettidayssati anjjettidayssata” gada xaafa. He kiitanchchoy gujjidi, “Hayssi Xoossaa tuma qaalaa” yaagis. 19:9 Maato 22:2
10 He wode ta iya goynnanaw iya tohuwa bolla kunddas. Shin I, “Hessa oothofa! Taani Yesuusabaa markkattiya ne melanne ne ishata mela. Ne Xoossaa goynna” yaagis. Hiza, Yesuusabaa markkattidayssatas nabetethaa ayyaani de7ees.
Bootha para toggidayssa
11 Yaatin, saloy dooyettin, yan bootha pari de7eyssa be7as. He paraa toggidayssi Ammanettidayssanne Tumanchcho geetettees. I xillotethan pirddesinne olettees. 19:11 Hiz 1:1 12 Iya ayfey tama laco daanees; iya huu7en daro kallachchi de7ees. Iya bolla I attin hari oonikka eronna xaafettida sunthi de7ees. 19:12 Daane 10:6 13 I suuthan muukettida ma7o ma77is; iya sunthaykka Xoossaa Qaalaa. 14 Phooliyanne geeshshi gidida liino ma7o ma77ida salo olanchchoti bootha parata toggidi iya geedo kaalloosona. 15 Kawotethata qanxiya qara bisoy iya doonappe keyees. I biraata xam77an asaa haarana. Ubbaafe Wolqqaama Xoossaa hanqo woyne ushshaa gum77iya bessaa I yedhdhana. 19:15 Maz 2:9; Isa 63:3; Iyu 3:13; Yo@Qo 14:20 16 Iya ma7uwa bollanne iya wodiriya bolla, “Kawota Kawuwanne godata Godaa” yaagiya sunthay xaafettis.
17 Hessafe guye, issi kiitanchchoy awa bolla eqqidayssa be7as. He kiitanchchoy salora piradhdhiya kafo ubbaas ba qaala dhoqqu oothidi, “Haa yiite! Xoossaa gibiraa maanaw issi bessi shiiqite. 19:17-18 Hiz 39:17-20 18 Yidi kawota ashuwa, shalaqata ashuwa, wotaaddareta ashuwa, parata ashuwa, parata toggeyssata ashuwa, asa ubbaa ashuwa, aylleta ashuwa, womaannota ashuwa, gitatanne guuthata ashuwa miite” yaagis.
19 Do7ay, paraa toggidayssaranne iya olanchchotara olettanaw sa7a kawotinne entta olanchchoti issi bessi shiiqidashin be7as. 20 Shin he do7aynne iya sunthan malaatata oothida worddo nabey iyara issife oykettis. He malaatatan do7aa mallay de7eyssatanne iya misiliya goynneyssata I balethis. Do7aynne worddo nabey nam77ayka diinen eexiya tama abban paxa yegettidosona. 19:20 Yo@Qo 13:1-18 21 Attidayssati paraa toggidayssa doonappe keyaa bison hayqqidosona. Kafoti ubbay entta ashuwa midi kallidosona.