2 “!Eo, igamu segeni lelê moa amu sasaga loki,

mi kalina kamu mate, ma na sasaga loki sauba ke mate kolugamu goto!

3 Minau goto au sasaga vaga nogo igamu;

ma nimui sasaga igamu e tau liusia niqu sasaga inau.

Migira na tinoni sui ara donagininogoa na omea sui amu tsaria.

4 “Eo, mi kalina ia, migira goto gaqu duli dou ara kiataginiau moa,

atsa moa ti e goto dou niqu sasaga, mau totu male i matana God.

Mi sau ma God aia e dona na rongomiana niqu nonginongi.

5 Migamu e tagara ngatsu sa omea ke sekoligamu, ti amu gilugaqu moa inau,

mamu tû mamu labua kesa aia e varangi lê nogo ke puka.

6 Eo, migira na tinoni komikomi, migira goto ara peamangana God,

ara totu dou rago tana valeqira,

ma na susuligaqira segeni e lia ngiti niqira god.

7 “Migamu amu tsarivaniau, e dou ti ko bâ nongigira na omea tuavati,

ma na manu ni gotu, ma na tsetse ni tasi, ma kara sasanigo.

8 Se ti ko ngaoa mo ko ba veisuagira na omea sui ara mauri tana kao, ma na tsetse i tasi,

migira goto kara sasanigo gana ko gini sasaga.

9 ?Laka asei nomoa i laoqira na omea sui girani ke tau donaginia laka na limana God segeni nogo e aqosigira?

10 Na mauriqira na tinoni sui, me pipi sui goto na omea mamauri God e volagira,

ara totu sui moa tana limana aia.

11 “Na mangada e dona na gani vidana na mutsa ti ke gani dou se tagara.

Me vaga goto na kulida, e dona ke rorongo vata me ke vilekea na goko ti ke goto se tagara.

12-13 Igira na tuqatuqa ara tamani ragoa na sasaga loki,

maia segeni moa God e tamanina na sasaga loki kolu susuligana.

Migira na tuqatuqa ara donaragogotoa na padagadovi omea;

ma God segeni moa e tamanina na pukuna pipi sui na dona,

ma na omea gua moa ti aia ke ngaoa na aqosiana, me tangomana vania moa ke aqosia.

14 ?Mi kalina ti God ke toroveoa sa omea, masei tangomana ke logo visutugua?

?Me ti vaga God ke tsonisagea kesa tana vale sosori, masei tangomana ke ba aditsunâ?

15 Ma ti vaga God ke tangoli kapusia na usa, me gini laba na tagu na mamatsa,

mi kalina ti vaga aia ke sangavitugua na uluna na kô, me tavetugua na obo.

16 “God e susuliga sosongo, me mana sailagi moa gana;

mara totu sui i limana aia igira ara dona na perobulesi tinoni, migira sui goto ara tutunina niqira goko pero.

17 Maia e adiligia niqira sasaga loki igira na tagao vera,

me naua mara viri bubulega na tinoni pede.

18 Aia e adiligi tanigira gaqira susuliga na taovia tsapakae;

me sageli vanigira na polona tinoni lê.

19 Me paluvangamaqira na manetabu, me aditsunâ gaqira susuliga na tinoni lokiloki.

20 Aia e muisia na mangaqira igira na tinoni nonoru,

me adiligia na sasaga loki tanigira na tuqatuqa.

21 Me paluvangamaqira na mane tagao

me pukali vanigira gaqira susuliga igira na tagaovera.

22 Aia e moloa na marara ke mararasia tana nauna e rodo pulipuli,

me mololabatigira i malena na omea ara totu popoi tana rodo.

23 Maia nogo e naua mara gini susuliga mara tangirongo na veraloki,

mi muri maia e bâ me tuliusigira me toroveogira tugua.

24 Me adiligia na sasagaqira igira na taovia na vera

me naua mara liu bubulega bamai lê,

25 mara tataposasa bamai i laona na rodo

mara tapulepule bamai lê vaga moa na tinoni e inu me bule.