1 Baku barri mili yanybayi Jisus yalungi. Muningka nyuli karu yalunya nanginkanyi jangkurranyi, “Mankukiyi nayinda duja jangkurr. Mankumanku narringka jibkanyi. Nanangini lalanbawarranyi jibkanyi mungana nyulu yarrijba nangangi jibmuku. Yarrijba nyulu jibmuku kalawunyi barrikina mungana. Baki nanda maninjaku, miku nyulimi ngankijba kalawuyngkurru bardawana. Miku. Ngankijba nyulu kalawuyngkurru yingkana yajina bayngkani. Yiningki nyulu lukulukumba langkiya wilina barrikina, baki ngankijba kalawuyngkurru barrikina maninjakuykanyi jib. 2 Ngala nanda jala ngankijba nanaba bardawana, nyulu nanda lalanbawarr jibkanyi. 3 Yingka jala jungku barrikina, nyulu lalanbawarr bardawanyi. Jala badajba nanda lalanbawarr jibkanyi, baki nanangini lalanbawarranyi bardawanyi dulaba nyulu bardawa, baki ngankijbangka nanda lalanbawarr jibkanyi kalawuyngkurru barrikina. Ngala jala badajba maninjaku, baki miku nyuliyi dulaba nanda bardawa nangangi maninjakunyi. Miku. Yiningki lukulukumba langkiya wilina barrikina. Nanamukunyi jibwanyi jingkijba yalu nanda yalungi lalanbawarr. Manku yalu nangangi jangkurr, baki jingkijba yalu nangangi jangkurr. Nijarrijba nyulu yalungi niji, ngala nyulu kaya yalungi. Jala yalu manku nangangi jangkurr baki walajba yalu, baki yalilijba nyulu yalunya. 4 Dulaba nyulu yalunya, nanamuku nanganginmuku jibmuku, baki nyulu jilajba waluwalu, ngala yalu nanganginmuku jibmuku bayngkani nangandu. Durrijba yalu nanda lalanbawarr yalungi. Durrijba yalu nanda, jingkijbangangi yalu nanda nangangi jangkurr. 5 Ngala miku yalimi durrijba ngurranyimuku. Miku. Wirlkungka yalu nanganbunanyi ngurranyinanyi, mikungangi yalimi jingkijba nangangi jangkurr. Wirlku yalu nanganbunanyi.” Barriwa. 6 Muningka karuyi yalunya nani Jisuswanyi, milidimbikanyi yalunya, ngala miku yaliya jingkijba nangangi jangkurr jibkanyi. Miku yaliya jingkijba.

7-9 Mili yanybayi Jisus yalungi, “Karu ngayu narrinya duja jangkurranyi. Ngala nyulu bijal mungijba yaji, baki nanangini lalanbawarranyi, nyulu yarrijbangka nanganginmuku jibmuku kalawuyngkurru barrikina. Yarrijbangka nyulu yalunya kalawuyngkurru barrikina, baki murumbaka nyulu bardawa yalungi. Jala murumba nanda bardawa, baki nanamuku jibmuku mardarda yalu jungku kalawuyngkurru mungana. Mikuwali yingka ngankijba kalawuyngkurru jibyurri, jala nyulu murumbaka nanda bardawa. Mikuwali warrki ngankijba kalawunyi bardawana, marda maninjaku, miku nyuliyi ngankijba kalawunyi bardawana. Ngayu barrinani nanda bardawa. Kurrkunbaka jibmuku kalawunyi nanangini bardawawanyi, baki yalu jungku mardarda. Nganinymuku baki jibarrimuku jala yalu durrijba Kud, yalu barrinani jibmuku. Ngankijba yalu bardawana jala yalu jilajba Kudyurri. Ngayu barrinani nanda bardawa. Ngayu manjijba yalunya Kudyurri, baki yalu jungku mardarda nangandu. Barriwa. Munganawa ngala nyulu kambalingijba yaji, baki walajbangka jibmuku nanankardi barri bardawananyi. Walajba yalu, baki durrijba yalu nanda lalanbawarr yalungi. Durrijba yalu lalanbawarr, baki nyulu kuyungka yalunya karnbarri baki wabudarri. Baki mili yalu wijba ngabungaburri. Ngankijba yalu bardawana, baki jungku yalu muwana kalawunyi barrikina mungana. Jungku yalu mardarda. Miku yalunyiyi wudumba yingkawanyi. Ngayu barrinani nanda bardawa. Ngayu lalanba yalunya nganinymuku baki jibarrimuku Kudkanyi. Lalanba ngayu yalunya yurrngumba, kambana baki mungana, ngala yalu walajba, baki ngala yalu ngankijba. Barriwa. Kudiya nganinymuku, badajba yalu waluwa ngaki. Badajba yali baki milidimba yalunjali. Muningka yali yanyba, ‘Ngayu Krayis. Ngayu nanda jali manjijba Kudwanyi.’ Ngala miku. Jujijba yali. Miku yaliya Krayis. Yalu barrinani maninjaku jibkanyi. Mikukiyanyi jibwanyi durrijba maninjaku, mikungangi yaliya jingkijba nangangi jangkurr. Nanda jali badajba waluwa ngaki, jali yanyba ngayu Krayis, miku yaliyanyi yingkamukunyi kuyu nangangi jangkurr. Miku yaliya durrijba nanda, mikungangi nyuli Krayis. 10 Ngala nanda maninjaku, jilajba nyuli mungana yalundurri jibyurri. Binanyba nyuli yalunya baki kurdanbiji yalunya. Daba jayalunya. Ngala ngayu miku ngayu barrinani nanda maninjaku. Miku ngayiyanyi jilajba nayinda nanginkurri daji yalunya. Jilajba ngayi, marrimbiji yalunya mardarda, lalanbiji yalunya nganinymuku jibarrimuku. Miku ngayiyanyi jilajba kurdanbiji yalunya, ngala ngayi jilajba wankambiji yalunya, maruka jala muwa nangangi Kudkanyi. Jayalu jungku wanka yurrngumba nangandu Kudnyina, baki janyulu yabimba kunyba yaji yalungi Kudwanyi.”

11 Mili yanybayi Jisus yalungi, “Ngayu barrinani nanda lalanbawarr jibkanyi. Nanangini lalanbawarranyi, nyulu yabimbaka kunyba yaji yalungi nanganginmukuyngka jibkanyi. Kurrkunbaka nyulu maninjakunyi wudumbikanyi jib. Marda warrkinyi nyulu kurrkunbaka kurdanbikanyi jib. Mankumanku nangka lalanbawarr, “Nanangini warrkiwanyi miku nyuliyi wudumba ngakinmuku jibmuku. Miku nyuliyi kurdanba yalunya. Jangayu kurrkunba nanankanyi warrkinyi. Waluku jangana nyulu kurdanba, waluwa nyuli wakaramba jib.” Nani nyulu lalanbaka nanganginmuku jibmuku. Nanamuku jibmuku yalu nanganginmirra jibmuku. Nyulu lalanbaka yalunya kudanyu barri. 12-13 Yiningki nanda mambuka jibkanyi, yiningki nyulu karu yingka lalanbiji nanganginmuku jibmuku. Wajbayi nanda yingka dungalanyi, janyulu lalanba nanda jibmuku nangangi. Jala walajbangka warrki jibkanyi, baki marrala nanda yingka, baki wirlku nyulu. Wirlku nyulu, marralangangi nyulu warrkinyi. Baki bijbawali warrkiwanyi, kurdanbawali. Wirlku nyulu nanamunanyi jibnanyi. Miku janyulu lalanba yalunya kudanyu, mikungangi yalu nanganginmirra jibmuku. Wirlku nyulu, baki kurdanbaka jib warrkiwanyi, baki jarrbalambaka yalunya junu. 14-15 Ngayu barrinani nanda kunyba lalanbawarr. Ngayu lalanba yalunya, maruka jala muwa nangangi Kudkanyi. Miku ngayiyi wirlku yalunbunanyi. Ngakinyi Buwakayu, ngana nyuli jingkijba, baki ngayu jingkijba ngaki Buwakanya. Nani barri ngayu jingkijba ngakinmuku, baki ngana yalu jingkijba. Jangaka janyba yalungi, maruka jala yalu muwa Kudkanyi. Jangaka janyba, baki nani jangayu marrimba yalunya barri mardarda. 16 Ngala yingkamuku yalu ngaki marda. Jilijba jayalu jungku nayiba mardarda ngakindu. Marda ngayimi wudumba yalunya. Jangayu marrimba yalunya nangangi Kudkanyi, barrinani jayalu mardarda jungku kalawunyi barrikina. Jayalu jingkijba ngaki jangkurr. Janganjalu durrijba. Jayalu jungku barrinani jibmuku ngaki, baki jangayu lalanba yalunya bukambiju. Nani barri jangayu marrimba kudukudu nganinymuku baki jibarrimuku nangangi Kudkanyi. Jayalu jungku Kudkanyi baki jangayu lalanba yalunya.

