1-2 Narri ngayangayijba nanankanyi nganyingkanyi mambukanyi, baki nani marda narri jibarrimuku, marda narrimi ngayangayijba nanankanyi nganyingkanyi nawinganjanyi. Jaliyi nganyi nawinganja, miku nyulimi krisjin, baki yuwajiwa barri marda ninjimi ngayangayijba nganyingkanyi nawinganjanyi. Marda ninjimi jungku yurlurrmba nangangi Kudkanyi yurrngumba barri. Jala nanangini nawinganjawanyi najbangka nangangi maninganja jungunkurri yurlurrmba yurrngumba, baki yiningki janyulu marda kuyu nangangi jangkurr Kudkanyi. Nanda maninganja barri, marda nyulimi miku yanymimba nanankanyi nawinganjanyi nangangi Kudkanyi, ngala marda nyulimi jungku kunyba nangangi Kudkanyi. Jalija nyulu najba nangangi maninganja jungunkurri kunyba nawinganjawanyi, baki janyulu jingkijba, nangangi maninganja jungkuka kunyba, kuyungkangangi nyulu nangangi jangkurr Kudkanyi. 3-4 Narri jibarrimuku, marda narringkimi miku mankumanku nanijba, “Jangaka kunymamba mankanyi baki nyungka, yalu naykanyi ngana. Janga wajba kajanyi dungalanyi wudumbikanyi kunyba jumbala baki murranymurrany. Janga jungku kunybayudi jumbalayudi baki murranymurranyudi.” Marda narringkimi miku mankumanku nani. Miku nyulimi ningkijba nganyi mankanyi baki jumbala Kudwanyi. Miku nyulimi nulijba nganyi, ninji jungunkanyi jirdi kunybanyi jumbalanyi. Balkijbaja nanda jumbala baku barri. Ngala nyulu nulijbangka nganyi, ninji jungunkanyi kunyba nanganginyina yuwana. Nyulu nulijbangka nganyi, ninji marukankanyi muwa yalungi yingkamukuyngka, ninji yanybikanyi kardarda jangkurr yalungi, ninji lalanbikanyi yalunya. Nani barri nyulu nulijbangka nganyi jungunkanyi. Baki janyulu kudanyu maruka muwa nganyi, jaliyi ninji jungku nani barri. 5 Wabula barri kamambarra, jawuda jibarrimuku jali durrijba nangangi yuwa Kudkanyi, yali jungku kunyba nani nangangi. Yali jingkijba Kud, janyulu yabimba nanda jali nyulu yanyba janyulu yabimba. Yali kuyu nangangi jangkurr kudanyu barri, baki nanankardi yali ngayangayijba yalunginkanyi nawinganjanyi. Baki nyuli mirnarrijba muwa Kud yalungi kudanyu barri, jali yalu jungku kunyba nani barri nangangi. 6 Nanda wankalanyi jibarri niji Sara, nyuli jungku nani barri. Nyuli jungku kunyba nangangi Kudkanyi. Nyuli maninganja nanankanyi wankalanyi niji Yabrayam. Nyuli ngayangayijba nanganginkanyi jangkurranyi, nyuli mirnarrijba muwa nangangi, baki jali nyulu yanyba nangangi, baki nyuli nijarrijba “Mambuka”. Narri maninganjamuku yalungi, marda narrimi ngayangayijba narringinkanyi nawinganjanyi nani marda. Marda narrimi miku marrala yajinyi, ngala marda narrimi jungku kunyba nangangi narringinkanyi nawinganjanyi, barrinani jungkuyi Sara kunyba nangangi Yabrayamkanyi. Barriwa.

7 Baki ninji nawinganja nangangi, ninji jingkijbangka yalunya jibarrimuku, miku yalimi ngiruka mankanyi barrinani nganinyimuku. Marda ninjimi lalanba nganyi maninganja. Marda ninjimi maruka muwa nangangi yurrngumba barri. Nimbala maykarra, jaliyi nimbala jungku malumba nani barri, baki janimbala jandanyiwuya nangangi Kudkanyi, janimbala jungku mili wanka nangangi Kudkanyi yurrngumba barri. Ngala ninji nawinganja, jaliyi ninji miku jungku kunyba nganyingkanyi maninganjanyi nani barri, baki miku nyuliyi manku nganyi jangkurr Kudwanyi. Miku nyuliyi manku nganyi jangkurr jalija ninji yanyba mududu nangangi. Barriwa.

