1 ፋርሳዌታ ባጋ ኣስ ጊዲዳ ኣይሁዳታ ሃላቃታፔ ኢሲ ኒቆዲሞሳ ጌቴቲዛ ኣሲ ዴስ። 2 ኢዚ ቃማራ ዬሱሳኮ ቢዲ “ኣስታማሬ! ፆሲ ኢዛራ ዲዛዴ ጊዲኮፌ ኣቲን ሃይታ ኔ ኦꬂዛ ማላሊሲዛ ማላታታ ኦꬃናስ ዳንዳዪዛዴይ ዴና። ሄሳ ጊሽ ኔ ፆሳ ኣቻፌ ዪዳ ኣስታማሬ ጊዲዳይሳ ኑ ኤሮስ” ጊዴስ።

3 ዬሱሲካ ኢዛስ ዛሪዲ “ታ ኔስ ቱሙ ጋይስ፤ ኣሲ ናምዓንꬆ ዬሌቶንታ ኣጊኮ ፆሳ ካዎቴꬅ ቤያናስ ዳንዳዬና” ጊዴስ። 4 ኒቆዲሞሲካ ዛሪዲ “ሂስቲን ኣሲ ጪሚዳፔ ጉዬ ዋኒዲ ናምዓንꬆ ዬሌታና ዳንዳዪዜ? ቃሴካ ጌዴ ባ ኣዪ ኡሎን ሲሚ ጌሊዲ ዬሌታኔ?” ጊዲ ኦይቺዴስ።

5 ዬሱሲካ ኢዛስ “ታ ኔስ ቱሙ ጋይስ፤ ኣሲ ሃꬃፌኔ ፂሎ ኣያናፔ ዬሌቶንታ ዲሼ ፆሳ ካዎቴꬅ ጌላናስ ዳንዳዬና። 6 ኣሳፔ ዬሌቲዳይ ኣሳ። ኣያናፔ ዬሌቲዳይ ኣያና። 7 ሄሳ ጊሽ ‘ኢንቴ ናምዓንꬆ ዬሌታናስ ኮሼስ’ ታ ኔና ጊዳ ጊሽ ማላሌቶፋ። 8 ጫርኮይ ባ ኮይዳ ባጋ ጫርኬስ። ኔ ጫርኮስ ጊሪስ ሲያሳ ኣቲን ኢዚ ኣዋፔ ዪዛኮኔ ኣዋ ቢዛኮ ኤራካ። ኣያናፔ ዬሌቲዳይካ ሄሳ ማላ” ጊዴስ።

9 ኒቆዲሞሲ “ሃይሲ ዋኒ ሃናና ዳንዳዒዜ?” ጊዲ ኦይቺዴስ። 10 ዬሱሲካ ኢዛስ “ኢስራዔሌ ኣስታማሬ ጊዳ ኡታዳ ሄሳ ኔ ኤሪኪ? 11 ታ ኔስ ቱሙ ጋይስ፤ ኑኒ ኑ ኤርዛይሳ ዮቶስ። ኑ ቤዪዳይሳ ማርካቶስ ጊዶ ኣቲን ኢንቴ ኑ ማርካቴꬅ ኤኬኬታ። 12 ታ ኢንቴስ ሃይሳ ሃ ቢታ ዮዖ ዮቲን ኣማኖንታ ኢፂኮ ሳሎ ሚሽ ዮቲኮ ዎስቲ ኢንቴ ኣማናኔ? 13 ሳሎፔ ዱጌ ዎꬊዳ ኣሳ ናፔ ኣቲን ፑዴ ሳሎ ኬዚዳይ ሃራይ ኦኒካ ዴና። * ሳሎፔ ዱጌ ዎꬊዴስ ኣሳ ናፔ ኣቲን ፑዴ ሳሎ ኬዚዳይ ሃራይ ኦኒካ ዴና ኢሲ ኢሲ ጌሻ ማፃፋቲ ሳሎን ዲዛ ኣሳናፔ ኣቲን ጌቴስ።

14 “ባዞ ቢታን ሙሴይ ሾሽ ꬎቁ ሂስቲ ካቂዳይሳꬆ ሄሳꬆካ ኣሳ ናይ ꬎቃሶን ካቄታናስ ቤሴስ። * ታይ 21፡9 15 ሄሲካ ኢዛን ኣማኒዛዴይ ዉሪካ ሜርና ዴዖ ዴማናሳ። 16 ፆሳ ና ኣማኒዛይ ዉሪ ሜርና ዴዖ ዴማናፔ ኣቲን ꬋዮንታ ማላ ፆሲ ሃይሳ ኣላሜዛ ዳሮ ሲቂዳ ጊሽ ባ ሜፂ ኢሲ ናዛ ኢሚዴስ። 17 ፆሲ ባ ናዛ ሃ ዱጌ ኣላሜ ኪቲዳይ ኣላሜ ኣሳይ ኢዛን ኣማኒዲ ኣታና ማላሳ ኣቲን ኢዚ ኣላሜ ኣሳ ቦላ ፒርዳናስ ጊዴና።