17 Ngaki Buwakanya nyulu marukangka muwa ngaki. Marukangka nyulu muwa ngaki, jilajbangangi ngayi kingkarrinya wayka jambarri. Wajba jangaka ngakinkanyi mankankanyi janybikanyi ngaka. Janyba jangaka, ngala miku jangayu jungku kurdan yurrngumba. Miku. Jangayu walajba mili. Baki mili jangayu wankijba. Jangayu jungku nangandu ngakinyina Buwakayu. 18 Miku jangaka janyba, kurdanbangangi janganjalu yingkamukunyi. Jangaka janyba, wajbangangi jangaka mankankanyi yalungi, kurdanbikanyi nganjalu. Narri jala jungku nayiba wayka jambana, miku nganarriyanyi karu jilaykanyi nanginkurri, baki baku barri jangaka janyba. Miku nganarriyanyi karu nani. Ngayuman ngaka yanyba. Mikuwali narri jungku mambuka ngaki. Ngayuman mambuka ngaki. Ngakinyi Buwakayu ngana jirrinybayi yabimbikanyi yaji.” Barriwa. Nani barri yanybayi Jisus. 19 Jali yalu manku nanda jangkurr nangangi Jisuskanyi, jakakajba yalungki Jumuku nanganginbunanyi. 20 Yingkamuku yali yanyba, “Mudu nyulu mudu, wuwarrngangi jungkuka nangandu kalawunyi mankanyina. Nyulu mudu. Wanyingkanyi narri nangangi manku jangkurr. Wanyingkanyi. Mudu nyulu mudu.” 21 Ngala yingkamuku yali yanyba, “Miku nyulu mudu. Mikukimi jungku wuwarr nangandu kalawunyi mankanyina. Mikuwali wuwarr yanyba nanda jangkurr jala nyuli yanyba. Mikuwali wuwarrwanyi kunymamba kabuji, baki yuku nyulu najba yaji. Miku nyulu mudu.” Barriwa.

22 Nanamanji wurarawala, baki yali jilajba nanankurri Jirusalimyurri. Jilajba yali walkurrayngkurri jurjyurri wangarranyi, niji Didikajin. 23 Mardungujbayi yaji nanamanji wurarawala. Jilalajbangka Jisus walkurranyina jurjina. Jilalajbangka nyulu nananyina yajina niji “Sulumun nangangi Ngarndu.” 24 Baki kudiya Jumuku jilajba yali nangandurri. Karrinja yali lukuluku nangandu, baki yanyba yali nangangi, “Karukiyi nurrunya duja. Ninji kuna nayinda Krayis. Kurdadikiyi nurrunya yingijba, nurrungkaja mankumanku. Jaliyi ninji nayinda Krayis jali manjijba Kudwanyi, baki karu janinji nurrunya duja.” Barriwa.

