12
ዬሱሳ ሺቶ ቲዪዳ ማጫሳዮ
(ማቶ 26፡6-13፤ ማር 14፡3-9)
1 ፓዚጋ ባዓሌስ ቡሮ ኡሱፑን ጋላሲ ኣቲሺን ዬሱሲ ሃይቆፔ ዴንꬂዳ ኣላዛሬይ ዲዛሶ ቢታኒያ ቢዴስ። 2 ሄን ዬሱሳስ ካዎ ካꬂዲ ማርታይ ኢዛ ካዎ ሚዚሺን ኢዛራ ኢሲፌ ማዳን ኡቲዳይታፔ ኢሶይ ኣላዛሬ። 3 ማራማ ዳሮ ኣልዖ ዋጋራ ሻሜቲዳ ባጋ ሊትሮ ጊዲዛ ጌሻ ናርዶሴ ሺቶ ኤካ ያዳ ዬሱሳ ቶሆ ቦላ ጉሳዳ ቶሆዛ ባ ሁዔ ቢናናራ ቁጫዱስ። ኬꬃካ ሺቶ ሳዎይ ኩሚዴስ። * ሉቃ 7፡37-38 4 ዬሱሳ ካሊዛይታፔ ኢሶይ ዬሱሳ ኣꬂ ኢማና ኣስቆሮንቶ ዩሁዳይ፥ 5 “ሃይሲ ሺቶዚ ሄꬑ ፄቱ ዲናሬስ ባይዜቲዲ ሚሻይ ኣዛስ ማንቆታስ ኢሜቲቤኔ?” ጊዴስ። 6 ኢዚ ሄሳ ጊዳይ ሚሻ ሺሺዛ ካራፂቴ ኦይኪዛዴይ ኢዛ ጊዲዳ ጊሽ ሺቂዛ ሚሻፌ ባስ ሺሺዲ ጎዔቲዛዴ ጊዲዳ ጊሻሳ ኣቲን ማንቆታስ ሚሼቲዲ ጊዴና።
7 ዬሱሲ ቃሴ “ሃይሲ ሺቶዚ ታስ ሞጎ ጋላሳስ ቆፌቲዳዝ ጊዲዳ ጊሽ ሄ ዎዴ ጋካናስ ኢዛ ባ ኣቻን ናጉ፥ ቦቾፍቴ። 8 ማንቆቲ ኣይ ዎዴካ ኢንቴናራ ዴቴስ። ጊዶ ኣቲን ኢንቴ ታና ኡባ ዎዴ ዴሜኬታ” ጊዴስ። * ዛሬ 15፡11
9 ሄ ዎዴ ዳሮ ኣይሁዳ ኣሳቲ ዬሱሲ ሄን ዲዛይሳ ኤሪዲ ኢዛኮ ዪዳ፤ ዪዳይቲካ ዬሱሳ ፃላላ ኮሽ ጊዶንታ ዬሱሲ ሃይቆፔ ዴንꬂዳ ኣላዛሬካ ቤያናሳ። 10 ሄሳ ጊሽ ቄሴታ ሃላቃቲ ዬሱሳራ ኣላዛሬካ ጋꬂ ዎꬋናስ ባ ጊዶን ዞሬቲዳ። 11 ሄሲካ ኣላዛሬ ጌዶን ዳሮ ኣይሁዳ ኣሳይ ዬሱሳኮ ቢ ቢዲ ኢዛ ኣማኒዛ ጊሻሳ።
ዬሱሲ ቦንቾን ዬሩሳላሜ ጌሊዴስ
(ማቶ 21፡1-11፤ ማር 11፡1-11፤ ሉቃ 19፡28-40)
12 ዎንቴꬃ ጋላስ ባዓሌዛ ቦንቻና ዪዳ ዴሬይ ዬሱሲ ዬሩሳላሜ ዪዛይሳ ሲይዴስ። 13 ዛምባ ሃይꬅ ኤኪዲ ዬሱሳ ሞካና ኬዚዴስ፤ ዴሬይ ቃላ ꬎቁ ሂስቲዲ “ሆሳና! ጎዳ ሱንꬃን ዪዛ ኢስራዔሌ ካዎይ ኣንጄቲዳይሳ!” ጊዴስ። * ማዛ 118፡25-26
14-15 ቤኒ “ሃኔ! ፂዮኔ ናዬ፥ ባቦፋ!
