1 ሄሳፌ ጉዬካ ሄ ዶርሳይ ላፑን ማታሜታፔ ኮይሮ ማታሜዛ ዶዪሺን ታ ቤያዲስ። ሄ ኦይዱ ዶዓታፔ ኢሶይ ዳዳ ጉጉንꬃ ማላ ቃላራ “ሃ ያ!” ጊሺን ሲያዲስ። 2 ቃሴካ ቦꬃ ፓራ ቤያዲስ። ሄ ፓራዛ ቦላ ባ ኩሼን ዎንዳፌ ኦይኪዳዴይ ዴስ። ኢዛስ ቃስ ኣክሊሌይካ ኢሜቲዴስ። ኢዚካ ፆኒዛዴ ጊዲዲ ፆኖፔ ጌዴ ፆኖን ባናስ ኬዚዴስ። * ዛካ 1፡7-8፤ 6፡3፥6

3 ሄ ዶርሳይ ናምዓንꬆ ማታሜዛ ዶይዳ ማላ ናምዓንꬆ ዶዓዚ “ሃ ያ!” ጊሺን ታ ሲያዲስ። 4 ቃሴካ ሃራ ፄቃ ዞዖ ፓራይ ኬዚዴስ። ሄ ፓራ ቶጊዳዴይ ቢታ ቦላፌ ሳሮቴꬅ ꬋይሳና ማላኔ ኣሳይ ባ ጋርሳን ኢሶይ ኢሳ ዉርሳና ማላ ኦꬂሳናስ ኢዛስ ጎዳቴꬂኔ ዎጋ ጊታ ማሻይ ኢሜቲዴስ። * ዛካ 1፡7-8፤ 6፡2

5 ዶርሳዚ ሄꬓንꬆ ማታሜዛ ዶዪን ሄꬓንꬆ ዶዓዚ “ሃ ያ!” ጊሺን ታ ሲያዲስ። ቃሴ ካሬꬃ ፓራ ቤያዲስ። ሄ ፓራ ቦላ ኡቲዳይሲ ባ ኩሼን ማካ ሚሽ ኦይኪዴስ። * ዛካ 6፡2፥6 6 ኦይዱ ዶዓታ ጊዶፌ ዪዳ ሚሳቲዛ ቃላ ሲያዲስ፤ ሄ ጊሪሳይካ “ባጋ ኪሎ ጊዲዛ ጊስቴ ኢሳዴስ ኢሲ ጋላሳ ዳሞዛ፤ ቃሴ ኢሲ ኪሎ ኩማና ሳይሶ ፓጬ ጊዲዛ ባንጋይ ኢሲ ጋላሳ ዳሞዛ ጊዶ። ጊዶ ኣቲን ዛይቴኔ ዎይኔ ሚꬅ ቆሆፓ” ጊሺን ታ ሲያዲስ።

7 ሄ ዶርሳይ ኦይዳንꬆ ማታሜዛ ዶዪን ኦይዳንꬆ ዶዓዛ ቃላይ “ሃ ያ!” ጊሺን ሲያዲስ። 8 ቃሴካ ጮሎሎ ፓራ ቤያዲስ። ፓራ ቶጊዳይሳ ሱንꬂ ሃይቆ ጌቴቴስ። ኢዛ ቃስ ዱፎይ ካሌስ። ሃይቆይኔ ዱፎይ ቢታፌ ሳይሶ ኦላን፥ ጋፋን፥ ቦሻኒኔ ባዞ ዶዓን ዎꬋና ማላ ጎዳቴꬂ ኢስታስ ኢሜቲዴስ። * ሂዚ 14፡21

9 ኢቻሻንꬆ ማታሜዛ ኢዚ ዶዪን ፆሳ ቃላ ጊሺኔ ባ ማርካቲዳ ማርካቴꬃ ጊሽ ሃይቂዳይታ ሼምፖታ ያርሾ ያርሺዛሶዛ ጋርሳን ቤያዲስ። 10 ኢስቲ ቃስ ቃላ ꬎቁ ሂስቲዲ “ጌሻኔ ቱማንቻ ጎዳዉ! ኔኒ ቢታ ቦላ ዲዛ ኣሳ ቦላ ፒርዶንታይኔ ኑ ሱꬃ ጊሽ ኔ ሃሎ ኬሶንታይ ኣዪዴ ጋካናሴ?” ጊዲ ዋሲዳ። 11 ኢስታስ ኢሳስ ኢሳስ ቦꬃ ማይዖይ ኢሜቲዴስ። ኢስታ ማላቲካ ቡሮ ሃይቃና። ኢስታ ማላ ኦሳንቻ ጊዲዳ ኢስታ ላጌቲኔ ኢስታ ኢሻታ ቆዳይ ኩማና ጋካናስ ኢስቲ ጉꬃ ዎዴስ ሼምፒዲ ታካና ማላ ኢስታስ ዮቴቲዴስ።

12 ሄሳፌ ጉዬ ሄ ዶርሳይ ኡሱፑንꬆ ማታሜዛ ዶዪን ታኒ ጌዴ ኢዛኮ ፄላዲስ፤ ሄኮ ቢታይ ዎልቃማ ቃꬅ ቃፂዴስ። ኣዋ ኣርሼይ ኣሲ ካዮስ ማይዒዛ ካሬꬃ ማይዖ ማላ ካሬፂዴስ። ኣጊናይካ ኩሜꬃራ ሱꬃ ማላ ዞዓዱስ። * ኣጁ 11፡13፤ 16፡18፤ ኢሳ 13፡10፤ ኢዩ 2፡10፥31፤ 3፡15፤ ማቶ 24፡29፤ ማር 13፡24-25፤ ሉቃ 21፡25 13 ዎልቃማ ኣሱራ ጫርኮይ ጫርኪዲ ሚꬃ ኣይፌ ቆቆፊዛ ማላ ሳሎፔ ፆሊንቴይ ቆቆፌቲዴስ። * ኢሳ 34፡4 14 ሳሎይካ ዋራቃታ ማላ ፃፄቲዲ ኪቺዴስ። ዙማቲኔ ኣባ ጊዶን ዲዛ ጋዴቲ ዉሪካ ባ ዲዛሶፔ ꬋዪቺዳ። * ኣጁ 16፡20 15 ቢታ ቦላ ዲዛ ካዎቲ ቢታ ሃሪዛይቲ፥ ኦላ ሃላቃቲ፥ ዱሬቲ፥ ዎልቃማቲ፥ ኣሽካራቲኔ ጎዳቲ ዉሪካ ጎንጎሎ ጊዶኒኔ ዙማታ ጋርሳን ዛላታ ጋርሳን ቆቴቲዳ። * ኢሳ 2፡19፥21 16 ዙማታኔ ዛላታካ “ኑና ካሚቴ! ኣልጋ ቦላ ኡቲዳይሳ ሲንꬃፌ፥ ሄ ዶርሳዛ ሃንቆፌ ኑና ቆቲቴ። * ሆሴ 10፡8፤ ሉቃ 23፡30 17 ዎልቃማ ሃንቆ ጋላሳይ ጋኪዴስ። ኢዛ ኦኔ ዳንዳያናይ?” ጊዳ። * ኢዩ 2፡11፤ ሚል 3፡2