1 Abraham wavine sago irutini da kawana vuna. Wavinena kana vava Ketura. 2 Ivi tuwa da natunatuna Simram, Jokisan, Medan, Midiyan, Isibaki ma Suwaya. 3 Jokisan natunatuna na Seba ma Dedan. Ma Dedan tupurereghina na Asura damsi, Letusi damsi ma Leyum damsi. 4 Ma Midiyan natunatuna na Epa, Eperi, Hanoki, Abida ma Elda. Weni wawayisi peyarisi na Ketura tupurereghina.

5 Ma Abraham na aviyavisina rapenai peyarina na natuna Aisiki kurina ivi damani. 6 Ma karakava da ita rabobo na natunatuna tomotomowisi kakawana viya gwabisiyai na puyo irereghi kurisi. Ma ku maramatana ivonatawesi ine rabaraba da ke Aisiki gwabinai ita makai.

7 Abraham imakai da kana madegha 175. 8 Imakii bubuna da ina yawasa iguri ma imagura kirakai, vaghina ma irabobo. 9 Natunatuna Aisiki da Ismayel tupuwina iviini inae ku karawaga da ku buba kamona iterei. Nani bubana na Makipela dobuna kamonai emakamakai, tuna na Mamre ririnai. Karenai tuna tanona na Hiti tomowa Eperon rapenai, tuna Soya natuna. 10 Muriyai Abraham inae da Hiti damsi gwabisiyai igimari ma kawana tupuwina nani bubana kamonai iterei. Ma Abraham irabobo na bade bubana kamonai, kawana Sera yavata idogosi.

11 Abraham irabobo murinai na natuna Aisiki dogo kana vava Be Layai Roi na ririnai imakamakai. Ma God, Aisiki ivi biibiini.

12 Weni tuna na Abraham natuna Ismayel ina varagutugutu. Tuna na Heiga natuna ma Heiga na Sera ina bigabiga wavinena, ina dobu na Egypt.

13 Ismayel natunatuna tomotomowisi kii vava na weni, i tupuwa nununai tagiruma. Natuna iyarokona na Nebayoti, tuna murinai na Keda, Adebel, Mibsam, 14 Misma, Duma, Masa, 15 Hadadi, Tema, Jetura, Napis ma Kedema. 16 Weni damsi na Ismayel natunatuna, ti na dam ivi 12 i kaekiki mau. Ma ti na i meyagai ma i taki nununai ivivi makiiyana. 17 Ma Ismayel imakai da kana madegha 137 ma irabobo. 18 Ma tupurereghina peyarisi i dobu na Havila da ku Sura warerena, dobuna na Egypt ina parata ririnai ma ku maramatana. Keta sago enenae ku Asura dobuna ma nani ketana kuta viiya na i dobu kuta panani. Ma peyarisi mara nonowa ti mani i rakaraka yavata ivivi kawapata.

19 Weni tuna na Abraham natuna Aisiki ina varagutugutu. 20 Aisiki kana madegha 40 ma itavine, kawana na Rebeka. Rebeka ina mamai na Betuwel ma novuna na Leiban. I dobu ghamana na Arameya ma i dobu gisina kana vava na Padan Aram* Padan Aram kana vava sago na Northwest Mesopotemiya..

21 Ma Rebeka na gagarina. Tuna kubiine Aisiki inipowana Bada kurina da iti tuwa ma ina nipowana ivi yanei. Vaghina ma, Rebeka iropeya. 22 Ma damina iviiya da iti tuwa da wawayaruwa ma pepeyisi na manawina kamonai ivivi papareyana. Ma i maduwa ivona bo, “Weni tuna na avi berana etuputupuwa kuriku?” Tuna kubiine ivi nowi Bada kurina da akova ita viiya.

23 Ma Bada ivonapotei bo,

24 Kana mara ipisi da iti tuwa ma ivi tuwa da tomotomowa ruwa. 25 Natuna iyarokona na buroburona ma inikorokorona tuna kubiine ivi vavei, ‘Iso† ‘Iso’ Hibru gamonai ‘Iso’ iyamna ‘inikorokorona.’ .’ 26 Ma murimurina ikiikiibau na iyarokona ku kaekarena ivokikita vaghata, tuna kubiine ivi vavei, ‘Jeikap‡ ‘Jeikap’ Hibru gamonai ‘Jeikap’ iyamna ‘kaekarena ivokikita,’ ma tuna na miiba, iyamna ‘vibero wawayina.’.’ Aisiki kana madegha 60 na Rebeka nani ededisi ivi tuwesi.

27 Vaghina ma, nani tomotomowisi imagumagureyana na Iso tuna yebagha bogana ma dipa kana wawaya. Ma Jeikap tuna kawapotapotana ma numiyai, yobe kamosiyai imakamakai. 28 Aisiki ina kayowana ghamana siya tuna kubiine ina nuwaviina Iso. Ma Rebeka, tuna ina nuwaviina ghamana Jeikap.

29 Mara sago Jeikap bini yebayebarisi ivivi tavi ma Iso dipiyai ikiibau. Inekiibau na vitonara ikara kirakiiyei 30 tuna kubiine ivona bo, “Vitonara ikara kirakiiyeku, bini kuta vereku da ata kani.” (Iso kana vava sago na Edom, tuna vavana iyamna ‘yebayebarina.’)

31 Ma Jeikap ivonapotei bo, “Kunona kuni vaghinei da iyaroko buderina kudubina kuna vereku da rapekuwai na vaghina.”

32 Iso ivona bo, “Kekitiku, vitonara ekarakara kirakiiyeku da gisina kava ma ana rabobo. Aviyavisina biibiina nani buderina kamonai ana panani?”

33 Jeikap ivonapotei bo, “Kunona vonakiiyapa bagibagina keterei, kuni vaghinei da am buderi ana viiya.”

Vaghina ma, Iso ivi vaghinei. Ina vonakiiyapa bagibagina iterei da aviyavisina kudubina i mamai iti damani kurina na ke tuna ina viiya ma Jeikap ini rapenei. 34 Muriyai Jeikap parawa da bini iverei da ikam ma iuma ikovi ma ivomiiri da inae.

Ma vaghina, Iso ina ‘buderi’§ ‘buderi’ Hibru damsi i kiki na tomowa ina rabobo na natuna tomowina iyarokona na aviyavisina mamai rapenai na kudubina tuna ina viiya. Weni kamonai na tano, ghamoghamo, bigabiga wawayisi, silva ma gold ma bade vighaviya, vitava ma wayowa sawarisi. Ma natunatuna murimurisi na ini kegha, iyarokona kubiine ina biga. ivi wapai ma kesago iti nuwapoyei.