1 ሄሳፌ ጉዬ ጊታ ማላሊሲዛ ማላታይ ቦላ ሳሎ ቦላ ቤቲዴስ። ኢሲ ማጫሲያ ኣዋ ኣርሼ ማይዓዳ፥ ኣጊና ባ ቶሆን ዬꬋዳ ታማኔ ናምዑ ፆሊንቴታ ኣክሊሌ ማላ ባ ሁዔን ዎꬃዳ ቤታዱስ። 2 ኢዛካ ሻራራ ዳዉስ። ዬሎ ሚፃይ ኢዞ ኦይኪን ሜቶታዳ ዋሳዱስ።

3 ሄሳꬆካ ሃራ ማላታይ ሳሎ ቦላ ቤቲዴስ። ኢዛስ ላፑን ሁዔይኔ ታሙ ካጬቲ ዲዛ ኢሲ ጊታ ዳዌይ ቤቲዴስ። ኢዛ ሁዔታ ቦላካ ላፑን ዛዉዴቲ ዴቴስ። * ዳኔ 7፡7 4 ኢዚ ባ ጎይናራ ሳሎ ፆሊንቴታፔ ጪጎ ጊዲዛይታ ሳሎፔ ዱጌ ቢታን ዬጊዴስ። ሄ ማጫሳያ ዬሊሺን ኢዛ ዬሊዛ ናዛ ሚታናስ ቆፒዲ ዳዌዚ ሄ ዬላናስ ማቲዳ ማጫሳይስ ሲንꬃን ኤቂዴስ። * ዳኔ 8፡10

5 ማጫሳያካ ካሴ ዴሬታ ኡባ ቢራታ ጉፌራ ሃሪዛ ኣቱማ ና ዬላዱስ ሺን ናዚ ቃስ ፑዴ ፆሳኮኔ ፆሳ ኣልጋኮ ኤኬቲዴስ። * ኢሳ 66፡7፤ ማዛ 2፡9 6 ማጫሳያካ ዱጌ ባዞ ቢታ ቤታዱስ። ሄ ባዳ ኢሲ ሺያኔ ናምዑ ፄታኔ ኡሱፑን ታሙ ጋላስ ጋካናስ ቦንቾን ዳናሶ ፆሲ ካሴ ኢዚስ ጊጊስ ዎꬂዴስ።

7 ሳሎ ቦላ ኦላይ ዴንዲዴስ። ሚካሌይኔ ኢዛ ኪታንቻቲ ዳዌዛራ ኦሌቲዳ። ዳዌዚኔ ኢዛ ኪታንቻቲካ ዛሪዲ ሚካሌራኔ ኢዛ ኪታንቻታራ ኦሌቲዳ። * ዳኔ 10፡13፥21፤ 12፡1፤ ዩሁ 9 8 ጊዶ ኣቲን ዳዌዚኔ ኢዛ ኪታንቻቲ ፆኔቲዳ። ሄሳፌ ጉዬ ኢስታስ ሳሎን ዳናሶይ ቤቲቤና። 9 ሄ ጊታ ዳዌዚ ዱጌ ዬጌቲዴስ። ኢዚካ ኩሜꬃ ኣላሜዛ ባሌꬂዛ ዳቡሎሳ ዎይኮ ፃላዔ ጌቴቲ ፄይጌቲዛ ቤኒ ዎዴ ሾሻዛ። ኢዚ ቃስ ዱጌ ቢታ ቦላ ዬጌቲዴስ። ኢዛ ኪታንቻቲካ ኢዛራ ኢሲፌ ዬጌቲዳ። * ሜꬌ 3፡1፤ ሉቃ 10፡18

10 ሄሳፌ ጉዬ ኢሲ ጊታ ጊሪስ ሳሎፔ ሂዝጊሺን ታ ሲያዲስ “ሄኮ ኣሴ ኣሾይ፥ ዎልቃይኔ ካዎቴꬂካ ኑ ጎዳስ ጊዲዴስ። ማታይካ ኪርስቶሳስ ጊዲዴስ። ኑ ኢሻታ ኑ ጎዳ ሲንꬃን ጋላሲኔ ቃማ ሞቲዛ ኑ ኢሻታ ባርጋራይ ዱጌ ዬጌቲዴስ። * ኢዮ 1፡9-11፤ ዛካ 3፡1 11 ኢስቲ ዶርሳዛ ሱꬃኒኔ ባ ዮቲዳ ማርካቴꬃ ቃላን ኢዛ ፆኒዳ። ኢስቲ ባ ሼምፖስ ሚሼቶንታ ዲሼ ባና ሃይቆስ ኣꬂ ኢሚዳ። 12 ሄሳ ጊሽ ሳሎቲኔ ኢስታ ጊዶን ዲዛይቲ ኢንቴ ዉሪካ ኡፋዬቲቴ። ኢዛስ ጉꬃ ዎዴይ ኣቲዳይሳ ኤሪዳ ጊሽ ዳቡሎሲ ጊታ ሃንቆራ ዱጌ ኢንቴኮ ዎꬊዳ ጊሽ ቢታሲኔ ኣባስ ኣዬ ኣና! ኣዬ ኣና!”

13 ዳዌዚ ዱጌ ቢታ ቦላ ዬጌቲዳይሳ ቤዪዲ ኣቱማ ና ዬሊዳ ማጫሳዮ ጎዴሬꬂዴስ። 14 ማጫሳያካ ባስ ጊጌቲ ዲዛሶ ፒራꬋዳ ዱጌ ባዞ ባና ማላ ኢዚስ ጊታ ጎሌ ካፎ ቄፌ ሚሳቲዛ ናምዑ ቄፌቲ ኢሜቲዳ። ኢዛ ሄን ዳዌዛ ሲንꬃፌ ሃካዳ ሄꬑ ላይꬂኔ ባጋ ጋካናስ ሎዖ ቦንቾን ናጌታዱስ። * ዳኔ 7፡25፤ 12፡7

15 ሄ ማጫሳዮ ዲዖይ ኤኪ ባና ማላ ሾሻዚ ሻፋ ሃꬄ ኬና ሃꬄ ባ ዱናፔ ጩቲዲ ኢዚፔ ጉዬ ባጋራ ጉሲዴስ። 16 ጊዶ ኣቲን ቢታያ ሄ ማጫሳዮ ማዳዱስ። ባ ዱና ዶያዳኔ ሄ ዳዌዚ ጩቲዲ ጉሲዳ ሃꬃካ ፁንፃዱስ። 17 ዳዌዚ ማጫሴይ ቦላ ሃንቄቲዲ ሃንኮ ኣቲዳ ኢዚ ዜሬꬃታራ ኦሌታናስ ቢዴስ። ኢስቲካ ፆሳ ኣዛዞታ ናጊዛይታኔ ዬሱሳስ ኣማኔቲዲ ማርካቲዛይታ። 18 ዳዌዚካ ኣባ ኣቻን ኣጬ ቦላ ኤቂዴስ።