8-9 Baki yingka jangkurr ngayu yanybaka narringi. Narri Krisjinmuku, marda narrimi malumba jungku barrinani mungkijimuku. Marda narringkimi maruka muwa. Marda narringkimi lalanba barrinani narri lalanba yalunya narringinmuku mungkijimuku. Marda narringkimi miku barrarrakijba. Jaliyi yingkawanyi muningka yabimba balki yaji nganyi, baki marda ninjimi miku yabimba balki yaji nangangi. Jaliyi yingka nyulu ngarrangarra muwa nganyi, baki marda ninjimi miku ngarrangarra muwa nangangi. Ngala marda ninjimi yabimba ngawamba kunyba yaji nangangi yurrngumba barri. Baki marda ninjimi yanyba mududu nangangi Kudkanyi nanankanyi yingkanyi. Marda ninjimi ngajaka Kud, nyulu yabimbiji kunyba yaji nangangi marda. Marda ninjimi ngajaka Kud nani nangangi, yarrijbangangi narrinya Kudwanyi, narri yabimbikanyi kunyba yaji yalungi bukambijuyngka. Jaliyi narri jungku nani, baki janyulu yabimba kunyba yaji narringi marda Kudwanyi. 10 Nanda jangkurr najana Kudkanyi yanybaka nayi barri, “Nanda jala nulijbangka jungunkanyi wanka yurrngumba nanankanyi jala malbungujba mankanyi, baki bardibardingujba mankanyi, nanda jala nulijbangka jungunkanyi mirnarrijba muwa yurrngumba barri, baki marda nyulimi miku yanyba balki jangkurr yingkanyi. Marda nyulimi miku yanyba jujambawarr jangkurr. Marda nangkimi kurrkunba yanybikanyi balki nani barri. 11 Marda nangkimi yangkalamba nanamunanyi balkinanyi yajinanyi. Marda nyulimi miku mili yabimba balki yaji, ngala marda nyulimi yabimba kunyba yaji yalungi yurrngumba barri. Marda nyulimi miku jakakajba yalunya, ngala marda nyulimi yurrngumba jungku mardumardu muwa yalungi. 12 Marda nyulimi jungku nani barri, lalanbakangangi Kudwanyi. Nyulu lalanbaka yalunya jala yalu jungku yurlurrmba nangangi. Jala nyulu yanybaka mududu nangangi Kudkanyi, baki mankuka nangangi jangkurr Kudwanyi, baki nyulu yabimbaka yaji nangangi marda. Nyulu yabimbaka nanda yaji jala ngajaka nanangini nganinyiwanyi. Ngala jaliyi nangka yangkalamba nanganbunanyi Kudnanyi, baki miku nyuliyi manku nyulu yanybikurri nangangi Kudwanyi. Miku nyuliyi yabimba yaji nangangi.” Nani barri nanda jangkurr najana Kudkanyi yanybaka.