ሄኮ ኔ ካዎይ ሃሬ ጉቴ ቶጊዲ ዬስ”
ጌቴቲ ፃፌቲዳ ማላ ዬሱሲ ሃሬ ጉቴ ዴሚዲ ቶጊዴስ። * ዛካ 9፡9
16 ኢዛ ካሊዛይቲ ሄሳ ዉርሲ ኮይሮ ዎዝናን ዎꬂቤቴና። ኢዛ ጊሽ ፃፌቲዳይሳኔ ኢዛስ ኦሴቲዳ ሃኖካ ዉርሲ ዬሱሲ ሃይቆፔ ዴንዲዳፔ ጉዬ ኤሪዳ።
17 ኣላዛሬ ዱፎፔ ፄይጊዲ ሃይቆፔ ዴንꬂዳ ዎዴ ኢዛራ ኢሲፌ ዲዛ ኣሳይ ኢዛ ዴንꬃ ጊሽ ማርካቲዳ። 18 ዳሮ ኣሲካ ኢዚ ሄሳ ማላ ጊታ ማላታ ኦꬂዳይሳ ሲይዲ ኢዛ ሞካና ኬዚዴስ። 19 ሄሳ ጊሽ ፋርሳዌቲ ባ ጊዶን ኢሶይ ኢሳ “ሂስቲን ኑኒ ኣይ ኦꬃና ዳንዳዪዞኒ? ቤይቴ! ኩሜꬃ ዴሬይ ኣቶንታ ኢዛ ካሌስ” ጊዳ።
ዬሱሲ ባ ሃይቃናይሳ ካሴቲ ዮቲዴስ
20 ጎይናናስ ባዓሌዛስ ሺቂዳ ኣሳ ጊዶን ጊሪኬ ዴሬ ኣሳቲካ ዴቴስ። 21 ኢስቲካ ጋሊላ ጊዶን ዲዛ ቤቴሳይዳ ጌቴቲዛ ዴሬ ኣስ ፒሊጶሳ ጌቴቲዛዴኮ ቢዲ “ጎዶ! ኑ ዬሱሳ ቤያና ኮዮስ” ጊዳ።
22 ፒሊጶሲካ ኢንዲራሳስ ዮቲዴስ። ኢንዲራሲኔ ፒሊጶሲ ቢዲ ዬሱሳስ ዮቲዳ። 23 ዬሱሲካ ኢስታስ “ሄኮ ኣሳ ናይ ቦንቼቲዛ ሳቴይ ጋኪዴስ። 24 ታ ኢንቴስ ቱሙ ጋይስ፤ ጊስቴ ኣይፌይ ቢታን ዎꬋዳ ሃይቆንታ ጮዑ ጋ ኡቲኮ ባርካ ኣታዉስ። ኢዛ ሃይቂዛ ጊዲኮ ሃራ ዳሮ ኣይፋዉስ። 25 ባ ሼምፖ ዶሲዛዴይ ꬋይሴስ። ሃይሳ ቢታ ቦላ ባ ሼምፖ ኢፂዛዴይ ጊዲኮ ሜርና ዴዖ ዴሜስ። 26 ታስ ኦꬃና ኮዪዛዴይ ታና ካሎ፤ ታስ ኦꬂዛዴይ ታ ዲዛሶን ዳና፤ ታስ ኦꬂዛዴ ታ ኣዋይ ኢዛ ቦንቻና” ጊዴስ።
ዬሱሲ ኢዛ ቡሮፔ ጋካና ሜቶ ጊሺኔ ሃይቆ ጊሽ ዮቲዴስ
27 ቃሴካ ዬሱሲ “ሄኮ ታ ሼምፖያ ሜቶታዱስ ‘ታ ኣዋዉ! ሃ ሳቴይፔ ታና ኣሻ ጎሻ?’ ታ ሂዝጎንታ ማላ ታ ዪዳይ ሃኖ ሃ ሜቶ ሳቴይሳ።
28 “ታ ኣዋዉ! ኔ ኔ ሱንꬃ ቦንቻ” ጊዴስ። ሄሳፌ ካሊዲ “ታኒ ታ ሱንꬃ ቦንቻዲስ፤ ቃሴካ ጉጃ ቦንቻና” ጊዛ ቃላይ ሳሎፔ ዪዴስ።
29 ሄን ጋዳን ኤቂዳ ኣሳይ ሄሳ ሲይዲ “ዳዳይ ዳዳቴስ” ጊዳ። ባጋይቲ ቃሴ “ኪታንቻኮ ሃሳዪዛይ” ጊዳ።
30 ዬሱሲ “ሃይሲ ጊሪሳይ ዪዳይ ኢንቴ ጊሻሳ ኣቲን ታ ጊሽ ጊዴና። 31 ሃይሲ ኣላሜይ ፒርዴታና ዎዴይ ሃይሳ፤ ሃይሳ ዴሬዛ ሃሪዛ ፃላዔይ ሃዒ ጌዴ ካሬ ዬጌታና። 32 ታኒ ꬎቁ ጋዳ ካቄቲዛ ዎዴ ኣሳ ዉርሳ ታኮ ዛራና” ጊዴስ። 33 ዬሱሲ ሄሳ ዮቲዳይ ኢዚ ኣይ ማላ ሃይቆ ሃይቃናኮ ኤሪሳናሳ።
