2 “Me tau saikesa tugugo igoe a Job na tsariana laka

igoe o male dou saviliu i matana God,

3 se na veisuana God, ‘?Laka ara sekoligo koegua niqu sasi inau?

?Ma nagua ke peluau inau rongona au tau tsukia sa sasi?’

4 Bâ, mi kalina ia inau sauba nomoa kau tuguvisuvanigamu nimui goko, igoe mi tugira na kulamu.

5 “Ko morodato tana masaoka mo ko reigira na parako ara totu i gotu ao vasau.

Me vaga goto God aia e totu i gotu ao vasau.

6 Me ti vaga igoe ko sasi, me utu ko sekoliginia God.

?Me atsa moa ti vaga igoe ko tsukia ke danga na sasi, me laka tangomana ko sekoliginia aia?

7 ?Me ti vaga ke gotolaka saviliu nimu sasaga, me laka nagua e gini pelua God?

E tagara lelê sa omea ke kilia God i konimu igoe.

8 Migira saikesa moa gamu dulikolu ara rota mateqira nimu sasi,

ma na aqo dou igoe o naua e sangagira moa igira.

9 “Eo, mi kalina igira na tagaovera ara bingi sekoligira na tinoni,

migira ara kukungu mara ngangaidato ti vaga kesa tangomana ke laumaurisigira.

10 Migira ara tau moa dona na pilobâ i konina God aia e volagira,

me kakaisia na tobaqira tana tagu ara totu tana rota loki.

11 Maia nogo God e naua te igita a gini sasaga liusigira bâ na omea tuavati ma na manu.

12 Me ti vaga kara ngangaidato vania God ke sangagira, maia God e tau lelê rongomia niqira nonginongi,

rongona ara kaekae sosongo mara tinoni vanga nauseko.

13 Ara rota lê na ngangaidato, ma God Susuliga Sosongo e tau lelê moromai i koniqira,

se ke rongomia niqira ngangaidato kobakoba lê ara naua.

14 “Migoe a Job, o tsarinogoa laka e tau tangomana vanigo ko reilakana God;

me laka nimu sasaga ara totu sui nogo i matana God, mo pipitua moa aia ke pedegotosi vanigo.

15 Mo tsarigotoa laka e utu vania God ke kedea sa tinoni,

me tau lelê goto boeginigira igira ara sasi.

16 Eo, mi kalina igoe a Job o tsarivaganana ia ma nimu goko o tsonia ara tau lelê liu tana sasaga;

mi tana e gini labamaka laka igoe o tau saikesa donaginia nagua o gini goko.”