5
1 ቄሴታ ሃላቃ ጊዲ ሹሜቲዛዴይ ዳሮ ኣሳ ጊዶፌ ዶሬቴሲኔ ኣሳ ጊሽ ጊዲዲ ኢሞታኔ ናጋራ ጊሽ ያርሾ ሺሻናስ ዶሬቴስ። 2 ኢዚካ ባ ባጋራ ዳቡራንቻ ጊዲዳ ጊሽ ኤሮንታ ኣሳታሲኔ ኦጌ ባሊዳይታስ ቃꬌታና ዳንዳዬስ። 3 ኢዚ ባ ናጋራ ጊሺኔ ሃራ ኣሳታ ናጋራ ጊሽ ያርሾ ሺሻናስ ኢዛስ ቤሲዛይ ሄሳ ጊሻሳ። * ሌዌ 9፡7 4 ኣሮኔይ ፄይጌቲዳይሳꬆ ኢዚ ፆሲ ፄይጊዳዴ ጊዳናስ ቤሴስ ኣቲን ሄሳ ሄ ቦንቾዛ ባርካ ባስ ኤኪዛዴይ ዴና። * ኬሳ 28፡1
5 ሄሳꬆካ ኪርስቶሲ ቄሴታ ሃላቃ ጊዳና ቦንቾ ባርካ ባስ ኤኪቤና። ጊዶ ኣቲን
“ኔ ታ ናኮ፤
ታ ኔስ ሃች ኣዋ ጊዳዲስ”
ጊዳ ፆሳፌ ኤኪዴስ። * ማዛ 2፡7 6 ሄሳꬆካ ሃራሶን
“ማልኬፄዴቄ ሹሜታ ማላ
ኔኒ ሜርናስ ቄሴታ ሃላቃ” ጌስ። * ማዛ 110፡4
7 ዬሱሲ ሃይሳ ቢታ ቦላ ዲዛ ዎዴ ኢዛ ሃይቆፔ ኣሻና ዳንዳዪዛይሳኮ ኣፉንፂሼ ጊታ ቃላራ ዎሳ ዎሲዴስ። ኣዳፌ ኣሽኬቴꬃራ ኢዚ ኣዛዜቲዳ ጊሽ ኢዛ ዎሳ ፆሲ ሲዪዴስ። * ማቶ 26፡36-46፤ ማር 14፡32-42፤ ሉቃ 22፡39-46 8 ኢዚ ፆሳ ና ጊዲኮካ ባ ኤኪዳ ዋዬዛፔ ኣዛዜቴꬅ ታማሪዴስ። 9 ሄሳ ባጋራ ፓጬይ ባይንዳዴ ጊዲ ቤቲዳይሳፌ ጉዬ ባና ኣዛዜቲዛይታስ ኡባስ ሜርና ኣቶቴꬃስ ጋሶ ጊዲዴስ። 10 ማልኬፄዴቄ ሹሜቴꬃ ማላ ቄሴታ ሃላቃ ጌቴቲ ፆሳን ሹሜቲዴስ።
ኣማኖን ሚናና ማላ ኢሜቲዳ ቆፍሶ
11 ሄሳ ጊሽ ኑ ሃሳያና ሚሺ ቡሮ ዳሮይ ዴስ። ጊዶ ኣቲን ኢንቴ ዶታዓታ ጊዲዳ ጊሽ ኢንቴና ኤሪሶይ ሜቶ። 12 ኢንቴ ሃኒ ዎዴ ኣስታማሬ ጊዳናስ ቤሲሺን ፆሳ ቃላ ቡሮ ኮይሮፔ ዴንꬂዲ ኢንቴና ታማርሲዛ ኣስ ኢንቴስ ኮሼስ። ኢንቴስ ኮሺዛይ ሚኖ ካꬅ ጊዶንታ ማꬃ። 13 ማꬅ ፓሄቲዛይ ቂ ጉꬃ ና ጊዲዛ ጊሽ ሎዖኔ ኢታ ሻኪዛ ቲሚርቴ ሻኪ ኤሬና። 14 ሚኖ ካꬅ ጊዲኮ ሎዖኔ ኢታ ሻካናስ ባናቴꬃ ዶሲሲዳ ዎዝና ኩንꬂዳ ኣሳታሳ።