6
1 Me goko a Job me tsaria,
2 “Ti vaga kamu tovogira tana omea na tovo mamava na rota sui ara gadoviau ma na sosongo au vatsangia,
3 me sauba kara mamava liusigira bâ na one i tasi,
maia nogoria na rongona ti inau au tsonigira na tsaqina goko sagulepo lê girani.
4 Nina pipili nogo na God Susuliga Sosongo e vanasi lobatiginiau,
ma na tabatu e totu tana pipili e liuvia na koniqu popono.
God nogo e molo palatetegira nina omea mamataguniga kara maiginiau.
5 “E gini dou na tobana na asi kalina aia e gani gana buruburu,
me totu dodo na buluka kalina e qatâ gana buruburu makede.
6 ?Eo, masei nomoa ke ngaoa na ganiana na mutsa e maqui me tagara na solo i konina?
?Me laka na seserena na toluna e gani vaga sa omea?
7 Ma na tobaqu inau e tau saikesa padangaoa na ganiana na mutsa vaga ia,
me pipi sui moa vatana na mutsa au ganigira ara sekolia moa na tobaqu.
8 “?Megua vaga God ti e tau sauvaniau na omea au nongia i konina?
?Megua ti e tau rongomia niqu nonginongi?
9 !Me ke dou bâ moa ti vaga God ke labumatesiau!
10 Me ti vaga inau kau donanogoa laka God sauba ke nauvaganana vaniau ia,
minau sauba kau tsipu lekaleka tana mage atsa moa ti au vatsangisavi loki.
Inau au donagininogoa laka God aia e tabu loki sosongo;
mau tau goto dona kau pea mangana,
ma kau sove na nauana na omea aia e kilia.
11 ?E sui saikesa nogo na susuligaqu, megua ti au mauri babâ moa?
?Ma na rongona gua ti au mauri babâ moa kalina e tagara nogo sa omea dou kau amesigotoa?
12 ?Me laka na vatu se na tapala mila na koniqu inau? Tagara saikesa.
13 Inau au tau nogo tamanina sa susuliga tugua kau gini sanga segeniqu;
me tagara goto sa nauna i tana kau pilo bâ ma kau tsodoa na sasanga.
14 “Mi tana tagu na rota loki vaga ni, au kilia kara visana na kulaqu dou kara mai totu koluau,
atsa moa ti inau au piloligi tania na God Susuliga Sosongo se tagara.
15 Bâ, migamu na kulaqu, amu peroau lê vaga moa na ko tsatsali
e tavongani mamatsa buto lê kalina e tau tumu na usa.
16 Tana tagu na bisi loki ma na snou,* 6:16 “na snou” Visana tana vera tana tagu na bisi loki na usa e dona ke lakolu me ke sere vaga moa na poke, kalina e tumu me tsavua na kao popono.
migira na ko tsatsali ara gini kakai buto lê,
17 mi kalina e labatugua na tagu na papara, me tavongani nanga lê na snou,
ma na okookona na kô ara totu mamatsa lê.
18 Me visana kalina igira na tinoni ara mololea na veraqira na vano kesa tana vera segeni,
ara dona kara liu tana kaomate kolua niqira kamelo ara kalagaia gaqira lutsa.
Mi kalina ti ke tagara gaqira kô, mara mololea na sautu loki mara rurugu bamai na lave kô,
mara tova mara viri mate lê.
19-20 Igira na Seba ma na Tema ara dona goto na nauvaganana ia.
Ara amesia laka kara tsodoa sa kô tana kaomate ma kara inu niqira kamelo,
mara gini padasavi sosongo kalina ara reia ara mamatsa takuti na okooko na kô.
21 Tana niqu papada inau, igamu amu vaga nogo na okooko na kô mamatsa lê,
eo, amu reia na rota loki e gadoviau inau, mamu gini sugavisu lê tana matagu.
22 ?Me laka inau au nongigamu nogo kamu sauvaniau sa vangalaka,
se kamu volidodoa ke kesa rongona ke mai me ke sangaau
23 se kamu laumaurisiau tania kesa gaqu gala, se tania na limana kesa aia e bingi sekoliau?
24 “Bâ, kamu sasaniau igamu; ma kamu katelimai vaniau niqu sasi.
Minau sauba kau totu mui rago, ma kau rongomi vatavigamu.
25 Ti vaga na omea amu tsaria ke mana, minau sauba kau tutunina,
eo, migira na omea amu tsaria igamu ara tau saikesa liu tana sasaga.
26 Igamu amu padâ laka na tsaqina goko inau au tsonigira tana niqu rota loki na goko lovolovo lê.
?Me ti ke vaga ia, me matena gua amu ngaogotoa kamu totosasaga vaniau tana rongona niqu goko vaga ia?
27 !Me vaga moa ti igamu amu naua na tsoni daisi mateqira na baka tinamate,
ma na tsabiriaqira gamui saidou rongona kamu gini tamani qolo danga!
28 “Mi kalina ia, kamu morosiau mai inau. E utu lelê goto kau perogamu.
29 Kamu mololea na goko dangadanga ma na tsoniana na tsaqina goko e tau mana.
Ma kamu laka goto na kedeaqu inau, rongona inau au tau naua sa omea ke sasi.
30 ?Megua, amu padâ igamu laka inau na tinoni vanga peropero,
mau vô na reigadoviana na omea e goto ma na omea e sasi?”
*6:16 6:16 “na snou” Visana tana vera tana tagu na bisi loki na usa e dona ke lakolu me ke sere vaga moa na poke, kalina e tumu me tsavua na kao popono.