1 God, e ghua ge o nighai sika kasila vagha eni?

Ge o rutu sule vanighai ighai kulamu na vure to righitaonighi.

2 Ko ghanaghana, ighai agaira na vure to vilighai idania:

Na kema to huia ge ke nimua ni lologho!

Mo ko ghanaghana Jerusalem, na komumu to ghanagho igaa.

3 Ko sakutua tona tana lei sonitavu taeni tana komu.

Ko righia a nimua na bela tabu tara durakea ghamami na kana.

4 Iga ghamua na kana tara nia ngingili na togotogo ta nimua na valetabu.

Iga tara talu datoi didira na vikuviku na vaughilalana ni laga vule.

5 Ma gaira tara durakea na mataula te vaghaa na tinoni te tangi ghai tana tautalu.

tara toka horui na lei ghai nia didira na lei posu.

6 A gaira tara rimerimei na lei galegale:

nia didira posu mana ivi.

7 Ma gaira tara durakea nimua na vale tabu,

mara tungi lakena me tao pari.

mara metoa na bona ni holohabana na ahamu.

8 Ma gaira tara ghanaghana ge kara taghalaghi nighai,

ge ra kerei na lei bona tabu ni holohabana ga God.

9 Ighai tai mua righia siki vauvautu, me taho siki prophet ghua.

A hei tatada te ghilala na sosokona na totobo eni.

10 Lord, e ghua ge ra kia haghinigho daro bona ghamami na kana.

mo taladira ge ra batobatoa haia na ahamu.

11 E ghua ge o hove na hangamami,

me ghua ge mua gonia siki totobo vanighai?

12 Mi ghoe God, a nimami na vunaghi mai tua tana vuivuni,

me subo na bona ta vavolaghai tua.

13 Ighoe to vokasia na tahi nia na lagamu.

Mo bohai na uludira na lei maumanu ni tahi.

14 Mi ghoe to paruhai na uludira:

mo kutira na lei maumanu ni bona mamaha nia na hulidira.

15 Ighoe to gonighi na lei vuravura mana lei beti toghotogho,

me va mamahai na lei beti tavetave.

16 Ighoe to gonia na bongi mana dani

mo gonighi na lei veitughu, na vuha mana aho ghua.

17 Ighoe to kobe voka na maramana:

mo gonia ghua na bihi mana papara.

18 Maghutu ko ghilala tara kiahaghinigho ghamua na kana:

Gaira tara mua manahana God, mara nigho sika.

19 Ko bei tona sanira nimua na vure tana limadira na ghadira na levunimate:

mo ko bei nira ponolio kulamu na vure tara vahaghitaili.

20 Mo ko ghanaghana na baubahu te bahu ghai nia:

na gunaguna te kale tana lei piuna na komu, te pungi ga.

21 Ko bei nera rana vahaghitaili ge kara maa

ma gaira rana bona maia te ulaghadira na hahanga kara holohabagho.

22 God ko tughuru tate mai, mo ko nia barebare nimua na levu.

Ko ghilala rana bule, tara kiahaghinigho tana dani udolu.

23 Ko bei nighi ponolio didira ge u ni rutu ghamua na kana.

na talama ni mangadira te tona haliu so.