18 “ኢዛ ኣማኒዛዴ ቦላ ፒርዴቴና። ኢዛ ኣማኖንታዴይ ጊዲኮ ፆሳ ና ኢሲኔዛን ኣማኖንታ ጊሽ ካሴካ ፒርዴቲ ኡቲዴስ። 19 ፒርዳይካ ሃይሳ ማላ፥ ፖዖይ ሃ ኣላሜ ዪዴስ ሺን ኣሳስ ኦሶይ ኢታ ጊዲዳ ጊሽ ኣሳይ ፖዖፔ ዳሮ ꬉማ ዶሲዴስ። 20 ኢታ ኦꬂዛዴይ ዉሪካ ፖዖ ዶሴና። ኢዚ ኦꬂዛ ኢታ ኦሶይ ቆንጪ ኬዞንታ ማላ ኢዚ ባ ሁዔስ ፖዖይ ዲዛሶ ኬዜና። 21 ቱሙ ኦꬂዛዴይ ጊዲኮ ፖዖይ ዲዛሶ ዬስ። ኢዚ ፖዖይ ዲዛሶ ዪዛ ጋሶይ ፆሳ ኣዛዞ ማላ ኢዚ ኦꬂዳ ኦሶይ ቆንጫና ማላሳ” ጊዴስ።

22 ሄሳፌ ካሊዲ ዬሱሲ ባና ካሊዛይታራ ዩሁዳ ዴሬ ቢዴስ፤ ሄንካ ኣሳ ፃማቂሼ ኢስታራ ጉꬃ ዎዴ ጋምዒዴስ። 23 ሄ ዎዴ ሳሊሜ ኣቻን ሄኖኔ ጌቴቲዛሶን ዳሮ ሃꬂ ዲዛ ጊሽ ዮሃኒሲ ኣሳ ፃማቂሺን ኣሲካ ኢዛኮ ቢዲ ፃማቄቲዴስ። 24 ሄሳ ዎዴ ዮሃኒሲ ቡሮ ቃሾ ኬꬄ ጌሊቤና። * ማቶ 14፡3፤ ማር 6፡17፤ ሉቃ 3፡19-20

25 ሄ ዎዴ ዮሃኒሳ ካሊዛይታ ጊዶኒኔ ኢሲ ኢሲ ኣይሁዳ ኣሳታ ጊዶን ኣይሁዳታ ጌሾ ዎጋ ጊሽ ጊታ ፓላማይ ዴንዲዴስ። 26 ዮሃኒሳ ካሊዛይቲ ኢዛኮ ሺቂዲ “ኣስታማሬ! ኔናራ ዮርዳኖሴ ሻፋ ፒንꬃን ኢሲፌ ዲሺን ኔ ኢዛ ጊሽ ማርካቶ ኣዴዚ ሄኮ ፃማቄስ፤ ኣሲካ ኢዛኮ ቤስ” ጊዳ። 27 ዮሃኒሲካ ኢስታስ “ኦናስካ ፆሳፌ ኢሜቶንታ ዲሺን ኣይኮይካ ዳና ዳንዳዬና።

28 “ታኒ ኢዛፔ ሲንꬃታ ኪቴታዲስ ኣቲን ያና ጊዳ ኪርስቶሲ ታና ግዲኬ’ ጋዳ ታ ኢንቴስ ዮቶይሳስ ኢንቴ ኢንቴ ሁዔራ ታ ማርካታ። * ዮሃ 1፡20 29 ሳርጌ ዎዴ ኤካና ሚሺራይ ዲዛዴይ ኢዚካ ሚሺራ። ሚሺራ ላጌይ ጊዲኮ ሚሺራዛ ኣቻን ኤቂዲ ሚሺራዚ ጊዛዝ ሲዬስ። ሚሺራዛ ፃላ ሲይዲ ኡፋዬቴስ። ሄሳ ጊሽ ታ ኡፋይሲ ሃዒ ፖሌቲዴስ። 30 ኢዚ ꬎቁ ꬎቁ ጋና ማላ ታካ ዚቂ ዚቂ ጋና ኮሼስ።

31 “ፑዴፔ ዪዛዴይ ኡባፌ ቦላ። ጋርሳ ቢታፌ ዪዳዴይ ኢዚ ቢታፌኔ ቢታዚ ዮቴስ። ሳሎፔ ዪዛዴይ ኢዚ ኡባፌ ቦላ። 32 ኢዚ ባ ቤዪዳዚኔ ባ ሲዪዳዝ ማርካቴስ። ጊዶ ኣቲን ኢዛ ማርካቴꬅ ኤኪዛዴይ ዴና። 33 ኢዛ ማርካቴꬅ ኤኪዛዴይ ጊዲኮ ፆሳ ቱማንቻ ጊዲዳይሳ ቆንጪሴስ። 34 ፆሲ ኪቲዳዴይ ፆሳ ቃላ ዮቴስ። ፆሲካ ኢዛዴስ ባ ኣያና ማኪ ኢሜና።

35 “ኣዋይ ባ ና ዶሴስ። ሃኒዛ ዮዖ ዉርሲ ኢዛ ኩሼን ኣꬂ ኢሜስ። * ማቶ 11፡27፤ ሉቃ 10፡22 36 ናዛን ኣማኒዛዴስ ሜርና ዴዖይ ዴስ። ናዛን ኣማኖንታይ ጊዲኮ ፆሳ ሃንቆይ ኢዛ ቦላ ዳና ኣቲን ዴዖ ዴሜና” ጊዴስ።