ତୀମଥିଙ୍କ ନିକଟକୁ ପାଉଲଙ୍କ ଦ୍ୱିତୀୟ ପତ୍ର
ତିମତିନେ ଡାଗ୍ରା ପାଉଲ୍ନେ ଦୁତିୟ ଉଲିଆଃ
ତିମତି ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ଦିତିୟ ତିମତି ବଇ ପାଉଲ୍ନେ ବାନ୍ ମେଁନେ ସିସ୍ ତିମତିନେ ଡାଗ୍ରା ଗୁଆର୍ ବକ୍ନେ ଉଲିଆ । ଦିତିୟ ତିମତି ପାଉଲ୍ ଜିବନ୍ନେ ସାରାସାରି ବେଲା ଗୁଆର୍ ବକ୍ନେ ଉଲିଆ । ଏନ୍ ବେଲା ମେଁ ରମ୍ନ୍ନିଆ ବନ୍ଦି ଲେଃକେ ୧:୧୭୨:୧୨ ପାଉଲ୍ନେ ଏତେ ତିମତିନେ ଜାବର୍ ସମ୍ପର୍କ ଲେଃକେ ବାରି ସାପା ବେଲା ଆମେକେ ଉଂଡେ ଡାଗ୍ଚେ ବାସଙ୍ଗ୍ ମ୍ୟାକେ ପିଲିପିୟ ୨:୨୨; ୧ ତିମତି ୧:୨; ୧:୧୮ ଏନ୍ ପାଉଲ୍ନେ ଅଁକ୍ଲିଗ୍ ଉଲିଆ ବାନ୍ ମୁଇଂ ଆଣ୍ତିଡାଗ୍ରା କି ମଣ୍ତଲିକେ ମୁଇଂ ରେମୁଆଁ ଡାଗ୍ଚେ ବାସଙ୍ଗ୍ ମ୍ୟାକେ । ବିନ୍ ଞ୍ଜିକ୍ଲିଗ୍ ଉଲିଆ ଇଂ ୧ ତିମତି ତିତସ୍ ବାରି ପିଲିମନ୍ ।
ଦିତିୟ ଉଲିଆ ଗୁଆର୍ନେ ବେଲା ରମିୟ ରାଜ୍ୟନ୍ନିଆ ଡଣ୍ତ୍କସ୍ଟ ଡିଙ୍ଗ୍ଆର୍କେ । ଡିଙ୍ଗ୍ ପାରେ ତ ଏନ୍ କାରନ୍ ଲେଃଲା ପାଉଲ୍ ବନ୍ଦି ଲେଃକେ ବାରି ତିମତିକେ କସ୍ଟ ବିନ୍ସା ଆଦେସ୍ ବଡିଙ୍ଗ୍କେ । ପର୍ତୁମ୍ ତିମତି ଅନୁସାରେ ପାଉଲ୍ ତିମତିକେ ମିଚ୍ ଗୁରୁଇଂନେ ବିସୟ୍ରେ ଗୁଲୁଏ ତରକ୍ ଡିଙ୍ଗ୍ନ୍ସା ବାସଙ୍ଗ୍ ଡିଙ୍ଗ୍କେ । ୧ ତିମତି ୧:୧୬-୧୮ ପାଉଲ୍ ତିମତିକେ ବାସଙ୍ଗ୍ଏ ଜେ ଇଡ଼ିଂଡେ ଗୁଲୁଏ କସ୍ଟବାନେ ବେଲା ଲେଃକେ ୩:୧ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ପାଉଲ୍ ତିମତିକେ ସାର୍ଲ ଡିଙ୍ଗ୍କେ ବାରି ଆମେକେ ସାଆସ୍ ବିଃଡିଂକେ । ୧:୧-୧୮
୨. ତିମତିକେ କାମ୍ ଡିଙ୍ଗ୍ଚେ ଆଃସୁଏ ନ୍ସା ପାଉଲ୍ ସାଆସ୍ ବିଃଡିଂକେ । ୨:୧-୧୩
