1 Inau kiki au vaga moa na tsitsi atsi ni Saron,

vaga kesa na vulevule i laona na qouna.

2 Vaga kesa na vulevule e dato i laoqira na itai kokonaga,

aia saikesa nogo e vaga niqu udu inau i laoqira na daki sui.

3 Vaga kesa na gai na gaviga i laoqira na gai sui tana goana,

bâ, maia saikesa nogo niqu udu galugaluve i laoqira na mane vaolu sui.

Mau gini mage sosongo na totu raviravi tana auauna na gai ia,

ma na vuana e puisi sosongolia na lioqu.

4 Maia e adisageau tana nina vale na kavomutsa

me tsavu poponoginiau nina galuve.

5 Niqu udu galugaluve au gini maluku sosongo na padangaoamu igoe.

Ko palaginiau kiki na vuana uaeni makede

ma na vuana na gaviga

ma kau gini susuliga visutugua.

6 Niqu udu e moloa na limana mauli i vavana na lovaqu,

ma na madoana e kasoginiau.

7 Igamu na daki ni Jerusalem kamu vatsa vaniau,

tana asaqira na dia ma na omea tuavati atsi ara dona sosongo na ulo tsaku,

laka sauba kamu tau goto adikaegokona na vainaugi

poi kalina ke tsau segeni gana tagu.

8 Inau au rongomia na tatangina na liona niqu udu.

Aia e ulo gaukuti mai tana vungavunga.

9 Niqu udu e vaga kesa na dia vaolu e dona sosongo na ulo tsaku.

E mai tutû nogo i buriti na valequ,

me morosage tana ovaovana bisi.

10 Me goko vaniau.

Niqu udu galugaluve kiki ko tsunamai

mo ko dulikoluau.

11 E sui nogo na tagu na bisi, me tau nogo tumu na usa,

12 mara taporatsa sui nogo na tsitsi.

E tsau nogo na tagu na linge,

mara viri tangi na kulukulu polia na verada.

13 Na vuaqira na gai mutsamutsa ara tuturiga nogo na mada,

mara latse nogo na itai na uaeni, ma na vuruqira e liuvi poponoa na kao.

Niqu udu galugaluve kiki ko tsunamai

mo ko dulikoluau.

14 Igoe o vaga saikesa na kulukulu e taopoi

tana tagerena na maragova.

Kiki, ko rutsu mai mo ko tamivaniau kau reia na ngoramu uluvao laka,

ma kau rongomia nina tangi laka na liomu.

15 Tangoligira na pai atsi tetelo,

e tau dou kara ba sekolia na uta na uaeni

rongona ara latse nogo.

16 Aia niqu mane nogo inau, minau nina daki nogo aia.

Aia e palagira nina sipi i levugaqira na vulevule.

17 Idavia ke votu na uniko

me ke nanga lê na rodona na bongi,

igoe niqu udu galugaluve ko visumai kiki,

vaga moa na dia vaolu e ulo tsaku tana vungavunga ni Beter.