25 Jananganjayi Jisuswanyi, “Wabula ngayi karu narrinya nanda jangkurr, ngajaka jali nganarri. Karu ngayi narrinya wabula, ngala miku narriyanyi kuyu ngaki jangkurr. Waki ngayu ngakinkanyi Buwakaya. Ngana nyuli jirrinyba, ngayu yabimbiji nayinda kaja ngiruka yaji. Baki nganarri najbayi jali ngayu yabimba nayinda ngiruka yaji. Marda miku nganarriya ngajaka nanankanyi jangkurranyi, ngayu kuna Krayis. Jali narri najba nayinda ngiruka yaji ngaki, baki marda nganarrimi jingkijba. Nanangi ngirukawanyi yajiwanyi karuyi narrinya ngaki. 26-27 Ngala miku narrimi kuyu ngaki jangkurr, mikungangi narri barrinani ngakinmuku jibmuku. Nanangini lalanbawarranyi nyulu jingkijba yalunya nanganginmuku jibmuku, baki nanamuku jibmuku yalu jingkijba nanda jangkurr nangangi. Nani ngayu jingkijba yalunya, ngayu lalanba yalunya, kuyu jala yalu ngaki jangkurr. Ngala miku narrimi kuyu ngaki jangkurr. Nani miku narrimi barrinani ngakinmuku jibmuku, mikungangi narrimi kuyu ngaki jangkurr. Ngakinmukunyi, ngana yalu durrijba, ngala miku nganarrimi durrijba. Miku. 28 Jangayu mili wankamba yalunya bayngkani jalija yalungka janyba. Miku jayalungka mili janyba. Mili jayalu jungku wanka yurrngumba nangandu, ngakinyina Buwakaya. Mikuwali yingkawanyi dulaba yalunya ngakinbunanyi, lalanbangangi ngayu yalunya. Mikuwali yingkawanyi dulaba yalunya. 29 Ngakinyi Buwakayu, ngana nyuli yarrijba yalungi lalanbikanyi. Nyulu walkurra mambuka ngiruka bukambijuyngka, baki mikuwali yingkawanyi dulaba yalunya nanganbunanyi jala yalu jungku kunyba nangandu Buwakayu. Mikuwali yalunya yingkawanyi dulaba jala yalu durrijba Kud. 30 Ngaki Buwakanya marda ngayu, jungku ngali malumba. Ngayu barrinani nyulu, baki nanamannga nyulu barrinani ngayu. Malumba ngali jungku barrinani yingamali mambuka. Barriwa.” Nani yanybayi Jisus yalungi.

31 Ngala nanamukunyi Jumukunyi, miku yaliya kuyu nanda jangkurr nangangi Jisuskanyi. Ngamu yanybayi balki jangkurr nangangi Kudkanyi. Wudumba yali dungala janybiji nangandurri. Kurdanba yaliyanyi nanda Jisus, ngamungangi nyuli yanyba balki jangkurr Kudkanyi. 32 Baki yanybayi Jisus yalungi, “Yabimba ngayi kaja kunyba yaji ngiruka. Ngana nyuli jirrinyba yabimbiji yaji Buwakayu. Nulijba narri janybikanyi dungala ngakindurri, kurdanbikanyi ngana, yabimbangangi ngayi ngiruka yaji, ngala wanyi nayi ngiruka yaji. Janganarri daba, wanyingangi nayi ngiruka yaji jali ngayu yabimba.” Nani barri ngajakayi yalunya Jisuswanyi. 33 Jananganja yali Jisus, “Miku nurrimi nulijba janybikanyi dungala nganyindurri, yabimbangangi ninji kunyba yaji. Miku. Ngala nulijba nurru janybikanyi dungala nganyindurri, yanybangangi ninji balki jangkurr Kudkanyi. Yanyba ninji balki jangkurr, baki nanankardi janinya nurru daba. Ninji nganinyi, ngala yanyba nganyingki, ninji barrinani Kud. Nanankardi nurrimi janyba dungala nganyindurri, yanybangangi nganyingki, ninji barrinani Kud. Nanda balkimirra jangkurr. Barriwa.”