୩. ଇଡ଼ିଙ୍ଗ୍ ପାଉଲ୍ ଉଡ଼ି ଡାଆଁ ଡାଆଁନେ ଆଦେସ୍ ବିଃଡିଂକେ । ୨:୧୪-୨୬
୪. ବବିସତ୍ ଗଟ୍ନା ବିସୟ୍ରେ ତରକ୍ ଲେଃନ୍ସା ବାରି ସତ୍ନେ ଗାଲି ସ୍ରି ନ୍ସା ତରକ୍ ଆଡିଙ୍ଗ୍କେ । ୩:୧–୪:୮
୫. ପାଉଲ୍ ତିମତିକେ ଉଡ଼ି ରୁଆ ବାସଙ୍ଗ୍ଚେ ଗୁଆର୍ନେ ଆଡାକେ । ୪:୯-୨୨
୧
୧ ନିଂ ପାଉଲ୍ ପରମେସର୍ନେ ଇକ୍ଚାରେ ବେବକ୍ନେ ମୁଇଂ ସିସ୍ । ଜିସୁ କିସ୍ଟନେ ଡାଗ୍ରା ଲେଃକ୍ନେ ଜିବନ୍ନେ ପାର୍ମାନ୍ ଡିଂକ୍ନେ ବିସୟ୍ରେ ରେମୁଆଁଇଂକେ ବାସଙ୍ଗ୍ ନ୍ସା ପର୍ମେସର୍ ଆନେଙ୍ଗ୍ ବେବକେ ।
୨ ✡ ୧:୨ ପ୍ରେରିତ୍ ୧୬:୧.ନେଙ୍ଗ୍ନେ ନିଜର୍ ଗଡ଼େଅ ତିମତିକେ ନେଙ୍ଗ୍ ଏନ୍ ଉଲିଆ ଗୁଆର୍ଣ୍ଡିଂ । ଆବା ଇସ୍ପର୍ ବାରି ମାପ୍ରୁ ଜିସୁ କିସ୍ଟ ଆପେକେ ଲିବିସ ବାରି ସାନ୍ତି ଦାନ୍ ଡିଙ୍ଗ୍ଲେ ।
ଦନ୍ୟବାଦ୍ ବାରି ସାର୍ଦା ଆଡିଙ୍ଗ୍ନେ ସାମୁଆଁ
୩ ନେଙ୍ଗ୍ନେ ନ୍ତା ଞ୍ଜାଇଂନେ ରକମ୍ ନେଙ୍ଗ୍ ଆଣ୍ଡିନେ ଇସ୍ପର୍କେ ପର୍ଚଲ୍ ବୁଦିରେ ଉପାସ୍ ଡିଂଚେ ଆମେକେ ଦନ୍ୟବାଦ୍ ବିଃଣ୍ଡିଂ । ନେଙ୍ଗ୍ନେ ପାର୍ତନା ଗୁଆରିନ୍ନିଆ ସ୍ମିମିଡିଗ୍ ଆନାକେ ମନେ ଏତେନେ ବେଲା ନେଙ୍ଗ୍ ଇସ୍ପର୍କେ ଦନ୍ୟବାଦ୍ ମ୍ୱିଃଏ । ୪ ନାଁ ନେଙ୍ଗ୍ ନ୍ସା ଅଃନାଲେଃକେ ଡାଗ୍ଚେ ନେଙ୍ଗ୍ ମନେ ମ୍ୱକେ । ନେଙ୍ଗ୍ ଆନାକେ କେଚେ ସାର୍ଦା ଡିଙ୍ଗ୍ ନ୍ସା ଜାବର୍ ଇକ୍ଚା । ୫ ନାନେ ମ୍ନା ବିସ୍ବାସ୍ ଆନେଙ୍ଗ୍ ମନେ ପଡ଼େଏ । ନାଁନେ ବାଏଡୁକ୍ରି ଲୋୟୀ ବାରି ଇୟାଙ୍ଗ୍ ଇଉନିସୀ ଡିରକମ୍ ବିସ୍ବାସ୍ ଡିଙ୍ଗ୍ଆର୍ଡିଂଗେ, ନାଁନେ ଡିଗ୍ ଆତେନ୍ ଆତ୍ମାନ୍ନିଆ ବିସ୍ବାସ୍ ଲେଃକେ । ଏନ୍ ସାମୁଆଁ ନେଙ୍ଗ୍ ସୁମରନା ଡିଙ୍ଗ୍ଣ୍ଡିଂ । ନାଁନେ ଆତେନ୍ ବିସ୍ବାସ୍ ଲେଃକେ ଡାଗ୍ଚେ ସତେଆ ନେଙ୍ଗ୍ ମ୍ୟାନ୍ଲେକେ । ୬ ନେଙ୍ଗ୍ ନାଁ ଆଡ଼ାତ୍ରା ନ୍ତି ବକେଲା ନାଁ ଇସ୍ପର୍ନେ ବାନ୍ ଆଣ୍ଡିନେ ବପୁ ବାନାଲେଃକେ ଆମେକେ ଜିବନ୍ ବନ୍ସା ନେଙ୍ଗ୍ ଆନାକେ ତରକ୍ ଆଡିଙ୍ଗ୍ ମ୍ୱକେ । ୭ ପର୍ମେସର୍ ଆନେକେ ବୁଟନେ ଆତ୍ମା ବିଃଆବକେ ଣ୍ତୁ । ମେଁ ଆନେକେ ବପୁ ଆଲାଦ୍ ବାରି ନିମାଣ୍ଡା ବୁଦିନେ ଆତ୍ମା ବିଃବକେ ।
୮ ତେସା ମାପ୍ରୁ ଜିସୁନେ ବିସୟ୍ରେ ସାକି ବିନ୍ସା ଗିଆସ ଆଡିଙ୍ଗ୍ପା; ମେନ୍ସା ନେଙ୍ଗ୍ ବନ୍ଦି ନେଙ୍ଗ୍ ନ୍ସା ଡିଗ୍ ଗିଆସ ଆଡିଙ୍ଗ୍ପା । ଣ୍ତୁଲା ଇସ୍ପର୍ ଆପେକେ ବିବକ୍ନେ ବପୁ ଏତେ ପେ କ୍ରିସ୍ଟ ଜିସୁନେ ନିମାଣ୍ତା ସାମୁଆଁ ନ୍ସା ଦୁକ୍ ଡିଙ୍ଗ୍ନେ ତିଆର୍ ଡିଙ୍ଗ୍ପା । ୯ ପର୍ମେସର୍ ଆନେକେ ଉଦାର୍ ଆଡିଙ୍ଗ୍ଚେ ନିଜର୍ ପବିତ୍ର ରେମୁଆଁ ଆଡିଙ୍ଗ୍ବକେ । ନେଁଇଂନେ ନିଜର୍ ବପୁରେ ଆତେନ୍ ଆଡିଙ୍ଗ୍କେ ଣ୍ତୁ । ଣ୍ଡୁଲା ପର୍ମେସର୍ ନିଜେ ଇକ୍ଚା ଡିଙ୍ଗ୍ଚେ ବାରି ନିଜର୍ ଲିବିସ ବାନ୍ ଆନେକେ ଉଦାର୍ ଆଡିଙ୍ଗ୍ ବକେ ବାରି ନିଜର୍ ରେମୁଆଁ ଆଡିଙ୍ଗ୍ ବକେ । ଆତେନ୍ ଲିବିସ ଜିସୁ କିସ୍ଟନେ ବାନ୍ ଆନେକେ ଅଃସେ କାଲ୍ବାନ୍ ମିଲେଲେଃକେ । ୧୦ ଏବେ ଏନ୍ ମଞ୍ଚ୍ପୁର୍ନ୍ନିଆ ପାଙ୍ଗ୍ଚେ ଆମ୍ବ୍ରଣ୍ଡ୍ରେ କିସ୍ଟ ଜିସୁ ଏନ୍ ସାପା ବିସୟ୍ ଆତ୍ନା ବକେ । ମେଁ ଗୁଏଚେ ବପୁକେ ଗଣ୍ତା ଆଡିଙ୍ଗ୍ ବକେ ବାରି ମେଁନେ ନିମାଣ୍ତା ସାମୁଆଁ ବାନ୍ ମାଡାନେ ଜିବନ୍ନେ ଗାଲି ଆତ୍ନା ବକେ ।