34 ኣሳይ ቃሴ “ኑ ዎጋን ፃፌቲዳይ ‘ፆሲ ኪቲዳዴይ ሜርናስ ዳና’ ጌስ፤ ሂስቲን ኔ ቃሴ ዋናዳ ‘ኣሳ ናይ ꬎቁ ጊ ካቄታና ቤሴስ’ ጋይ? ኔ ጊዛ ኣሳ ናይ ኣዋይሴ?” ጊዲ ኦይቺዳ። * ማዛ 110፡4፤ ኢሳ 9፡7፤ ሂዚ 37፡25፤ ዳኔ 7፡14
35 ዬሱሲ ኢስታስ “ሃዒ ጉꬃ ዎዴስ ኢንቴናራ ፖዖይ ዴስ፤ ጋዴይ ꬉሞንታ ፖዖራ ሃሙቲቴ፤ ቃማራ ሃሙቲዛዴይ ኢዚ ኣዋ ቢዛኮኔ ኤሬና። 36 ኢንቴ ፖዖ ናይታ ጊዳና ማላ ፖዖይ ዲሺን ፖዖን ኣማኒቴ” ጊዴስ። ዬሱሲ ሄሳ ጊዳፔ ጉዬ ቢዲ ኢስታ ኣይፌፔ ጌሚዴስ።
ኣይሁዳቲ ኣማኒቤቴና
37 ዬሱሲ ኢስታስ ሄሳ ማላ ማላታ ኢስታ ሲንꬃን ኦꬂንካ ኣይሁዳቲ ኢዛን ኣማኒቤቴና። 38 ሄሲ ሃኒዳይ ናቤ ኢሳያሲ
“ጎዶ! ኑ ማርካቴꬃ ኣማኒዳይ ኦኔ?
ፆሳ ቃላይ ኦናስ ቆንጪዴ?” ጊዳ ማላ። * ኢሳ 53፡1
39 ሄሳ ጊሽ ኣማናናስ ዳንዳይቤቴና፤
ጋሶይካ ናቤ ኢሳያሲ ካሴ፥
40 “ኢስቲ ባ ኣይፌን ቤዪዲ፥
ባ ዎዝናን ዩሺ ቆፒዲ፥
ሲሞንታ ማላኔ ኢዚ ኢስታ ፓꬆንታ ማላ
ፆሲ ኢስታ ኣይፌ ቆቂሲዴስ፤
ኢስታ ዎዝናካ ሙሚሲዴስ”
ጊ ፃፊዳ ጊሻሳ። * ኢሳ 6፡10
41 ኢሳያሲ ሄሳ ጊዳይ ፆሲ ኪቲዳዴ ቦንቾ ቤዪዳ ጊሻሳ፤ ሄሳ ጊሽ ዬሱሲ ዮቲዴስ።
42 ጊዲኮካ ኣይሁዳታ ሃላቃታፔ ዳሮ ኣሳይ ዬሱሳ ኣማኒዴስ። ጊዶ ኣቲን ኢስታ ኣይሁዳታ ዎሳ ኬꬃፌ ጎዶንታ ማላ ፋርሳዌታስ ባቢዲ ባ ኣማኖ ቆንጬን ማርካቲቤቴና። 43 ኢስቲ ሄሳꬆ ሃኒዳይ ኢስታስ ፆሳፌ ኢሜቲዛ ቦንቾፌ ኣꬂዲ ኣሳፔ ኢሜቲዛ ቦንቾ ዶሲዳ ጊሻሳ።
44 ዬሱሲ ባ ቃላ ꬎቁ ሂስቲዲ “ታና ኣማኒዛዴይ ታናን ፃላላ ጊዶንታ ታና ኪቲዳይሳንካ ኣማኔስ። 45 ታና ቤዪዳዴይ ታና ኪቲዳይሳካ ቤያና። 46 ታና ኣማኒዛይ ዉሪ ꬉማን ዶንታ ማላ ታ ፖዖ ጊዳዳ ሃይሳ ሃ ኣላሜዛ ያዲስ። 47 ታ ቃላ ሲይዲ ኦꬆንታዴ ቦላ ፒርዳናይ ታና ጊዲኬ። ጋሶይካ ታ ዪዳይ ኣላሜ ኣሻናስ ኣቲን ኣላሜ ቦላ ፒርዳናስ ጊዴና። 48 ታና ኮዮንታዴኔ ታ ቃላ ኤኮንታዴ ቦላ ፒርዳናዴይ ዴስ፤ ታ ኢዛስ ዮቲዳ ቃላይ ዉርሴꬃ ጋላስ ኢዛ ቦላ ፒርዳና። 49 ጋሶይካ ታኒ ጮ ታ ሼኔን ዮታቤይኬ፤ ታ ጊዛይሳኔ ታ ዮቲዛ ኣዛዞ ታስ ኢሚዳይ ታና ኪቲዳ ታ ኣዋ 50 ኢዛ ኣዛዞይ ሜርና ዴዖ ጊዲዳይሳ ታ ኤራይስ፤ ሄሳ ጊሽ ታ ዮቲዛይ ዉሪ ኣዋይ ታስ ዮቲዳይሳ” ጊዴስ።