34 Jananganjayi yalunya Jisuswanyi, “Nanangini wankalawanyi, yarrijba nyuli jangkurr najana Kudkanyi. Nayinda jangkurr Kudkanyi nyuli yarrijba, ‘Ngayi yarrijba narrinya, narri walkurra mambuka. Barrinani Kud narri jungku. Narri yabimba nanda jala nyulu karu narrinya Kudwanyi. Nani narri barrinani Kud.’ 35 Nanda jangkurr najana Kudkanyi, nanda duja jangkurr yurrngumba, miku nangkiya yangkalamba. Nanda jali yarrijba jangkurr Kudkanyi, nyuli nijarrijba yalunya barrinani kudmuku. Nani nyuli nijarrijba yalunya, yalu barrinani kudmuku. 36 Ngala ngayu, yarrijba ngana Buwakayu, baki ngana nyuli manjijba wayka jambarri. Nyuli nijarrijba yalunya wankalamuku Kudwanyi, yalu barrinani kudmuku, ngala wanyingkanyi narri yanyba ngaki. Wanyingkanyi narri yanyba ngaki, ngayu jala yanyba balki jangkurr. Yanyba ngaka, ngayu Jandanyi Kudkanyi. Wanyingkanyi narri yanyba ngaki, nanda ngaki jangkurr balkimirra. Wanyingkanyi narri yanyba nani ngaki. 37 Jalimi miku ngayu yabimba ngiruka yaji nangangi, ngakinkanyi Buwakaya, baki marda narrimi miku kuyu ngaki jangkurr. Ngala ngayu yabimba ngiruka yaji nangangi ngakinkanyi Buwakaya. 38 Ngala jaliyi narri miku kuyu ngaki jangkurr, baki marda narrimi manku nanda ngiruka yaji jali ngayu yabimba narringi. Marda narrimi kuyu ngaki ngiruka yaji. Marda nganarrimi jingkijba, ngayu waki Kudkanyi, nyuli ngana manjijba wakinkanyi nangangi. Jaliyi narri jingkijba nyuli manjijba ngana Kudwanyi wakinkanyi nangangi, baki marda nganarrimi jingkijba, ngayu jungkuka nangandu ngakinyina Buwakayu, baki ngaki Buwakanya, nyulu jungkuka ngakindu. Malumba ngali jungku yurrngumba.” Barriwa.

39 Ngala yuwaji barri miku yaliya kuyu nangangi jangkurr. Baki wudumba yaliyanyi Jisus. Wudumba yaliyanyi kurdanbikanyi. Ngala miku yaliyi wudumba Jisus nanamanji. Barlba nyuli, baki miku yaliyi wudumba. 40 Barlba nyuli karri. Baki burrijba nyuli bundalina, niji Jurdan. Barlba nyuli karrurriji nanankurri yajiyurri jalili nyulu ngurrunba yalunya, nanangini Junwanyi Ngurrunbawarranyi. Nanaba nyulili ngurrunba yalunya wabula. Jilajbayi Jisus nanankurri yajiyurri. 41 Baki kajamuku badajba yali nanankurri nangandurri. Badajba yali nangandurri, baki yanyba yalungki, “Nanda Jun Ngurrunbawarr, jungku nyulili nayiba wabula. Miku nyuliyanyi yabimba ngiruka yaji. Miku. Ngala yanyba nyulili kunyba jangkurr nanginkanyi nganiyngkanyi, jali badajba bayngkani nangandu. Wabula nyuli yanyba kunyba jangkurr nangangi. Bukamba nanda jangkurr yanyba jali nyulu nanda ngurrunbawarr, bukamba nanda jangkurr nangangi duja.” Nani barri yalungki yanyba nangangi Jisuskanyi. 42 Marda kudukudu jali yalu jila nangandurri Jisusyurri, kuyu yali jangkurr nangangi. Barriwa.