୧୧ ✡ ୧:୧୧ ୧ ତିମତି ୨:୭.ଏନ୍ ନିମାଣ୍ତା ସାମୁଆଁ ବାସଙ୍ଗ୍ଚେ ବୁଜେନ୍ସା ଇସ୍ପର୍ ଆନେଙ୍ଗ୍ ମୁଇଙ୍ଗ୍ ବେବକ୍ନେ ସିସ୍ ବାରି ମାସ୍ଟେର୍ ରକମ୍ ସ୍ରି ବକେ । ୧୨ ତେନ୍ସା ନେଙ୍ଗ୍ ଏନ୍ ସାପା ଦୁକ୍କସ୍ଟ ବାଣ୍ଡିଂକେ । ଜାଣ୍ତେକେ ନେଙ୍ଗ୍ ବିସ୍ବାସ୍ ଣ୍ଡିଂକେ ନେଙ୍ଗ୍ ମେଁନେ ଅସ୍ଲି ସ୍ନାମୁଆଁ ବାନ୍ଲେଃ ବାରି ମେଁ ଆନେଙ୍ଗ୍ ଆଣ୍ଡିନେ ଦାଇତ୍ ବିବକେ ଆତେନ୍ ଚଲେନ୍ସା ମ୍ନାବିଚାର୍ ଦିନା ଜାକ ମେଁ ଆନେଙ୍ଗ୍କେ ସୁବିଦାରେ ବଏ, ଏନ୍ ସତ୍ବାବ୍ରେ ମ୍ୟାଚେ ନେଙ୍ଗ୍ ଏଃଜାକ ସମାନ୍ ବାବ୍ରେ ଆସା ଡିଙ୍ଗ୍ଚେ ନ୍ଲେଃକେ । ୧୩ ନେଙ୍ଗ୍ ଆପେକେ ବୁଦି ବିମ୍ୱକ୍ନେ ସତ୍ ଆଣ୍ଡେଙ୍ଗ୍ ନିମାଣ୍ତା ବାବ୍ରେ ମନେ ବପା ବାରି ମାପ୍ରୁ ଜିସୁ କିସ୍ଟନେ ଏତେ ମିସେଚେ ସତେଆ ଆଲାଦ୍ ବାରି ଦରମ୍ ବିସ୍ବାସ୍ରେ ତେରେପେତେ ଆଡିଙ୍ଗ୍ପା । ୧୪ ଆଣ୍ଡିନେ ମ୍ନା ବିସୟ୍ନେ ଦାଇତ୍ ପେନେ ଆଡ଼ାତ୍ରା ମିସୁଚେ ଲେଃକେ ନେଁଇଂନେ ବିତ୍ରେ ବାସା ଲେଃକ୍ନେ ପବିତ୍ର ଆତ୍ମାନେ ବପୁରେ ମେଁ ସାପାକେ ନିମାଣ୍ତା ବାବ୍ରେ ବପା ।
୧୫ ପେ ମ୍ୟାପେଲେକେ ଫୁଗେଲ ବାରି ହର୍ମଗେନା ଆନ୍ତାର୍ଚେ ଆସିଆ ପ୍ରଦେସ୍ନ୍ନିଆ ସାପାରେ ଆନେଙ୍ଗ୍ ଆନ୍ତାର୍ ବଆର୍କେ । ୧୬ ଡାଗ୍ଲା ଅନୀସିଫର ଜାବର୍ ତର୍ ପାଙ୍ଗ୍ଚେ ଆନେଙ୍ଗ୍ ସାନ୍ତି ବିବକେ; ନେଙ୍ଗ୍ ବନ୍ଦି ଡାଗ୍ଚେ ମେଁ ଗ୍ୟାସଃ ଆଡିଙ୍ଗ୍କେ ଣ୍ତୁ । ମେଁନେ ପରିବାର୍ ଆଡ଼ାତ୍ରା ଇସ୍ପର୍ନେ ଦୟାଦରମ୍ କୁସାମୁତି ଡିଙ୍ଗ୍ଣ୍ଡିଂ । ୧୭ ରୋମ୍ ନଗର୍ନ୍ନିଆ ୱେଚାକ୍ନେ ଦାପ୍ରେ ମେଁ ଆନେଙ୍ଗ୍ ତୁର୍ତୁର୍ଚେ ନେଙ୍ଗ୍ ଡାଗ୍ରା ପାଙ୍ଗ୍ ଲେଃକେ । ୧୮ ମ୍ନା ବିଚାର୍ ଦିନା ମାପ୍ରୁ ମେଁଇଂନେ ଆଡ଼ାତ୍ରା ଦୟା ଡିଙ୍ଗ୍ଲେ । ଏଫିସିୟ ନ୍ନିଆ ମେଁ ନେଙ୍ଗ୍ନେ ଉଡ଼ି ସାଆଜ୍ୟ ଡିଙ୍ଗ୍ ବକେ ପେ ଆତେନ୍ ସାପା ସାମୁଆଁ ମ୍ୟାପେଲେକେ ।