13-14 Jaliyi narri jungku yurlurrmba nangangi Kudkanyi yurrngumba barri, baki janyulu lalanba narrinya yurrngumba. Yiningki jayalu manku kiji narringi, yiningki janarrinya linjumba, ngala marda narrimi miku marrala yalungi, marda narrimi miku balkijba muwa yajinyi. Marda narrimi yuwajiwa jungku kunyba yalungi, baki janarri mirnarrijba muwa. 15 Marda narrimi ngayangayijba nangangi, narringinkanyi mambukanyi Jisus Krayiskanyi. Marda narringkimi mankumanku nangangi Jisus Krayiskanyi. Marda narrimi wajba Jisus Krayis narringinkanyi kunybanyi jangkurranyi, nyulungangi narringi wirimalaru. Jaliyi yingkawanyi ngajaka narrinya, yanka narri jingkijba Jisus Krayis, janyulu lalanba narrinya, jaliyi yingkawanyi ngajaka narrinya nani, baki marda narrimi karu yajinyi. Marda narrimi karu nangangi Jisus Krayiskanyi, bababanyamba nyulu narrinya, kuyungangi narri nangangi jangkurr. Baki nanankardi barri janarri baku jungku kingkarri nangandu yurrngumba barri. Nani barri marda narrimi karu. 16 Ngala marda narrimi yanyba kardarda jangkurr nangangi. Marda narrimi miku ngirrwa nangangi, marda narrimi miku jakakajba, ngala marda narrimi yanyba kardarda jangkurr nangangi. Jaliyi yingka yanyba balki jangkurr yingkanyi nganyingkanyi, baki marda ninjimi miku yanyba balki jangkurr yingkanyi nanganginkanyi. Marda ninjimi miku yanyba balki jangkurr nanganginkanyi nani barri. Nganyingka yanybaka muwa, ninji jungkuka kunyba, jaliyi ninji miku yanyba balki nani. Jaliyi yingka yanyba balki jangkurr yingkanyi nganyingkanyi, ngala ngawamba ninji yanyba kunyba jangkurr nangangi, baki janinji jungku mardumardu muwa. Janinji mardumardu muwa, jingkijbangangi ninji yalunya, baku barri jayalu manyiru yajinyi. Jayalu manyiru nanankanyi balkinyi jangkurranyi jali yalu yanyba nganyi. Jayalu manyiru nanankanyi balkinyi jangkurranyi, jalija yalu najba ninya jungunkurri kunyba yurrngumba, durrijbangangi ninji nangangi jangkurr Jisus Krayiskanyi. 17 Jaliyi yingkamukunyi yalu linjumba ninya, baki yiningki janyulu miku kurrkunba yalunya Kudwanyi. Yiningki janyulu munyajba yalunya linjumbikurri ninya. Jayalu linjumba ninya, baki nanankardi janinji jungku mili ngiruka nangangi Kudkanyi. Janinji jungku mili ngiruka baki mili ngiruka nangangi yurrngumba barri. Ngala jaliyi yalu linjumba ninya, yabimbangangi ninji balki yaji yalungi, baki mikuwali nanangini kijiwanyi yabimba ninya jungunkanyi mili ngiruka nangangi Kudkanyi. Nanda daburrdaburr yaji nganyi. Barriwa.

18-19 Miku nyuliyanyi yabimba balki yaji Jisus Krayiswanyi. Miku yingamali balki yaji. Yurrngumba nyuli jungku kunyba nangangi Kudkanyi, ngala nangki janyba kurndana ngamanginkanyi balkinyi yajinyi. Janyba nangki bukambijuyngka ngamanginkanyi balkinyi yajinyi. Ngawamba barndaykamba nangki janyba ngamanginkanyi balkinyi yajinyi. Miku nangkiyanyi mili janyba. Jali nyulu kurdan, baki nangangi ngarndu jilajbayi yingkayurri yajiyurri. Jungkuyi nangangi ngarndu nananyina yajina jalili yalu jungku ngarndumuku yalungi kuyuwananyi. Nanaba barri jungkuyi nangangi ngarndu, baki nyuli karu yalunya yingkamuku ngarndumuku nangangi Kudkanyi, nyulu lalanbawarr mardarda. Barriwa. Baki nanankardi janyulu kuyu narrinya nangandurri Kudyurri Jisus Krayiswanyi. Janyulu kuyu narrinya nangandurri Kudyurri bayngkani jalija narringka janyba. Janarri jungku kingkarri nangandu barri.

20 Nanda wankalanyi ninji Nuwa, nyuli jungku yurlurrmba nangangi Kudkanyi, baki karuyi Nuwa Kudwanyi, nyulu yabimbiji muwarda. Baki yabimbayi walkurra muwarda Nuwawanyi. Waki nyuli yurrngumba barri, yingkana kindilkurrinyina, baki yingkana kindilkurrinyina. Kajana kindilkurrinyina nyuli waki, baki yukumbayi Kud nangangi, ngala nyuli yabimba nanda muwarda. Ngala nyuli yabimba muwarda, baki karu nyuli yalunya balkimuku nangangi Kudkanyi Nuwawanyi. Nyuli karu yalunya nangangi Kudkanyi, janyulu manjijba walkurra mali, baki jayalu ngurrulijba malina. Jayalungka janyba malina, jaliyi yalu miku kuyu nangangi jangkurr Kudkanyi, jaliyi yalu miku ngindu muwa yalunginkanyi balkinyi yajinyi. Ngala miku yaliyanyi kuyu nangangi jangkurr Kudkanyi. Miku. Jali bukamba barri nanda muwarda, baki ngankijbayi Nuwa muwardana, baki jawuda nangandu, nangangi maninganja, baki nanganginmuku murrku jandanyimuku, baki yalunginmuku maninganjamuku. Ngawamba yali ngankijba muwardana, 8 barri. Baki marrimbayi yalunya mardarda muwardana Kudwanyi, ngala nyuli manjijba walkurra mali. Ngala nanamuku balkimuku yali ngurrulijba malina. Baki yalunginmuku ngarndumuku jilajbayi nanankurri yajiyurri ngarndunyi. Nanaba yalili jungku ngarndumuku. Jilajbayi Jisus ngarndu yalundurri, baki karu nyuli yalunya nangangi Kudkanyi. Karu nyuli yalunya nangangi Kudkanyi, nyulu nanda lalanbawarr mardarda. Nanaba nyuli jungku marndakaja, baki mili wankambayi Jisus Kudwanyi, nyulu jungunkanyi nangandu. Barriwa.

21 Marda ngambalimi mankuwa yalunya nanamuku wankalamuku jali yalu miku kuyu nangangi jangkurr Nuwanyi, baki nanankardi yalungki janyba. Ngala ngambala kuyungka nangangi jangkurr Jisus Krayiskanyi, baki nanankardi jangambala jungku wanka nangandu kingkarri. Baki nani barri ngambala jingkijbangka Kud, nyulu nanda lalanbawarr mardarda. Nyuli mili wankamba Jisus Krayis Kudwanyi, baki nani marda janyulu mili wankamba ngambalanya marda. Janyba nangki Jisus Krayis ngambalangi. Janyba nangki ngamanginkanyi balkinyi yajinyi. Baki nanankardi barri jaliyi ngambala kuyu nangangi jangkurr, baki janyulu marrimba ngambalanya mardarda Kudwanyi. Jala ngamanjalu ngurrunba wabudana, baki ngambala mili walajba wabudananyi. Baki nani barri jali nangki janyba Jisus Krayis, baki mili wankambayi Jisus Krayis Kudwanyi. Baki nani barri jala ngamanjalu ngurrunba wabudana, baki miku nanda barrinani ngambalaka wakardaba mankanyi, ngala nanda barrinani ngambalaka wakardaba kurdulu nangangi Kudkanyi. Baki jala ngambala walajba wabudananyi, baki nanda barrinani jala ngambalaka yangkalamba ngamanbunanyi balkinanyi yajinanyi, baki ngambala jungkuka mili wanka nangangi Kudkanyi. Mankumanku narringka nangangi Nuwanyi. Miku nyuliyanyi ngurrulijba malina, ngala marrimbayi Nuwa mardarda Kudwanyi. Baki jali ngamanjalu ngurrunba wabudana, baki ngambala mili walajbayi wabudananyi. Nanda barrinani marrimbaka ngambalanya mardarda Kudwanyi, baki miku ngambalakiyi janyba yurrngumba barri. Miku ngambaliyi jungku kurdan yurrngumba barri. 22 Jisus Krayis barri, nyulu jungkuka wanka kingkarri nangandu Kudnyina. Yarrijbayi Jisus Krayis wirimalaru Kudwanyi. Nyulu wirimalaru ngambalangi, baki yalungi marda Yanjilmukuyngka, baki yalungi kunybamuku ngarndumuku jalili yalu jungku lalijina. Nyulu wirimalaru bukambijuyngka yalungi. Barriwa.